ഒന്റാരിയോ; ഗ്രേറ്റർ ടൊറന്റോ ഏരിയയിൽ ഇത്തവണത്തെ ശരത്കാലം കനത്ത തണുപ്പില്ലാതെ പ്രസന്നമായിരിക്കുമെന്ന് എൻവയോൺമെന്റ് കാനഡയിലെ പ്രമുഖ കാലാവസ്ഥാ വിദഗ്ധൻ ഡേവിഡ് ഫിലിപ്സ് അറിയിച്ചു. ചൊവ്വാഴ്ച ഔദ്യോഗികമായി പുതിയ സീസൺ ആരംഭിച്ചതോടെ പ്രദേശത്ത് നേരിയ തണുപ്പ് അനുഭവപ്പെട്ടു തുടങ്ങി. കഴിഞ്ഞ മേയ് മാസത്തിന് ശേഷം ആദ്യമായി ടൊറന്റോയിലെ താപനില എട്ട് ഡിഗ്രി സെൽഷ്യസിന് താഴെയെത്തി. കനത്ത തണുപ്പിലേക്ക് പെട്ടെന്ന് മാറാതെ, വരും ആഴ്ചകളിൽ തെളിഞ്ഞ ആകാശവും മിതമായ ചൂടുമുള്ള സുഖകരമായ അന്തരീക്ഷമായിരിക്കും ജിടിഎയിൽ ഉണ്ടാകുക.
ശാന്തസമുദ്രത്തിൽ അനുഭവപ്പെടുന്ന ‘എൽ നിനോ’ പ്രതിഭാസവും കടലിലെ ഉയർന്ന താപനിലയുമാണ് ഇത്തവണത്തെ മിതമായ കാലാവസ്ഥയ്ക്ക് പ്രധാന കാരണം. ഇതിനാൽ ഒക്ടോബർ മാസം കൂടുതൽ വരണ്ടതും ചൂടുള്ളതുമായിരിക്കും. നവംബർ, ഡിസംബർ മാസങ്ങളിലും കടുത്ത തണുപ്പ് ഉണ്ടാകില്ലെങ്കിലും ചെറിയ രീതിയിൽ മഴ പെയ്തേക്കാം. നവംബർ ആദ്യ വാരത്തിന് ശേഷമേ ഇത്തവണ മഞ്ഞുവീഴ്ച തുടങ്ങാൻ സാധ്യതയുള്ളൂ. എയർകണ്ടീഷണറോ ഹീറ്ററോ ഉപയോഗിക്കേണ്ടാത്ത വിധം ആളുകൾക്ക് ഏറെ സൗകര്യപ്രദമായ ദിവസങ്ങളായിരിക്കും ഇനി വരാനിരിക്കുന്നത്.
Also Read: സെപ്റ്റംബർ 23 മുതൽ 29 വരെ! കാനഡയിലെ 10 പ്രധാന ആനുകൂല്യങ്ങൾ ഉടൻ അക്കൗണ്ടുകളിലേക്ക്
വേനൽക്കാലത്ത് പെയ്ത കനത്ത മഴ കാരണം മരങ്ങളിലെ ഇലകൾ നിറംമാറുന്ന ഭംഗിയുള്ള കാഴ്ച കാണാൻ ഇത്തവണ കുറച്ചുകൂടി കാത്തിരിക്കേണ്ടി വരും. സാധാരണയേക്കാൾ രണ്ട് ആഴ്ചയോളം വൈകി, അതായത് ഒക്ടോബർ പകുതിക്ക് ശേഷമായിരിക്കും ഇലപൊഴിയും കാലത്തിന്റെ യഥാർത്ഥ സൗന്ദര്യം ടൊറന്റോയിൽ ദൃശ്യമാകുക. കാലാവസ്ഥയിലെ ഈ അനുകൂല മാറ്റങ്ങൾ കാരണം ശക്തമായ കൊടുങ്കാറ്റുകൾക്കും ഹറിക്കേനുകൾക്കും സാധ്യത കുറവാണെന്നതും ജനങ്ങൾക്ക് വലിയ ആശ്വാസമാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
