ബെർലിൻ: ജർമ്മനിയിലെ ബോച്ചം നഗരത്തിലുള്ള റസിഡൻഷ്യൽ കെട്ടിടത്തിലുണ്ടായ തീപിടിത്തത്തിൽ മൂന്ന് മലയാളികൾ കൊല്ലപ്പെട്ടു. ഒക്ടോബർ 14 ബുധനാഴ്ചയാണ് സംഭവം നടന്നത്. ഇടുക്കി ശാന്തിഗ്രാം സ്വദേശി നോവ സാബു (25), കൊല്ലം സ്വദേശി അഞ്ജലി ജോയ്, എറണാകുളം കാലടി സ്വദേശി സിവിൻ ജോണി (26) എന്നിവരാണ് അപകടത്തിൽ മരണപ്പെട്ടത്. സംഭവവുമായി ബന്ധപ്പെട്ട് റൊമാനിയൻ പൗരനായ ഒരാളെ ജർമ്മൻ പൊലീസ് അറസ്റ്റ് ചെയ്തു. അപകടത്തിന്റെ കാരണം വ്യക്തമാക്കുന്നതിനായി പൊലീസ് വിശദമായ അന്വേഷണം ആരംഭിച്ചിട്ടുണ്ട്.
മരിച്ച മൂന്ന് പേരും അപകടം നടക്കുന്നതിന് രണ്ടാഴ്ച മുമ്പാണ് കെട്ടിടത്തിലെ രണ്ടാം നിലയിലുള്ള അപ്പാർട്ട്മെന്റിലേക്ക് താമസം മാറിയത്. നോവ സാബു ജോലി ആവശ്യത്തിനായി ആറു മാസം മുമ്പാണ് ജർമ്മനിയിലെത്തിയത്. കെട്ടിടത്തിൽ നിന്നും ഉയർന്ന പുക ശ്വസിച്ച് അവശരായ മറ്റ് അഞ്ച് പേരെ നിലവിൽ വിവിധ ആശുപത്രികളിൽ പ്രവേശിപ്പിച്ചിരിക്കുകയാണ്.
തീപിടിത്ത വിവരമറിഞ്ഞ ഉടൻ തന്നെ ഇന്ത്യൻ എംബസിയും പ്രാദേശിക ഭരണകൂടവും സഹായ നടപടികൾ ആരംഭിച്ചു. അപകടത്തിൽപ്പെട്ടവർക്കുള്ള അടിയന്തര വൈദ്യസഹായവും മരണപ്പെട്ടവരുടെ ഇൻക്വസ്റ്റ് നടപടികളും ജർമ്മൻ പൊലീസിന്റെ നേതൃത്വത്തിൽ വേഗത്തിൽ പുരോഗമിക്കുകയാണ്.
മരിച്ച മലയാളികളുടെ മൃതദേഹങ്ങൾ എത്രയും വേഗം നാട്ടിലെത്തിക്കുമെന്ന് മന്ത്രി പി.സി. വിഷ്ണുനാഥ് ഉറപ്പുനൽകി. മരിച്ച അഞ്ജലിയുടെ ബന്ധുക്കളുമായി മന്ത്രി ഫോണിൽ സംസാരിച്ച് സ്ഥിതിഗതികൾ വിലയിരുത്തി. തുടർനടപടികൾ ഏകോപിപ്പിക്കുന്നതിന് ആവശ്യമായ എല്ലാവിധ പിന്തുണയും സംസ്ഥാന സർക്കാർ വാഗ്ദാനം ചെയ്തിട്ടുണ്ട്.
Also Read: ‘അമേരിക്കൻ രാഷ്ട്രീയത്തിൽ ഇടപെടരുത്’; കനേഡിയൻ നേതാക്കൾക്ക് യുഎസ് അംബാസഡറുടെ മുന്നറിയിപ്പ്
മൃതദേഹങ്ങൾ നാട്ടിലേക്ക് കൊണ്ടുപോകുന്നതിനുള്ള നടപടികൾ കേന്ദ്ര വിദേശകാര്യ മന്ത്രാലയവുമായും ജർമ്മനിയിലെ ഇന്ത്യൻ എംബസിയുമായും ചേർന്ന് നോർക്ക റൂട്ട്സ് ആരംഭിച്ചിട്ടുണ്ട്. സാങ്കേതിക നടപടികൾ പൂർത്തിയാക്കി മൃതദേഹങ്ങൾ ഉടൻ ബന്ധുക്കൾക്ക് വിട്ടുനൽകും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
