ഓട്ടവ: അമേരിക്കന്‍ രാഷ്ട്രീയത്തില്‍ ഇടപെടുന്നതില്‍നിന്ന് കനേഡിയന്‍ രാഷ്ട്രീയ നേതാക്കള്‍ വിട്ടുനില്‍ക്കണമെന്ന് യുഎസ് അംബാസഡര്‍ പീറ്റ് ഹോക്‌സ്ട്ര. അമേരിക്കയില്‍ നടക്കാനിരിക്കുന്ന ഇടക്കാല തിരഞ്ഞെടുപ്പില്‍ രാഷ്ട്രീയ ഇടപെടലുണ്ടാകാനുള്ള സാധ്യത അധികൃതര്‍ നിരീക്ഷിക്കുന്നുണ്ടെന്നും അദ്ദേഹം പറഞ്ഞു.
‘ദ റിയലി ബിഗ് ഷോ’ പോഡ്കാസ്റ്റിന് നല്‍കിയ അഭിമുഖത്തിലാണ് ഹോക്‌സ്ട്രയുടെ പ്രതികരണം. കനേഡിയന്‍ വ്യവസായ മന്ത്രി മെലാനി ജോളി ഉള്‍പ്പെടെയുള്ള നേതാക്കളുടെ ചില നടപടികള്‍ അമേരിക്കന്‍ തിരഞ്ഞെടുപ്പിലെ ഇടപെടലായി വ്യാഖ്യാനിക്കപ്പെടാമെന്ന് അദ്ദേഹം പറഞ്ഞു. രാഷ്ട്രീയമായി നിര്‍ണായകമായ സംസ്ഥാനങ്ങളില്‍ താരിഫുകള്‍ ലക്ഷ്യമിടുമെന്ന് ജോളി പറഞ്ഞതും അദ്ദേഹം ചൂണ്ടിക്കാട്ടി.
അമേരിക്കന്‍ ഇടക്കാല തിരഞ്ഞെടുപ്പിന് ആഴ്ചകള്‍ മാത്രം ശേഷിക്കെയാണ് ഹോക്‌സ്ട്രയുടെ മുന്നറിയിപ്പ്. അതേസമയം, കണ്‍സര്‍വേറ്റീവ് പാര്‍ട്ടി നേതാവ് പിയര്‍ പൊയിലീവ്ര് മിഷിഗണിലും ഡെട്രോയിറ്റ് മേഖലയിലും പര്യടനം നടത്തുകയാണ്. കാനഡയ്ക്കും അമേരിക്കയ്ക്കും ഇടയില്‍ വാഹനമേഖലയില്‍ താരിഫുകള്‍ ഒഴിവാക്കണമെന്നാണ് അദ്ദേഹത്തിന്റെ ആവശ്യം. മിഷിഗണില്‍ താരിഫുകള്‍ക്കെതിരെ ഡെമോക്രാറ്റുകള്‍ പ്രചാരണം നടത്തുന്നുണ്ട്. താരിഫുകള്‍ അമേരിക്കയിലെ ജീവിതച്ചെലവ് വര്‍ധിപ്പിക്കുന്നുവെന്നാണ് അവരുടെ വാദം.
ALSO READ: വ്യാപാരയുദ്ധങ്ങൾക്കിടയിലും അതിർത്തി കടന്നുള്ള യാത്രകളിൽ വർധന: കാനഡ–യു.എസ് ടൂറിസം മേഖലയിൽ ഉണർവ്
ഓഗസ്റ്റില്‍ ഫ്‌ലോറിഡയില്‍ ഡെമോക്രാറ്റിക് കോണ്‍ഗ്രസ് അംഗം ഡെബി വാസര്‍മാന്‍ ഷുള്‍ട്‌സിന്റെ പ്രൈമറി തിരഞ്ഞെടുപ്പ് പ്രചാരണത്തില്‍ ലിബറല്‍ എംപി ആന്തണി ഹൗസ്ഫാദറും പങ്കെടുത്തിരുന്നു. ഹൗസ്ഫാദറിന്റെ നടപടിയെക്കുറിച്ച് അമേരിക്കന്‍ ഉദ്യോഗസ്ഥര്‍ കനേഡിയന്‍ മാധ്യമപ്രവര്‍ത്തകരോട് ആശങ്ക അറിയിച്ചതായും റിപ്പോര്‍ട്ടുണ്ട്. ഇത്തരം നടപടികള്‍ അധികൃതര്‍ നിരീക്ഷിക്കുകയും വിലയിരുത്തുകയും ചെയ്യുന്നുണ്ടെന്നും തിരഞ്ഞെടുപ്പിലെ ഇടപെടലായി കണക്കാക്കുന്ന സാഹചര്യമുണ്ടായാല്‍ അമേരിക്ക പ്രതികരിക്കുമെന്നും ഹോക്‌സ്ട്ര പറഞ്ഞു.
കഴിഞ്ഞ വര്‍ഷം അമേരിക്കയുടെ താരിഫ് നയത്തിനെതിരെ ഒന്റാരിയോ സര്‍ക്കാര്‍ നടത്തിയ പരസ്യപ്രചാരണവും ഹോക്‌സ്ട്ര പരാമര്‍ശിച്ചു. ഉപഭോക്താക്കള്‍ക്ക് നികുതിഭാരം സൃഷ്ടിക്കുന്നതാണ് താരിഫുകളെന്നു പറയുന്ന മുന്‍ പ്രസിഡന്റ് റൊണാള്‍ഡ് റീഗന്റെ ശബ്ദം പരസ്യങ്ങളില്‍ ഉപയോഗിക്കുകയും ചെയ്തിരുന്നു. പരസ്യങ്ങള്‍ സംപ്രേഷണം ചെയ്തതിനു പിന്നാലെ കാനഡയും അമേരിക്കയും തമ്മിലുള്ള വ്യാപാര ചര്‍ച്ചകള്‍ നിലച്ചതായി ഹോക്‌സ്ട്ര പറഞ്ഞു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
‘US Ambassador Warns Canada Against Election Interference’
