വിന്നിപെഗ്: മാനിറ്റോബയിലെ ഫ്ലിൻ ഫ്ലോൺ നഗരത്തിൽ ഏഴാം ക്ലാസ് മുതലുള്ള വിദ്യാർത്ഥികൾക്കായി സൗജന്യ പ്രാദേശിക ബസ് യാത്രാ പദ്ധതി ആരംഭിച്ചു. അടുത്ത ജൂൺ വരെ നീണ്ടുനിൽക്കുന്ന ഈ പദ്ധതിയിലൂടെ വിദ്യാർത്ഥികൾക്ക് സൗജന്യ ബസ് പാസുകൾ വിതരണം ചെയ്തുവരികയാണ്. ബജറ്റ് പ്രഖ്യാപനത്തിന്റെ ഭാഗമായി മാനിറ്റോബയിലെ അഞ്ച് പ്രവിശ്യാ നഗരങ്ങളിലാണ് ഈ ആനുകൂല്യം നടപ്പിലാക്കുന്നത്. ഹപ്നോട്ട് കൊളീജിയറ്റ് ഉൾപ്പെടെയുള്ള സ്കൂളുകളിലെ അനേകം വിദ്യാർത്ഥികൾ ഇതിനകം പാസുകൾ കൈപ്പറ്റുകയും യാത്രയ്ക്കായി ബസ് സേവനം ഉപയോഗിച്ചു തുടങ്ങുകയും ചെയ്തിട്ടുണ്ട്. യാത്രാച്ചെലവും ഇന്ധനച്ചെലവും കുറയ്ക്കാൻ ഇത് കുടുംബങ്ങൾക്ക് വലിയ സഹായമാകുന്നു.
കഠിനമായ ശൈത്യകാലവും കുന്നിൻപ്രദേശങ്ങൾ നിറഞ്ഞ ഭൂപ്രകൃതിയുമുള്ള ഫ്ലിൻ ഫ്ലോണിൽ പൊതുഗതാഗതം ജനങ്ങളുടെ പ്രധാന ആവശ്യങ്ങളിലൊന്നാണ്. ഏകദേശം 5,000 ജനസംഖ്യയുള്ള ഈ നഗരം, മാനിറ്റോബയിലെ വടക്കൻ മേഖലയിൽ ബസ് സർവീസുള്ള ഏക പ്രദേശമാണ്. പരിസ്ഥിതി സൗഹൃദപരമായ യാത്രാമാർഗ്ഗം പ്രോത്സാഹിപ്പിക്കുന്നതിനൊപ്പം കുടുംബങ്ങളുടെ സാമ്പത്തിക ഭാരം കുറയ്ക്കുക കൂടിയാണ് ഈ പദ്ധതിയിലൂടെ കൗൺസിൽ ലക്ഷ്യമിടുന്നത്. നഗരത്തിലെ യാത്രാസൗകര്യങ്ങൾ കൂടുതൽ മെച്ചപ്പെടുത്തുന്നതിന്റെ ഭാഗമായി നടപ്പാതകൾ, ബസ് ഷെൽട്ടറുകൾ, റോസ് ക്രീക്കിന് മുകളിലെ കാൽനടപ്പാലം എന്നിവയുടെ നിർമ്മാണം ഉൾപ്പെടെ 2.2 മില്യൺ ഡോളറിന്റെ നവീകരണ പ്രവർത്തനങ്ങളും പുരോഗമിക്കുകയാണ്.
Also Read : പൊതുസ്ഥാപനങ്ങളിൽ പ്രാർഥനയ്ക്ക് വിലക്ക്; ക്യുബെക്കിൽ പുതിയ നിയമം പ്രാബല്യത്തിൽ
സ്കൂൾ സമയങ്ങളിൽ മാത്രമല്ല, വാരാന്ത്യങ്ങളിലും മറ്റ് ഒഴിവുസമയങ്ങളിലും വിദ്യാർത്ഥികൾക്ക് ഈ സൗജന്യ ബസ് പാസ് ഉപയോഗിച്ച് യാത്ര ചെയ്യാം. കായിക പരിശീലനങ്ങൾക്കും പാഠ്യേതര പ്രവർത്തനങ്ങൾക്കുമായി യാത്ര ചെയ്യുന്ന വിദ്യാർത്ഥികൾക്ക് ഇത് ഏറെ പ്രയോജനകരമാണ്. മാനിറ്റോബയും സസ്കാച്വാവാനും ഉൾപ്പെടുന്ന അതിർത്തി നഗരമായതിനാൽ ബസുകൾ സമീപ പ്രദേശങ്ങളിലേക്കും സർവീസ് നടത്തുന്നുണ്ട്. നിലവിൽ മാനിറ്റോബ സർക്കാരിന്റെ ധനസഹായത്തോടെ പ്രവർത്തിക്കുന്ന ഈ പദ്ധതി വരും വർഷങ്ങളിലും തുടരുമെന്ന പ്രതീക്ഷയിലാണ് വിദ്യാർത്ഥികളും നഗര ഭരണാധികാരികളും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
