സ്റ്റീൽ, തടി വ്യവസായങ്ങൾക്ക് ഡബിൾ ബൂസ്റ്റ്!; സഹായ പാക്കേജ് പ്രഖ്യാപിച്ച് മാർക്ക് കാർണി

കാനഡയും അമേരിക്കയും തമ്മിൽ തുടരുന്ന വ്യാപാര യുദ്ധത്തിൻ്റെ പശ്ചാത്തലത്തിൽ, രാജ്യത്തെ സ്റ്റീൽ, തടി (Lumber) വ്യവസായങ്ങളെ സംരക്ഷിക്കുന്നതിനും പിന്തുണയ്ക്കുന്നതിനുമായി പുതിയ നടപടികൾ പ്രധാനമന്ത്രി മാർക്ക് കാർണി പ്രഖ്യാപിച്ചു. അമേരിക്കയുമായി വാണിജ്യ ചർച്ചകൾ സ്തംഭനാവസ്ഥയിലായിരിക്കുകയും, ഒൻ്റാറിയോയുടെ താരിഫ് വിരുദ്ധ പരസ്യത്തെത്തുടർന്ന് ബന്ധങ്ങൾ വഷളാവുകയും ചെയ്ത സാഹചര്യത്തിലാണ് കാർണിയുടെ സുപ്രധാന പ്രഖ്യാപനം. അമേരിക്കൻ വിപണിയുമായുള്ള കാനഡയുടെ അടുത്ത സാമ്പത്തിക ബന്ധം അവസാനിച്ചു എന്നും, അതിൻ്റെ ഫലമായി തങ്ങളുടെ പല ശക്തികളും ദൗർബല്യങ്ങളായി മാറിയെന്നും കാർണി പാർലമെൻ്റ് ഹില്ലിൽ മാധ്യമങ്ങളോട് പറഞ്ഞു. ഈ പുതിയ പദ്ധതികൾക്ക് ഏകദേശം $146 മില്യൺ കാനഡ ഡോളറാണ് ചെലവ് പ്രതീക്ഷിക്കുന്നത്.

പുതിയ പദ്ധതികൾ പ്രകാരം, കാനഡയുമായി സ്വതന്ത്ര വ്യാപാര കരാറുകളില്ലാത്ത രാജ്യങ്ങളിൽ നിന്നുള്ള വിദേശ സ്റ്റീൽ ഇറക്കുമതിയുടെ പരിധി 2024-ലെ അളവിൻ്റെ 50 ശതമാനത്തിൽ നിന്ന് 20 ശതമാനമായി കുറച്ചു. ഇത് പ്രധാനമായും ചൈനീസ് സ്റ്റീൽ ഇറക്കുമതി കുറയ്ക്കാൻ ലക്ഷ്യമിട്ടുള്ളതാണ്. കൂടാതെ, യുഎസും മെക്സിക്കോയും ഒഴികെയുള്ള സ്വതന്ത്ര വ്യാപാര കരാർ രാജ്യങ്ങളിൽ നിന്നുള്ള ക്വാട്ട 100 ശതമാനത്തിൽ നിന്ന് 75 ശതമാനമായി കുറയ്ക്കും. ലക്ഷ്യമിട്ട സ്റ്റീൽ ഉൽപ്പന്നങ്ങൾക്ക് ആഗോളതലത്തിൽ 25 ശതമാനം താരിഫും ചുമത്തും. അടുത്ത സ്പ്രിംഗ് സീസൺ മുതൽ സ്റ്റീൽ, തടി എന്നിവ രാജ്യത്തുടനീളം കയറ്റി അയക്കുന്നതിനുള്ള ചരക്ക് നിരക്കുകളിൽ 50 ശതമാനം കുറവ് വരുത്തും. $1.2 ബില്യൺ ഡോളറിൻ്റെ സർക്കാർ പിന്തുണയുള്ള വായ്പകൾ നൽകുന്ന സോഫ്റ്റ്‌വുഡ് ലംബർ ഡെവലപ്‌മെൻ്റ് പ്രോഗ്രാമിലേക്ക് 500 മില്യൺ ഡോളർ കൂടി വർദ്ധിപ്പിച്ചതും, പ്രതിരോധ, നിർമ്മാണ കരാറുകളിൽ കനേഡിയൻ അസംസ്കൃത വസ്തുക്കൾക്ക് മുൻഗണന നൽകുന്ന ‘കനേഡിയൻ വാങ്ങുക’ (Buy Canadian Policy) നയം നടപ്പിലാക്കുന്നതും മറ്റ് പ്രധാന തീരുമാനങ്ങളാണ്.

ഈ നടപടികൾ തങ്ങളുടെ വ്യവസായത്തിന് “അതിജീവനത്തിന് അത്യന്താപേക്ഷിതമാണ്” എന്ന് കനേഡിയൻ സ്റ്റീൽ പ്രൊഡ്യൂസേഴ്സ് അസോസിയേഷൻ പ്രസിഡൻ്റ് കാതറിൻ കോബ്ഡൻ പ്രതികരിച്ചു. എന്നാൽ, ബി.സി. ലംബർ ട്രേഡ് കൗൺസിൽ പ്രസിഡൻ്റ് കുർട്ട് നിക്വിഡെറ്റ്, പിന്തുണയെ സ്വാഗതം ചെയ്യുമ്പോഴും, യുഎസുമായുള്ള ഒത്തുതീർപ്പ് ഇപ്പോഴും പ്രഥമ പരിഗണനയായി നിലനിൽക്കണമെന്ന് അഭിപ്രായപ്പെട്ടു. അതേസമയം, പ്രധാനമന്ത്രിയുടെ നീക്കത്തെ ‘വാഗ്ദാന ലംഘനം’ എന്ന് വിമർശിച്ച പ്രതിപക്ഷ നേതാവ് പിയറി പോളിവ്രെ, അമേരിക്കൻ വിപണിയിലേക്ക് തീരുവ രഹിതമായി പ്രവേശനം നേടുന്നതിന് ശക്തമായ ചർച്ചകൾ നടത്തണമെന്ന് ആവശ്യപ്പെട്ടു. പുതിയ നടപടികൾ, യുഎസുമായുള്ള ഉടമ്പടി സമീപ ഭാവിയിൽ ഉണ്ടാകാൻ സാധ്യതയില്ല എന്നതിൻ്റെ സൂചനയായി വ്യാഖ്യാനിക്കാമോ എന്ന ചോദ്യത്തിന്, “ഞങ്ങളുടെ മേഖലകളെ സംരക്ഷിക്കുന്നതിനും പുതിയ ആഗോള സമ്പദ്‌വ്യവസ്ഥയ്ക്കായി പുനഃസ്ഥാപിക്കുന്നതിനും ആവശ്യമായതെല്ലാം സർക്കാർ ചെയ്യും” എന്നായിരുന്നു കാർണിയുടെ മറുപടി.