കാനഡയിലെ തൊഴിലാളികൾ സാമ്പത്തികമായി മെച്ചപ്പെട്ട അവസ്ഥയിലാണെങ്കിലും, സാമ്പത്തിക പ്രശ്നങ്ങളെക്കുറിച്ചുള്ള ആശങ്കകൾ ജോലിസ്ഥലത്തെ ഉത്പാദനക്ഷമതയെ ബാധിക്കുന്നതായി പുതിയൊരു സർവേ റിപ്പോർട്ട്. National Payroll Institute ബുധനാഴ്ച പുറത്തുവിട്ട ‘Working Canadians’ എന്ന റിപ്പോർട്ടിലാണ് കനേഡിയൻ തൊഴിലാളികളുടെ സാമ്പത്തിക ഭദ്രതയെക്കുറിച്ചുള്ള വിവരങ്ങൾ ഉൾപ്പെടുത്തിയിട്ടുള്ളത്. ജീവിതച്ചെലവുകൾ വർദ്ധിക്കുന്നതും സാമ്പത്തിക രംഗത്തെ വെല്ലുവിളികളും കാരണം ഭാവിയിലേക്ക് കൂടുതൽ പണം കരുതിവയ്ക്കാൻ കനേഡിയൻ തൊഴിലാളികൾ ശ്രദ്ധിക്കുന്നുണ്ടെന്ന് National Payroll Institute-ന്റെ പ്രസിഡന്റും സി.ഇ.ഒ.യുമായ പീറ്റർ സാനെറ്റാക്കിസ് അഭിപ്രായപ്പെട്ടു.
സർവേയിൽ പങ്കെടുത്ത തൊഴിലാളികളെ സാമ്പത്തികമായി കഷ്ടപ്പെടുന്നവർ (financially stressed), ഭദ്രതയുള്ളവർ (financially coping), സുരക്ഷിതർ (financially comfortable) എന്നിങ്ങനെ മൂന്ന് വിഭാഗങ്ങളായി തിരിച്ചു. സാമ്പത്തികമായി സുരക്ഷിതരായ തൊഴിലാളികളുടെ എണ്ണം വർദ്ധിച്ചതാണ് മൊത്തത്തിലുള്ള പുരോഗതിക്ക് കാരണമെന്ന് റിപ്പോർട്ടിൽ പറയുന്നു. 2024-ൽ 41 ശതമാനമായിരുന്ന സാമ്പത്തികമായി കഷ്ടപ്പെടുന്നവരുടെ എണ്ണം 2025-ൽ 36 ശതമാനമായി കുറഞ്ഞതായും സർവേ വ്യക്തമാക്കുന്നു.
സർവേയിൽ പങ്കെടുത്ത 51 ശതമാനം പേർ ഈ വർഷം കൂടുതൽ പണം ലാഭിക്കാൻ ശ്രമിക്കുന്നതായി പറഞ്ഞു. 2024-ൽ ഇത് 42 ശതമാനം മാത്രമായിരുന്നു. ഒരു വർഷത്തിനുള്ളിൽ 10,000 ഡോളറോ അതിൽ കൂടുതലോ ലാഭിച്ച കനേഡിയൻ തൊഴിലാളികളുടെ എണ്ണം 29 ശതമാനമായി വർദ്ധിച്ചു, കഴിഞ്ഞ വർഷം ഇത് 23 ശതമാനം മാത്രമായിരുന്നു. Gen Z വിഭാഗത്തിൽപ്പെട്ട തൊഴിലാളികൾ സാമ്പത്തിക കാര്യങ്ങളിൽ കൂടുതൽ ശ്രദ്ധ പുലർത്തുന്നതായി സർവേ കണ്ടെത്തി. ഇവർ ശമ്പളത്തിന്റെ 11 ശതമാനം വരെ എല്ലാ മാസവും മാറ്റിവയ്ക്കുന്നുണ്ട്. 30 ശതമാനം Gen Z തൊഴിലാളികളും കഴിഞ്ഞ ഒരു വർഷത്തിനുള്ളിൽ 10,000 ഡോളറോ അതിൽ കൂടുതലോ ലാഭിച്ചിട്ടുണ്ട്. കൂടാതെ, 26 ശതമാനം പേർക്ക് അടുത്ത അഞ്ച് വർഷത്തിനുള്ളിൽ വീട് വാങ്ങാൻ കഴിയുമെന്ന ആത്മവിശ്വാസവുമുണ്ട്.
കൂടുതൽ ആളുകൾ സാമ്പത്തിക ഭദ്രത നേടിയെങ്കിലും, തൊഴിലാളികളുടെ സാമ്പത്തിക ആശങ്കകൾ ജോലിസ്ഥലത്തെ ഉത്പാദനക്ഷമതയെ സാരമായി ബാധിക്കുന്നുണ്ട്. സർവേയിൽ പങ്കെടുത്ത 51 ശതമാനം പേരും ജോലിസമയത്ത് ഒരു ദിവസം 15 മിനിറ്റെങ്കിലും സാമ്പത്തിക കാര്യങ്ങളെക്കുറിച്ച് ചിന്തിക്കാൻ ചെലവഴിക്കുന്നതായി സമ്മതിച്ചു, ഇത് 2024-ൽ 45 ശതമാനമായിരുന്നു. സാമ്പത്തിക സമ്മർദ്ദം കാരണം ജോലിസ്ഥലത്തെ പ്രകടനം മോശമായതായി നാലിലൊന്ന് തൊഴിലാളികളും അഭിപ്രായപ്പെട്ടു.
സാമ്പത്തിക സമ്മർദ്ദം കാരണം രാജ്യത്തിന് പ്രതിവർഷം 6,950 കോടി ഡോളറിന്റെ ഉത്പാദനക്ഷമത നഷ്ടം സംഭവിക്കുന്നുണ്ട്. 2024-നെ അപേക്ഷിച്ച് 1,560 കോടി ഡോളറിന്റെ വർധനവാണ് ഇതിലുണ്ടായിട്ടുള്ളത്. സാമ്പത്തിക സമ്മർദ്ദം കാരണം 47 ശതമാനം തൊഴിലാളികൾക്ക് ജോലിയിൽ താൽപ്പര്യം കുറഞ്ഞതായും, 28 ശതമാനം പേർക്ക് സഹപ്രവർത്തകരുമായി നല്ല ബന്ധം നിലനിർത്താൻ കഴിയുന്നില്ലെന്നും റിപ്പോർട്ടിൽ പറയുന്നു. 33 ശതമാനം പേർ ജോലിയിൽ നിന്ന് അവധിയെടുക്കുന്നതായും സർവേ കണ്ടെത്തി. മെയ് 6 മുതൽ മെയ് 20 വരെ 2,320 കനേഡിയൻ തൊഴിലാളികളെ ഉൾപ്പെടുത്തി ഓൺലൈനായിട്ടാണ് സർവേ നടത്തിയത്. ഇവരിൽ 75 ശതമാനം പേരും മുഴുവൻ സമയ തൊഴിലാളികളാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
