ടൊറന്റോ: പ്രധാനമന്ത്രി മാർക്ക് കാർണിയുടെ നേതൃത്വത്തിൽ നടക്കുന്ന കാനഡ ഇൻവെസ്റ്റ്മെന്റ് ഉച്ചകോടിക്ക് ടൊറന്റോയിൽ തുടക്കമായി. ലോകമെമ്പാടുമുള്ള പ്രമുഖ നിക്ഷേപകരും ഗ്ലോബൽ അസറ്റ് മാനേജർമാരും പങ്കെടുക്കുന്ന ഉച്ചകോടിക്കെതിരെ നഗരത്തിൽ വൻ പ്രതിഷേധങ്ങൾക്ക് സാധ്യതയുള്ളതിനാൽ ടൊറന്റോ പോലീസ് സുരക്ഷ ശക്തമാക്കിയിട്ടുണ്ട്. അക്രമങ്ങൾ, ഭീഷണികൾ, പൊതുമുതൽ നശിപ്പിക്കൽ തുടങ്ങിയ നിയമവിരുദ്ധ പ്രവർത്തനങ്ങൾ യാതൊരു കാരണവശാലും വെച്ചുപൊറുപ്പിക്കില്ലെന്നും കുറ്റകൃത്യങ്ങളിൽ ഏർപ്പെടുന്നവരെ ഉടൻ അറസ്റ്റ് ചെയ്യുമെന്നും പോലീസ് കർശന മുന്നറിയിപ്പ് നൽകി.
തിങ്കളാഴ്ച വൈകുന്നേരം ആർട്ട് ഗാലറി ഓഫ് ഒന്റാറിയോയിൽ നടക്കുന്ന അത്താഴവിരുന്നോടെയാണ് ഉച്ചകോടി ഔദ്യോഗികമായി ആരംഭിക്കുന്നത്. ഉച്ചകോടിയുടെ ഭാഗമായി, ചൊവ്വാഴ്ച യോർക്ക്വില്ലിലെ ഫോർ സീസൺസ് ഹോട്ടലിൽ നിക്ഷേപകർ പ്രധാനമന്ത്രിയുമായും മറ്റ് ഉന്നത ഉദ്യോഗസ്ഥരുമായും കൂടിക്കാഴ്ച നടത്തും. എന്നാൽ ആക്ടിവിസ്റ്റ് റെയ്ച്ചൽ സ്മോളിന്റെ നേതൃത്വത്തിൽ തിങ്കളാഴ്ച വൈകുന്നേരം 6 മണിക്ക് നാഥൻ ഫിലിപ്സ് സ്ക്വയറിൽ നിന്ന് ആയിരക്കണക്കിന് ആളുകളെ അണിനിരത്തി ആർട്ട് ഗാലറിയിലേക്ക് പ്രതിഷേധ മാർച്ച് നടത്താനാണ് സമരക്കാരുടെ തീരുമാനം. സമ്മേളനത്തിനെത്തുന്ന നിക്ഷേപകർക്കെതിരെ പ്രത്യക്ഷ ഇടപെടലുകൾ നടത്താൻ ചില ഗ്രൂപ്പുകൾ പദ്ധതിയിടുന്നതായും റിപ്പോർട്ടുകളുണ്ട്.
Also Read: ഐസ്ക്രീം മുതൽ പ്രതിരോധ മേഖല വരെ; താരിഫിനിടയിലും കാനഡയിൽ തദ്ദേശീയ വ്യവസായങ്ങൾക്ക് മുന്നേറ്റം
അടുത്ത അഞ്ച് വർഷത്തിനുള്ളിൽ കാനഡയിലേക്ക് 1 ട്രില്യൺ ഡോളറിന്റെ നിക്ഷേപം ആകർഷിക്കുക എന്ന ലക്ഷ്യത്തോടെയാണ് ഈ ഉച്ചകോടി സംഘടിപ്പിച്ചിരിക്കുന്നത്. കാനഡയിൽ ആവശ്യത്തിന് ഊർജ്ജവും വിഭവങ്ങളും സാങ്കേതികവിദ്യയും ലഭ്യമാണെന്നും ആഗോള നിക്ഷേപകർക്ക് രാജ്യം മികച്ച അവസരമാണ് ഒരുക്കുന്നതെന്നും ഉച്ചകോടിക്ക് മുന്നോടിയായി നടത്തിയ പ്രസംഗത്തിൽ പ്രധാനമന്ത്രി വ്യക്തമാക്കിയിരുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
