ഓട്ടവ: കാനഡയിൽ കഴിയുന്ന വിദേശതൊഴിലാളികൾക്കും കുടുംബങ്ങൾക്കും വലിയ ആശ്വാസമായിട്ടാണ് സർക്കാരിന്റെ പുതിയ ഇമിഗ്രേഷൻ നയം പുറത്തുവന്നത്. നിലവിൽ താത്കാലിക വിസയിൽ കഴിയുന്ന രണ്ട് ലക്ഷത്തോളം വ്യക്തികൾക്ക് സ്ഥിരതാമസം നൽകുന്നതിനുള്ള നിർണായക തീരുമാനവുമായിട്ടാണ് ഫെഡറൽ സർക്കാർ രംഗത്തെത്തിയത്. നവംബർ 5ന് പുറത്തുവന്ന ബജറ്റ് 2026-ന്റെ ഭാഗമായി കാനഡ ഇമിഗ്രേഷൻ വകുപ്പ് (IRCC) പ്രസിദ്ധീകരിച്ച ഏറ്റവും പുതിയ പദ്ധതിയിലൂടെയാണ് ഈ വലിയ പ്രഖ്യാപനം നടത്തിയിരിക്കുന്നത്.
പ്രതിവർഷം നിശ്ചയിച്ചിട്ടുള്ള 3,80,000 പിആർ ക്വാട്ടയ്ക്ക് പുറമെയാണ് ഈ 2 ലക്ഷം പേർക്ക് അധികമായി അനുമതി നൽകുന്നത്. ഈ ആനുകൂല്യം ലഭിക്കുന്നതിനായി യോഗ്യതയുള്ള വിദേശ പൗരന്മാർ പുതിയതായി യാതൊരു അപേക്ഷയോ നടപടികളോ സ്വീകരിക്കേണ്ടതില്ലെന്ന് സർക്കാർ വ്യക്തമാക്കിയിട്ടുണ്ട്.
ഈ പദ്ധതിയെ പ്രധാനമായും രണ്ട് വിഭാഗങ്ങളായാണ് തരംതിരിച്ചിരിക്കുന്നത്.
- ഇക്കണോമിക് കോഹോർട്ട്
ഈ വിഭാഗത്തിന് കീഴിൽ പ്രൊവിൻഷ്യൽ നോമിനി പ്രോഗ്രാം (PNP) വഴി തിരഞ്ഞെടുക്കപ്പെടുന്ന തൊഴിലാളികൾക്ക് മുൻഗണന ലഭിക്കും. കൂടാതെ സ്റ്റാർട്ട്-അപ്പ് വീസ, സെൽഫ് എംപ്ലോയ്ഡ് പേഴ്സൺസ് പ്രോഗ്രാം, അഗ്രി-ഫുഡ് പൈലറ്റ്, ഹോം കെയർ വർക്കേഴ്സ് പാത്ത്‌വേസ് തുടങ്ങിയ നിലവിലുള്ള ജനപ്രിയ സാമ്പത്തിക പദ്ധതികളിൽ അപേക്ഷ നൽകി കാത്തിരിക്കുന്നവർക്കും ഈ അവസരം ലഭ്യമാകും.
- ഫാമിലി & ഹ്യൂമാനിറ്റേറിയൻ കോഹോർട്ട്
കാനഡയിലെ പൗരന്മാരുടെയും പിആർ ഉടമകളുടെയും പങ്കാളികൾ (Spouses, Common-law partners), കുഞ്ഞുങ്ങൾ എന്നിവരുടെ അപേക്ഷകൾ ഇതിലൂടെ വേഗത്തിൽ തീർപ്പാക്കും. കൂടാതെ, ഹോങ്കോങ്, ഉക്രെയ്ൻ പൗരന്മാർക്കായുള്ള പ്രത്യേക പാത്ത്‌വേകളിൽ അപേക്ഷ സമർപ്പിച്ചവർക്കും തത്ത്വത്തിൽ അംഗീകാരം ലഭിച്ച (Approved-in-Principle) മാനുഷിക അപേക്ഷകർക്കും (Humanitarian & Compassionate applicants) ഇതിന്റെ പ്രയോജനം ലഭിക്കും.
Also Read: എക്സ്പ്രസ് എൻട്രിയിൽ നിർണ്ണായക മാറ്റം: LMIA ഒഴിവാക്കി; പകരം പുതിയ സംവിധാനം
രാജ്യത്തുള്ള പ്രതിഭകളെ നിലനിർത്താനും തൊഴിൽ രംഗത്തെ ക്ഷാമം പരിഹരിക്കാനും ലക്ഷ്യമിട്ടാണ് കാനഡയുടെ ഈ പുതിയ നീക്കം. കാനഡയിലുള്ള ഐടി, കെയർടേക്കർ, വിദഗ്ദ്ധ തൊഴിലാളികൾക്കും അവരുടെ കുടുംബങ്ങൾക്കും വലിയ പ്രതീക്ഷ നൽകുന്ന പ്രഖ്യാപനം കൂടിയാണിത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
