മോൺട്രിയളിൽ നടക്കുന്ന നിർണായകമായ കാനഡ-യൂറോപ്യൻ യൂണിയൻ (EU) ഉച്ചകോടിക്ക് മുന്നോടിയായി ഇരുവിഭാഗങ്ങളും തമ്മിലുള്ള നയതന്ത്ര സഹകരണം പുതിയ തലത്തിലേക്ക്. 27 അംഗ യൂറോപ്യൻ യൂണിയൻ കൂട്ടായ്മയിൽ കാനഡയ്ക്ക് ‘അസോസിയേറ്റ് അംഗത്വം’ (Associate Membership) നൽകുന്നതുമായി ബന്ധപ്പെട്ട സുപ്രധാന കരാറിന്റെ അന്തിമരൂപം അടുത്ത വർഷത്തോടെ പൂർത്തിയാക്കാനാണ് യൂറോപ്യൻ അധികൃതർ ലക്ഷ്യമിടുന്നത്. ഔദ്യോഗിക അംഗത്വമില്ലാതെ തന്നെ യൂറോപ്യൻ യൂണിയനുമായി ഒരു രാജ്യം സ്ഥാപിക്കുന്ന ഏറ്റവും അടുത്ത പങ്കാളിത്തമായിരിക്കും ഇത്. കാനഡയ്ക്ക് മാത്രമായി രൂപകൽപ്പന ചെയ്യുന്ന ഈ പ്രത്യേക പദവിയുടെ പ്രഖ്യാപനം നിലവിലെ ഉച്ചകോടിയിൽ ഉണ്ടാകാനിടയില്ലെങ്കിലും, അടുത്ത വർഷം നടക്കാനിരിക്കുന്ന ഉച്ചകോടിയോടെ കരാർ അംഗീകരിക്കാൻ കഴിയുമെന്നാണ് അധികൃതരുടെ വിലയിരുത്തൽ.
കഴിഞ്ഞ മാസം യൂറോപ്യൻ കമ്മീഷൻ പ്രസിഡന്റ് ഉർസുല വോൺ ഡെർ ലെയ്ൻ തന്റെ സ്റ്റേറ്റ് ഓഫ് ദി യൂണിയൻ പ്രസംഗത്തിലൂടെ കാനഡയ്ക്ക് യൂറോപ്യൻ യൂണിയന്റെ ആദ്യ അസോസിയേറ്റ് അംഗത്വം വാഗ്ദാനം ചെയ്തുകൊണ്ട് ഔദ്യോഗികമായി ക്ഷണിച്ചിരുന്നു. ഈ നിർദ്ദേശത്തെ കനേഡിയൻ പ്രധാനമന്ത്രി മാർക്ക് കാർണി പൂർണമായി സ്വാഗതം ചെയ്തു. പങ്കാളിത്തത്തിന് നൽകുന്ന പേരുകളേക്കാളുപരി, കനേഡിയൻ ജനതയ്ക്കും യുവാക്കൾക്കും പഠന-തൊഴിൽ-സഞ്ചാര മേഖലകളിൽ ലഭിക്കുന്ന വിശാലമായ അവസരങ്ങളും ഗവേഷകർക്കും ബിസിനസുകൾക്കും തുറന്നുകിട്ടുന്ന പുതിയ സാധ്യതകളുമാണ് പ്രധാനമെന്ന് പ്രധാനമന്ത്രി വ്യക്തമാക്കി. വ്യാപാരം, സാമ്പത്തികം, സുരക്ഷ എന്നിവയ്ക്ക് പ്രാധാന്യം നൽകുന്ന ഈ കരാർ കാനഡയുടെ പരമാധികാരത്തെ കൂടുതൽ ശക്തിപ്പെടുത്തുമെന്നാണ് യൂറോപ്യൻ യൂണിയനിലെ കനേഡിയൻ അംബാസഡർ ജോനാഥൻ വിൽക്കിൻസൺ വ്യക്തമാക്കിയത്.
അതേസമയം, ‘അസോസിയേറ്റ് അംഗത്വം’ എന്ന പദപ്രയോഗത്തെച്ചൊല്ലി യൂറോപ്യൻ യൂണിയനിലെ ചില അംഗരാജ്യങ്ങൾക്കിടയിൽ വിയോജിപ്പുകൾ നിലനിൽക്കുന്നുണ്ട്. യുക്രെയ്ൻ പോലുള്ള രാജ്യങ്ങളുമായുള്ള ബന്ധത്തെ സൂചിപ്പിക്കാൻ ഇതേ പദം ഉപയോഗിക്കാറുള്ളതിനാൽ, പുതിയ ആശയത്തിൽ 27 അംഗരാജ്യങ്ങൾക്കും ആലോചന ആവശ്യമാണെന്ന് കാനഡയിലെ ജർമ്മൻ അംബാസഡർ മത്തിയാസ് ലുട്ടൻബെർഗ് സൂചിപ്പിച്ചു. എന്നാൽ ഈ ആശങ്കകൾ കാനഡയ്ക്കെതിരല്ലെന്നും സദുദ്ദേശത്തോടെയുള്ള ചർച്ചകളാണ് നടക്കുന്നതെന്നും അദ്ദേഹം കൂട്ടിച്ചേർത്തു. കാനഡ-യൂറോപ്യൻ യൂണിയൻ സമഗ്ര സാമ്പത്തിക-വ്യാപാര കരാറിന്റെ (CETA) പത്താം വാർഷിക വേളയിലാണ് ഈ ഉച്ചകോടി നടക്കുന്നത് എന്ന പ്രത്യേകതയുമുണ്ട്.
അന്താരാഷ്ട്ര-ആഭ്യന്തര രാഷ്ട്രീയ തലങ്ങളിൽ ഈ നീക്കത്തിനെതിരെ വിമർശനങ്ങളും ഉയരുന്നുണ്ട്. യുണൈറ്റഡ് സ്റ്റേറ്റ്സുമായി വ്യാപാര തർക്കങ്ങൾ നിലനിൽക്കുന്ന പശ്ചാത്തലത്തിൽ, കാനഡയുടെ ഈ നീക്കത്തെ യു.എസ് പ്രസിഡന്റ് ഡൊണാൾഡ് ട്രംപ് രൂക്ഷമായി പരിഹസിക്കുകയും ഇതൊരു ശത്രുതാപരമായ നടപടിയായി കണക്കാക്കാമെന്ന് മുന്നറിയിപ്പ് നൽകുകയും ചെയ്തിരുന്നു. ആഭ്യന്തരമായി കാനഡയിലെ കൺസർവേറ്റീവ് പ്രതിപക്ഷ നേതാവ് പിയറി പൊയിലിയേവ്രും പദ്ധതിക്കെതിരെ രംഗത്തെത്തി. സ്വതന്ത്ര വ്യാപാരത്തെ സ്വാഗതം ചെയ്യുമ്പോഴും കാനഡയുടെ നിയമങ്ങൾ, നികുതിപ്പണം, കുടിയേറ്റ നയങ്ങൾ എന്നിവയുടെ മേലുള്ള പരമാധികാരം ഒരു കാരണവശാലും വിട്ടുകൊടുക്കരുതെന്നും, രാജ്യത്തെ ജീവിതച്ചെലവ് കുറയ്ക്കാനുള്ള സാമ്പത്തിക നയങ്ങൾക്കാണ് മുൻഗണന നൽകേണ്ടതെന്നും അദ്ദേഹം വാദിച്ചു.
Canada-EU Relations Deepen, Membership Deal Expected in 2027
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
