ഓട്ടവ: സാധാരണ ജോലിത്തിരക്കുകൾക്കിടയിൽ കൗതുകത്തിനായി പുതിയൊരു കാര്യം ചെയ്തു നോക്കിയ ഇന്ത്യൻ ദമ്പതിമാർക്ക് ലഭിച്ചത് വൻ തുക. കാനഡയിൽ സ്ഥിരതാമസമാക്കിയ റുമാൻ, തരുൺ എന്നീ ദമ്പതികളാണ് ഒരാഴ്ചത്തെ ഫുഡ് ഡെലിവറിയിലൂടെ 1 ലക്ഷത്തിലധികം ഇന്ത്യൻ രൂപ സ്വന്തമാക്കി ശ്രദ്ധ നേടുന്നത്. ‘ഉബർ ഈറ്റ്സ്’ വഴി ഭക്ഷണം ഡെലിവറി ചെയ്ത് ഏഴ് ദിവസം കൊണ്ട് 1 ലക്ഷം രൂപ സമ്പാദിക്കുക എന്നതായിരുന്നു ഇവരുടെ ലക്ഷ്യം. എന്നാൽ വെല്ലുവിളി അവസാനിച്ചപ്പോൾ ആകെ 1,447 കാനഡിയൻ ഡോളറാണ് (ഏകദേശം 1,02,013 ഇന്ത്യൻ രൂപ) ഇവർ വരുമാനമായി നേടിയത്. ഫുഡ് ഡെലിവറി തങ്ങളുടെ സ്ഥിരം ജോലിയല്ലെന്നും വിനോദത്തിനായാണ് ഇത് ചെയ്തുനോക്കിയതെന്നും ദമ്പതിമാർ ഇൻസ്റ്റാഗ്രാം വീഡിയോയിലൂടെ വ്യക്തമാക്കുന്നു.
നേട്ടത്തിനൊപ്പം ജോലിക്ക് വേണ്ടിവന്ന ചെലവുകളെക്കുറിച്ചും ഇരുവരും തുറന്നുപറയുന്നുണ്ട്. പ്രതിദിനം ശരാശരി 35 കനേഡിയൻ ഡോളർ (ഏകദേശം 2,467 രൂപ) ഇന്ധനത്തിനായി ചെലവായി. ഏഴ് ദിവസത്തേക്ക് ഇത് ആകെ 245 കനേഡിയൻ ഡോളർ വരും. ജോലി സമയത്ത് പുറത്തുനിന്ന് ഭക്ഷണം കഴിക്കാതെ വീട്ടിൽ നിന്ന് കൊണ്ടുവന്നതിനാൽ ഭക്ഷണച്ചെലവ് പൂജ്യമായി നിലനിർത്താൻ സാധിച്ചു. ആകെ വരുമാനത്തിൽ നിന്ന് ഇന്ധനച്ചെലവ് കഴിച്ചാൽ ബാക്കി 1,202 കനേഡിയൻ ഡോളർ ലാഭമായി ലഭിച്ചു.
ALSO READ: 8 ഡോളറുമായി കാനഡയിലെത്തിയ ഇന്ത്യക്കാരൻ; സെയിൽസ്മാനിൽ നിന്ന് ഐഡിബിഐ ബാങ്കിന്റെ അമരക്കാരനിലേക്ക്
കാനഡയിൽ ഫുഡ് ഡെലിവറി മേഖലയിൽ ജോലി ചെയ്യാൻ ആഗ്രഹിക്കുന്നവർക്കായി ചില പ്രധാന നിർദേശങ്ങളും ഇവർ പങ്കുവെക്കുന്നുണ്ട്. ദിവസവും 10 മുതൽ 11 മണിക്കൂർ വരെ ജോലി ചെയ്യാൻ തയ്യാറാണെങ്കിൽ ഏകദേശം 200 കനേഡിയൻ ഡോളർ വരെ സമ്പാദിക്കാൻ സാധിക്കും. എങ്കിലും ലഭിക്കുന്ന എല്ലാ ഓർഡറുകളും സ്വീകരിക്കരുത്. ചില ഓർഡറുകളിൽ കൂടുതൽ ദൂരം സഞ്ചരിക്കേണ്ടി വരുമെങ്കിലും വരുമാനം വളരെ കുറവായിരിക്കും. അതിനാൽ യാത്രയും സമയവും കണക്കാക്കി ലാഭകരമായ ഓർഡറുകൾ മാത്രം തിരഞ്ഞെടുക്കാൻ പരിചയസമ്പത്തിലൂടെ സാധിക്കും. ഏറെ മണിക്കൂറുകൾ നിരത്തിലിറങ്ങി കഠിനാധ്വാനം ചെയ്യാൻ തയ്യാറാണെങ്കിൽ ഇതൊരു മികച്ച അനുഭവമാണെന്ന് തെളിയിച്ചാണ് റുമാനും തരുണും തങ്ങളുടെ ഏഴ് ദിവസത്തെ ചലഞ്ച് അവസാനിപ്പിച്ചത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
