ന്യൂയോർക്ക്: അമേരിക്കയിൽ നിന്ന് ഭാവിയിൽ നേരിട്ടേക്കാവുന്ന സുരക്ഷാ ഭീഷണികളും അധിനിവേശ സാധ്യതകളും നേരിടുന്നതിനായുള്ള മുൻകരുതൽ പദ്ധതികൾ കാനഡ സർക്കാർ വിലയിരുത്തുന്നു. യു എസ്സുമായുള്ള നയതന്ത്ര ബന്ധത്തിൽ മാറ്റങ്ങൾ ദൃശ്യമാകുന്ന സാഹചര്യത്തിൽ, രാജ്യത്തിന്റെ സുരക്ഷ മുൻനിർത്തി ഇത്തരം റിസ്ക് മാനേജ്മെന്റ് നടപടികൾ സ്വാഭാവികമാണെന്ന് പ്രധാനമന്ത്രി മാർക്ക് കാർണി വ്യക്തമാക്കി.
അമേരിക്കൻ പ്രസിഡന്റ് ഡൊണാൾഡ് ട്രംപിന്റെ രണ്ടാം ഭരണകാലത്ത് കാനഡയ്ക്ക് മേൽ സാമ്പത്തിക സമ്മർദവും വ്യാപാര ഉപരോധ ഭീഷണികളും വർധിച്ചുവരികയാണ്. കാനഡയെ അമേരിക്കയുടെ ഭാഗമാക്കണമെന്ന തരത്തിലുള്ള ട്രംപിന്റെ മുൻ പ്രസ്താവനകളും പുതിയ താരിഫ് നയങ്ങളുമാണ് പ്രതിരോധ സാധ്യതകൾ പരിശോധിക്കാൻ കാനഡയെ പ്രേരിപ്പിച്ചത്. നേരിട്ടുള്ള സൈനിക നീക്കങ്ങൾക്ക് സാധ്യത കുറവാണെങ്കിലും സാമ്പത്തിക സഹകരണത്തിലും സുരക്ഷാ നയങ്ങളിലും വരുന്ന മാറ്റങ്ങൾ കാനഡ ഗൗരവത്തോടെയാണ് കാണുന്നത്.
ഇരുരാജ്യങ്ങളും നാറ്റോ (NATO), നോറാഡ് (NORAD) എന്നീ കൂട്ടായ്മകളിലൂടെ സംയുക്ത സുരക്ഷ പങ്കിടുന്നതിനാൽ ഒരു നേരിട്ടുള്ള യുദ്ധത്തിനുള്ള സാധ്യത വളരെ കുറവാണെന്ന് മുൻ സൈനിക ഉദ്യോഗസ്ഥർ ചൂണ്ടിക്കാണിക്കുന്നു. ആയുധങ്ങൾ ഉപയോഗിച്ചുള്ള ആക്രമണത്തേക്കാൾ ഉപരി സൈബർ ആക്രമണങ്ങൾ പോലുള്ള തന്ത്രങ്ങൾക്കാവും സാധ്യതയെന്ന് റോയൽ കനേഡിയൻ എയർഫോഴ്സ് മുൻ ഉദ്യോഗസ്ഥൻ ക്രിസ്റ്റഫർ കോറ്റ്സ് അഭിപ്രായപ്പെട്ടു. ഉഭയകക്ഷി ബന്ധത്തിൽ നിലനിൽക്കുന്ന ഈ അനിശ്ചിതത്വം ഇരുരാജ്യങ്ങൾക്കുമിടയിൽ ആശങ്ക സൃഷ്ടിക്കുന്നുണ്ട്.
മുമ്പും പല ഘട്ടങ്ങളിലും അമേരിക്കയിൽ നിന്നുള്ള കടന്നുകയറ്റങ്ങളെ കാനഡ പ്രതിരോധിച്ചിട്ടുള്ള ചരിത്രമുണ്ട്. 1775-ലും 1812-ലെ യുദ്ധകാലത്തും അതിർത്തി കടന്നുള്ള സൈനിക നീക്കങ്ങൾ നടന്നിട്ടുണ്ട്. ഒന്നാം ലോകമഹായുദ്ധത്തിന് ശേഷവും അമേരിക്കൻ വളർച്ചയെ പ്രതിരോധിക്കാൻ കാനഡ രഹസ്യ നിരീക്ഷണ പദ്ധതികൾ തയ്യാറാക്കിയിരുന്നു. ആഗോള രാഷ്ട്രീയത്തിൽ തങ്ങളുടെ പരമാധികാരം സംരക്ഷിക്കുക എന്നത് കാനഡയുടെ അടിസ്ഥാന നയത്തിന്റെ ഭാഗമാണ്.
ഏതെങ്കിലും സാഹചര്യത്തിൽ അമേരിക്കൻ ആക്രമണം ഉണ്ടായാൽ പരമ്പരാഗത യുദ്ധരീതികൾക്ക് പകരം ഗറില്ലാ മാതൃകയിലുള്ള പ്രതിരോധ തന്ത്രങ്ങളിലേക്ക് കാനഡ മാറുമെന്നാണ് പ്രതിരോധ വിദഗ്ധരുടെ കണക്കുകൂട്ടൽ. ഫ്രാൻസ്, ബ്രിട്ടൻ തുടങ്ങിയ സഖ്യരാജ്യങ്ങളുടെ നയതന്ത്ര പിന്തുണയും കാനഡ ഉറപ്പാക്കും. എന്നാൽ ഇങ്ങനെ ഒരു യുദ്ധം ഉണ്ടാകാൻ സാധ്യത വളരെ കുറവാണ്. കാരണം, അമേരിക്കയുടെയും കാനഡയുടെയും സൈനികർ എപ്പോഴും ഒരുമിച്ചാണ് പരിശീലനം നടത്തുന്നതും ജോലി ചെയ്യുന്നതും. അതുകൊണ്ടുതന്നെ, കാനഡയെ ആക്രമിക്കാൻ സ്വന്തം രാജ്യം ഉത്തരവിട്ടാലും, “ഇത് അനീതിയും തെറ്റുമാണ്” എന്ന് പറഞ്ഞ് അമേരിക്കൻ സൈനികർ തന്നെ ആ ഉത്തരവ് അനുസരിക്കാതിരിക്കാനോ രാജി വെക്കാനോ സാധ്യതയുണ്ടെന്ന് സുരക്ഷാ വിദഗ്ധൻ മാത്യു ഷ്മിറ്റ് ചൂണ്ടിക്കാണിക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
