ഓട്ടവ: വർഷത്തിൽ രണ്ടുതവണ ഘടികാരത്തിലെ സമയം മാറ്റുന്ന രീതിക്ക് കൂടുതൽ കനേഡിയൻ പ്രവിശ്യകൾ ഗുഡ്‌ബൈ പറയുമ്പോൾ, പുതിയ തീരുമാനം ജനങ്ങളുടെ ആരോഗ്യത്തെ എങ്ങനെ ബാധിക്കുമെന്ന ചർച്ച സജീവമാകുന്നു. ആൽബർട്ട, മാനിറ്റോബ, നോർത്ത് വെസ്റ്റ് ടെറിട്ടറീസ്, ബി.സി എന്നിവയാണ് വർഷത്തിൽ രണ്ടുതവണ സമയം മാറ്റുന്ന രീതി അവസാനിപ്പിക്കാൻ തീരുമാനിച്ചത്. ഒന്റാറിയോ, ക്യുബെക്, അറ്റ്ലാന്റിക് പ്രവിശ്യകൾ എന്നിവയിൽ നവംബർ ഒന്നിന് ഡേലൈറ്റ് സേവിങ് ടൈം അവസാനിക്കുന്നതോടെ സമയം ഒരു മണിക്കൂർ പുറകോട്ട് മാറ്റും. എന്നാൽ ക്യുബെക്കും ഘടികാരം മാറ്റുന്നത് അവസാനിപ്പിക്കാൻ ഒരുങ്ങുകയാണെന്ന് പ്രീമിയർ പോൾ സെന്റ് പിയറി പ്ലാമൊണ്ടൻ വ്യക്തമാക്കിയിട്ടുണ്ട്.
വർഷം മുഴുവൻ ഒറ്റ സമയം പിന്തുടരുന്നതിനെ ഉറക്ക ഗവേഷകർ സ്വാഗതം ചെയ്യുന്നുണ്ടെങ്കിലും, പ്രവിശ്യകൾ ഏത് സമയം തിരഞ്ഞെടുക്കുന്നു എന്നതിലാണ് ആരോഗ്യപരമായ ആശങ്കകൾ നിലനിൽക്കുന്നത്. വേനൽക്കാലത്തെ ഡേലൈറ്റ് സേവിങ് ടൈം സ്ഥിരമാക്കുന്നതിനേക്കാൾ, ശരത്കാലത്ത് തിരികെ പോകുന്ന സ്റ്റാൻഡേർഡ് ടൈം രീതി സ്ഥിരമായി പിന്തുടരുന്നതാണ് മനുഷ്യന്റെ ജൈവഘടികാരത്തിന് ഏറ്റവും അനുയോജ്യമെന്നാണ് ശാസ്ത്രജ്ഞർ ചൂണ്ടിക്കാട്ടുന്നത്. വസന്തകാലത്ത് സമയം ഒരു മണിക്കൂർ മുന്നോട്ട് മാറ്റുമ്പോൾ ആളുകൾക്ക് ഉറക്കം നഷ്ടപ്പെടുന്നത് ജൈവഘടികാരവും സൂര്യന്റെ സമയവും തമ്മിലുള്ള താളം തെറ്റിക്കുമെന്ന് ഓട്ടവ സർവകലാശാലയിലെ പ്രൊഫസർ ജോസഫ് ഡി കൊണിങ്ക് വ്യക്തമാക്കുന്നു.
രാവിലെ വൈകി മാത്രം സൂര്യപ്രകാശം ലഭിക്കുന്നത് മനുഷ്യശരീരത്തിന് ദോഷകരമാണെന്ന് കാൽഗറി സർവകലാശാലയിലെ മനഃശാസ്ത്ര വിഭാഗം മേധാവി മൈക്കൽ ആന്റിൽ പറയുന്നു. വടക്കൻ മേഖലകളിൽ സ്ഥിതി ചെയ്യുന്ന ആൽബെർട്ട പോലുള്ള സ്ഥലങ്ങളിൽ സ്ഥിരമായി ഡേലൈറ്റ് സേവിങ് ടൈം നടപ്പിലാക്കുമ്പോൾ മഞ്ഞുകാലത്ത് രാവിലെ 10 മണിക്ക് ശേഷമേ സൂര്യോദയം സാധ്യമാകൂ. വൈകി സൂര്യോദയം ഉണ്ടാകുമ്പോൾ ശരീരത്തിന്റെ സ്വാഭാവിക താളവും ജോലിയോ പഠനമോ ആവശ്യപ്പെടുന്ന സമയവും തമ്മിൽ വലിയ അന്തരം ഉണ്ടാകും. ഇത് ‘സോഷ്യൽ ജെറ്റ്‌ലാഗ്’ എന്ന അവസ്ഥയ്ക്ക് കാരണമാകുമെന്നും അദ്ദേഹം മുന്നറിയിപ്പ് നൽകുന്നു.
വൈകി സൂര്യാസ്തമയം സംഭവിക്കുന്ന പ്രദേശങ്ങളിലുള്ളവർക്ക് ഉറക്കം കുറയുന്നതായും അമിതവണ്ണം, പ്രമേഹം, ഹൃദ്രോഗങ്ങൾ എന്നിവയ്ക്ക് സാധ്യത കൂടുതലാണെന്നും പഠനങ്ങൾ വ്യക്തമാക്കുന്നു. മഞ്ഞുകാലത്ത് ഡേലൈറ്റ് സേവിങ് ടൈം സ്ഥിരമാക്കിയപ്പോൾ റഷ്യയിലെ യുവാക്കളിൽ വിഷാദരോഗം വർധിച്ചതായും ഗവേഷകർ ചൂണ്ടിക്കാട്ടുന്നു. ഇരുണ്ട രാവിലകൾ ഇതിനകം തന്നെ പ്രായോഗിക ബുദ്ധിമുട്ടുകൾ സൃഷ്ടിച്ചു തുടങ്ങി. ആൽബെർട്ടയിലെ ബോ വാലിയിലുള്ള സ്കീയിങ് കേന്ദ്രങ്ങളിൽ ജീവനക്കാർക്ക് വെളിച്ചത്തിൽ തയാറെടുപ്പുകൾ നടത്താനായി പ്രവർത്തന സമയം വൈകിപ്പിക്കേണ്ടി വന്നിട്ടുണ്ട്.
വിവിധ സമയക്രമങ്ങൾ പിന്തുടരുന്ന പ്രവിശ്യകളിലെ ആളുകളുടെ ശാരീരിക-മാനസിക ആരോഗ്യത്തെക്കുറിച്ച് പഠിക്കാൻ ഗവേഷകർ ഒരുങ്ങുകയാണ്. റോഡപകടങ്ങൾ, സ്കൂളുകളിലെ ഹാജർ നില, ജോലിസ്ഥലങ്ങളിലെ കൃത്യനിഷ്ഠ, മാനസികാരോഗ്യം എന്നിവയെല്ലാം ശാസ്ത്രജ്ഞർ നിരീക്ഷിക്കും. എന്നാൽ വരും വർഷങ്ങളിൽ കഠിനമായ മഞ്ഞുകാലത്ത് വൈകി മാത്രം സൂര്യനുദിക്കുന്നത് നേരിട്ട് അനുഭവിക്കുമ്പോൾ മാത്രമേ സ്ഥിരമായ ഡേലൈറ്റ് സേവിങ് സമയം കൊണ്ടുള്ള ബുദ്ധിമുട്ടുകൾ ജനങ്ങൾക്ക് പൂർണമായി ബോധ്യപ്പെടൂ എന്നാണ് വിദഗ്ധരുടെ വിലയിരുത്തൽ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
