ഒന്റാരിയോ; വിദേശത്ത് താമസിക്കുന്നവർക്ക് തങ്ങളുടെ മുൻതലമുറയിലെ ബന്ധങ്ങൾ വഴി ഇനി എളുപ്പത്തിൽ കനേഡിയൻ പൗരത്വം നേടാം. 2025 ഡിസംബർ 15-ന് മുമ്പ് ജനിച്ചവർക്ക് കാനഡക്കാരായ പൂർവ്വികരുടെ രേഖകൾ ഹാജരാക്കി പൗരത്വത്തിന് അപേക്ഷിക്കാമെന്ന് പുതിയ നിയമം വ്യക്തമാക്കുന്നു. തടസ്സമില്ലാത്ത ബന്ധം തെളിയിക്കുന്ന രേഖകൾ ഹാജരാക്കുകയാണ് ഇതിനായി ചെയ്യേണ്ടത്. ഇതിലൂടെ കനേഡിയൻ പാരമ്പര്യമുള്ള ആയിരക്കണക്കിന് ആളുകൾക്ക് പുതിയ അവസരം തുറക്കുകയാണ്.
രേഖകൾ കണ്ടെത്താൻ ഓൺലൈൻ ടൂളുകൾ സഹായിക്കും. പ്രമുഖ വെബ്‌സൈറ്റുകളായ ‘ഫാമിലിസെർച്ച്’, ‘ആൻസെസ്ട്രി’ എന്നിവയിൽ വിവരങ്ങൾ കിട്ടിയില്ലെങ്കിൽ ‘ന്യൂസ്‌പേപ്പേഴ്‌സ്.കോം’, ‘ജീനിയോളജി ക്യുബെക്’, ‘പി.ആർ.ഡി.എച്ച്’, ‘കനാഡിയാന ഹെറിറ്റേജ്’, ‘ഓട്ടോമേറ്റഡ് ജീനിയോളജി’ എന്നീ 5 ടൂളുകൾ ഉപയോഗിക്കാം. പഴയ പത്രങ്ങൾ, പള്ളി രജിസ്റ്ററുകൾ, ജനസംഖ്യാ കണക്കുകൾ എന്നിവയിൽ നിന്ന് കുടുംബാംഗങ്ങളുടെ ജനനം, വിവാഹം, മരണം എന്നിവയുടെ വിവരങ്ങൾ ലഭിക്കും.
ഈ ടൂളുകൾ വഴി കിട്ടുന്ന വിവരങ്ങൾ പ്രാഥമിക സൂചനകൾ മാത്രമാണ്. അപേക്ഷയ്ക്കായി ഔദ്യോഗിക ഓഫീസുകളിൽ നിന്നുള്ള അസ്സൽ രേഖകൾ തന്നെ വേണം. 2026 ജൂൺ മുതൽ സർട്ടിഫിക്കറ്റുകൾ അത് ആദ്യമായി നൽകിയ സർക്കാർ ഓഫീസിൽ നിന്ന് തന്നെ വാങ്ങണമെന്ന് നിർബന്ധമുണ്ട്. കൂടാതെ, 1994-ന് മുമ്പുള്ള ക്യുബെക് ജനന-വിവാഹ സർട്ടിഫിക്കറ്റുകൾ സ്വീകരിക്കില്ല.
ഏത് തലമുറയിലെ പൂർവ്വികൻ വഴിയാണ് അർഹതയെന്ന് അറിയാൻ ‘കാനഡവിസ’ വെബ്‌സൈറ്റിലെ കാൽക്കുലേറ്റർ സഹായിക്കും. തലമുറകൾ പുറകോട്ട് പോകുന്തോറും കൂടുതൽ രേഖകൾ വേണ്ടിവരുമെന്നതിനാൽ ആവശ്യമെങ്കിൽ വിദഗ്ദ്ധരുടെ സഹായവും തേടാം. ഒരാൾ കണ്ടെത്തുന്ന രേഖകൾ ഉപയോഗിച്ച് കുടുംബത്തിലെ മറ്റ് അംഗങ്ങൾക്കും പിന്നീട് അപേക്ഷ നൽകാനാകും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
