ഓട്ടവ: കാനഡയിലെ ഏഴ് പ്രവിശ്യകളിൽ വിറ്റഴിച്ച ‘അലാസ്കോ’ (Alasko) ബ്രാൻഡിന്റെ മരവിപ്പിച്ച റാസ്ബെറികളിൽ (Frozen Raspberries) വയറിളക്കത്തിനും ഛർദ്ദിക്കും കാരണമാകുന്ന നോറോവൈറസ് കണ്ടെത്തി. ഇതേത്തുടർന്ന് ഈ ഉൽപ്പന്നങ്ങൾ വിപണിയിൽ നിന്ന് അടിയന്തരമായി തിരിച്ചുവിളിക്കാൻ കാനഡ ഫുഡ് ഇൻസ്പെക്ഷൻ ഏജൻസി നിർദേശം നൽകി. കാനഡയിൽ അടുത്തകാലത്തുണ്ടായ ഭക്ഷ്യവിഷബാധയെക്കുറിച്ചുള്ള അന്വേഷണത്തിലാണ് ഈ വൈറസ് സാന്നിധ്യം പുറത്തുവന്നത്. ഉൽപ്പന്നം കഴിച്ച ചിലർക്ക് നിലവിൽ രോഗബാധ റിപ്പോർട്ട് ചെയ്തിട്ടുണ്ടെങ്കിലും, എവിടെയൊക്കെയാണ് രോഗം സ്ഥിരീകരിച്ചതെന്നോ എത്രപേർക്ക് ബാധിച്ചെന്നോ ഉള്ള വിവരങ്ങൾ പുറത്തുവിട്ടിട്ടില്ല.
പൊതുജനങ്ങൾക്കും ഹോട്ടലുകൾക്കും സ്ഥാപനങ്ങൾക്കുമായി വിതരണം ചെയ്ത 1 കിലോഗ്രാമിന്റെയും 5 കിലോഗ്രാമിന്റെയും പാക്കറ്റുകളാണ് തിരിച്ചുവിളിച്ചിട്ടുള്ളത്. 2027 നവംബർ 10 കാലാവധി (Best Before) ഉള്ളവയും, PO#138602, LOT# SY25314 എന്നീ കോഡുകളുള്ളതുമായ റാസ്ബെറികളാണ് ഉപയോഗിക്കരുതെന്ന് മുന്നറിയിപ്പുള്ളത്. ന്യൂ ബ്രൺസ്വിക്, ന്യൂഫൗണ്ട്ലാൻഡ് ആൻഡ് ലാബ്രഡോർ, നോവ സ്കോഷ്യ, പ്രിൻസ് എഡ്വേർഡ് ഐലൻഡ്, ക്യുബെക്, ഒന്റാറിയോ, മാനിറ്റോബ എന്നീ പ്രവിശ്യകളിലാണ് ഇവ വിറ്റഴിച്ചത്. കൈവശമുള്ള ഈ ഉൽപ്പന്നങ്ങൾ ഉപേക്ഷിക്കാനോ വാങ്ങിയ കടകളിൽ തിരികെ നൽകാനോ അധികൃതർ ആവശ്യപ്പെട്ടു.
പെട്ടെന്ന് പടരുന്ന വൈറസ് ബാധയായതിനാൽ ഇത് കഴിച്ചവർക്ക് അസ്വസ്ഥതയുണ്ടായാൽ ഉടൻ ഡോക്ടറെ കാണണം. വൈറസ് ഉള്ളിൽച്ചെന്ന് 12 മണിക്കൂറിനകം ഛർദ്ദി, വയറിളക്കം, വയറുവേദന, പനി, തലവേദന, പേശിവേദന തുടങ്ങിയ ലക്ഷണങ്ങൾ കാണിക്കാം. ഇതിന് പ്രത്യേക മരുന്നുകളില്ലെങ്കിലും സാധാരണയായി രണ്ടു മൂന്നു ദിവസത്തിനുള്ളിൽ രോഗം ഭേദമാകും. എന്നാൽ നിർജ്ജലീകരണം ഒഴിവാക്കാൻ ധാരാളം വെള്ളവും ദ്രാവകങ്ങളും കുടിക്കേണ്ടത് അത്യാവശ്യമാണ്. നിലവിൽ വിപണിയിൽ നിന്ന് ഈ പാക്കറ്റുകൾ പൂർണ്ണമായി മാറ്റുന്നുണ്ടെന്ന് അധികൃതർ ഉറപ്പുവരുത്തുന്നുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
