ഇനി വിമാനടിക്കറ്റിൽ ബസ് യാത്രയും! എയർ കാനഡയുടെ നയാഗ്ര-ടൊറന്റോ ലക്ഷ്വറി സർവീസിന് തുടക്കമായി

നയാഗ്ര: നയാഗ്ര മേഖലയിലുള്ളവർക്കും ഇവിടേക്ക് എത്തുന്ന വിനോദസഞ്ചാരികൾക്കും ടൊറന്റോ അന്താരാഷ്ട്ര വിമാനത്താവളത്തിലേക്ക് നേരിട്ട് കണക്റ്റിവിറ്റി ഉറപ്പാക്കുന്ന പുതിയ യാത്രാ സംവിധാനത്തിന് തുടക്കമായി. പ്രമുഖ ട്രാൻസ്പോർട്ട് കമ്പനിയായ ‘ദി ലാൻഡ്‌ലൈൻ കമ്പനി’യുമായി സഹകരിച്ച് എയർ കാനഡയാണ് നയാഗ്ര ഡിസ്ട്രിക്റ്റ് എയർപോർട്ടിൽ (YCM) നിന്ന് ടൊറന്റോ പിയേഴ്സൺ അന്താരാഷ്ട്ര വിമാനത്താവളത്തിലേക്ക് (YYZ) പുതിയ ലക്ഷ്വറി മോട്ടോർകോച്ച് സർവീസ് ആരംഭിച്ചത്. നയാഗ്ര-ഓൺ-ദി-ലേക്ക് വഴി ദിവസേന മൂന്ന് റൗണ്ട് സർവീസുകളാണ് നിലവിൽ പ്രഖ്യാപിച്ചിരിക്കുന്നത്.

യാത്രക്കാർക്ക് തങ്ങളുടെ എയർ കാനഡ വിമാന ടിക്കറ്റ് ബുക്ക് ചെയ്യുമ്പോൾ തന്നെ നയാഗ്ര എയർപോർട്ടിനെ യാത്രയുടെ തുടക്ക കേന്ദ്രമായോ അല്ലെങ്കിൽ അവസാന സ്റ്റേഷനായോ തിരഞ്ഞെടുക്കാം. വിമാന ടിക്കറ്റിനൊപ്പം അധിക തുകയൊന്നും ഈടാക്കാതെ ഒറ്റ റിസർവേഷനിൽ തന്നെ ഈ ബസ് യാത്രയും ഉൾപ്പെടുത്താം എന്നതാണ് ഇതിന്റെ ഏറ്റവും വലിയ പ്രത്യേകത.

നയാഗ്രയിൽ നിന്നുള്ള യാത്രക്കാർക്ക് ആഭ്യന്തര-അന്തർദേശീയ വിമാന യാത്രകൾ കൂടുതൽ ലളിതമാക്കാൻ ഈ സംയോജിത സർവീസ് സഹായിക്കും. യാത്രക്കാർക്ക് നയാഗ്ര എയർപോർട്ടിലെ സൗ ജന്യ പാർക്കിംഗ് സൗകര്യം പ്രയോജനപ്പെടുത്തി യാത്ര ആരംഭിക്കാം. ഇവിടെ വെച്ച് തന്നെ ചെക്ക്-ഇൻ പൂർത്തിയാക്കാനും ലഗേജുകളിൽ ടാഗ് പതിക്കാനും സാധിക്കും. തുടർന്ന് ആഡംബര ബസിൽ ടൊറന്റോ വിമാനത്താവളത്തിൽ എത്തിയ ശേഷം, വിമാനത്താവളത്തിലെ എക്സ്പ്രസ് ലഗേജ് ഡ്രോപ്പ് സംവിധാനം വഴി ബാഗേജുകൾ വേഗത്തിൽ കൈമാറി നേരിട്ട് സുരക്ഷാ പരിശോധനയിലേക്ക് കടക്കാം.

പുതിയ യാത്രാ സൗകര്യം നയാഗ്രയിലെ വിനോദസഞ്ചാര മേഖലയ്ക്കും വലിയ ഉണർവ് നൽകുമെന്നാണ് വിലയിരുത്തൽ. ടൊറന്റോ വഴി എത്തുന്ന സഞ്ചാരികൾക്ക് തങ്ങളുടെ അവസാന ലക്ഷ്യസ്ഥാനമായി നയാഗ്ര എയർപോർട്ട് ബുക്ക് ചെയ്ത് നേരിട്ട് ഈ ബസ് സർവീസിനെ ആശ്രയിക്കാം. ഇത് നയാഗ്രയിലെ പ്രശസ്തമായ ഹോട്ടലുകൾ, വിനോദകേന്ദ്രങ്ങൾ, വൈനറികൾ എന്നിവയ്ക്ക് തൊട്ടടുത്ത് സുരക്ഷിതമായി എത്തിച്ചേരാൻ സഹായിക്കും. നയാഗ്ര ഫാൾസിലെ മാരിയറ്റ് ഓൺ ദി ഫാൾസ് ഹോട്ടലിൽ ബസിന് പ്രത്യേക സ്റ്റോപ്പ് അനുവദിച്ചിട്ടുള്ളത് വിനോദസഞ്ചാരികൾക്ക് ഏറെ സൗകര്യപ്രദമാകും.

ഈ പുതിയ സേവനത്തിന്റെ ഉദ്ഘാടനത്തോടനുബന്ധിച്ച്, ആദ്യത്തെ 100 യാത്രക്കാർക്കായി നയാഗ്ര പാർക്സും ഹെൻറി ഓഫ് പെൽഹാം വൈനറിയും ചേർന്ന് പ്രത്യേക സമ്മാനപ്പൊതികൾ വിതരണം ചെയ്തു. അതിവേഗ സൗജന്യ വൈഫൈ, ചാർജിംഗ് പോർട്ടുകൾ, മികച്ച ലെഗ്‌റൂമുള്ള പുഷ്ബാക്ക് ലെതർ സീറ്റുകൾ തുടങ്ങി വൻ ആഡംബര സൗകര്യങ്ങളാണ് ഈ ബസുകളിൽ ഒരുക്കിയിട്ടുള്ളത്. ഇതിന് പുറമെ എയർലൈൻസിന്റെ എയറോപ്ലാൻ പോയിന്റുകൾ നേടാനുള്ള അവസരവും, വിമാന സമയങ്ങളിൽ മാറ്റമുണ്ടായാൽ യാത്ര സുരക്ഷിതമാക്കുന്ന ഇറ്റിനററി പ്രൊട്ടക്ഷനും ഈ പദ്ധതിയുടെ ഭാഗമായി യാത്രക്കാർക്ക് ലഭിക്കും.

Air Canada's Niagara-Toronto luxury bus service has begun