നയാഗ്ര ഫോൾസ്: നഗരത്തിൽ ഉപേക്ഷിക്കപ്പെട്ട നിലയിൽ കിടക്കുന്ന കെട്ടിടങ്ങൾ മൂലമുണ്ടാകുന്ന സുരക്ഷാ ഭീഷണികൾക്കും സാമൂഹിക പ്രശ്നങ്ങൾക്കും തടയിടാൻ ശക്തമായ നടപടിയുമായി നയാഗ്ര ഫോൾസ് സിറ്റി കൗൺസിൽ. ഒഴിഞ്ഞുകിടക്കുന്ന കെട്ടിടങ്ങൾ കൃത്യമായി നിരീക്ഷിക്കുന്നതിനും പരിപാലിക്കുന്നതിനുമായി പുതിയ ‘വേക്കന്റ് ബിൽഡിംഗ് രജിസ്ട്രി’ പ്രാബല്യത്തിൽ കൊണ്ടുവന്നു. കെട്ടിടങ്ങൾ നശിച്ചുപോകുന്നത് തടയാനും തീപിടുത്തം, സാമൂഹിക വിരുദ്ധരുടെ ശല്യം, എലി ഉൾപ്പെടെയുള്ള ജീവികളുടെ പ്രജനനം എന്നിവ ഒഴിവാക്കാനുമാണ് നഗരസഭ ഈ മുൻകരുതൽ നടപടി സ്വീകരിച്ചിരിക്കുന്നത്.
പുതിയ ഉത്തരവുപ്രകാരം ഒരു കെട്ടിടം ഒഴിഞ്ഞുകിടക്കാൻ തുടങ്ങി 60 ദിവസത്തിനുള്ളിൽ ഉടമസ്ഥർ സിറ്റിയുടെ ഔദ്യോഗിക പോർട്ടലിൽ രജിസ്റ്റർ ചെയ്യേണ്ടതുണ്ട്. ആദ്യ രജിസ്ട്രേഷനായി 350 ഡോളർ അഡ്മിനിസ്ട്രേഷൻ ഫീസും 1,000 ഡോളർ വാർഷിക ഫീസും ഉൾപ്പെടെ ആകെ 1,350 ഡോളറാണ് അടയ്ക്കേണ്ടത്. കെട്ടിടം തുടർന്നും ഒഴിഞ്ഞുകിടക്കുകയാണെങ്കിൽ ഓരോ വർഷവും 1,000 ഡോളർ വാർഷിക ഫീസായി നൽകണം. കൂടാതെ, കെട്ടിടത്തിന്റെ വാതിലുകളും ജനലുകളും പൂർണ്ണമായും അടച്ചുപൂട്ടി അപരിചിതർ പ്രവേശിക്കുന്നത് തടയാനും പരിസരം സുരക്ഷിതമായി സൂക്ഷിക്കാനും ഉടമസ്ഥർക്ക് പൂർണ്ണ ബാധ്യതയുണ്ടായിരിക്കും.
ALSO READ: കാനഡയിലേക്ക് പോകാൻ പ്ലാനുണ്ടോ? വിസ പ്രോസസ്സിംഗിൽ വലിയ മാറ്റങ്ങൾ, പുതിയ സമയപരിധി ഇങ്ങനെ
നിയമം പാലിക്കാത്ത കെട്ടിട ഉടമകൾക്കെതിരെ കടുത്ത ഭരണപരമായ നടപടികളും പിഴയും ചുമത്തും. സുരക്ഷാ മാനദണ്ഡങ്ങൾ പാലിക്കുന്നതുവരെ പരിശോധനയ്ക്കെത്തുന്ന ഉദ്യോഗസ്ഥരുടെ ഓരോ സന്ദർശനത്തിനും 500 ഡോളർ വീതം പിഴയീടാക്കാനാണ് തീരുമാനം. കെട്ടിട ഉടമകൾ സിറ്റിയുടെ ‘CityView’ പോർട്ടലിൽ മുൻകൂട്ടി അക്കൗണ്ട് സൃഷ്ടിച്ച് നടപടികൾ വേഗത്തിലാക്കണമെന്ന് അധികൃതർ അറിയിച്ചു. രജിസ്ട്രേഷൻ ഇളവുകളെക്കുറിച്ചും കൂടുതൽ വിശദാംശങ്ങളെക്കുറിച്ചും അറിയാൻ niagarafalls.ca എന്ന വെബ്സൈറ്റ് സന്ദർശിക്കാവുന്നതാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
