ക്രക്കോവ്: പോളണ്ടിലെ ക്രക്കോവ് നഗരത്തിലുണ്ടായ കൂട്ടവെടിവെപ്പിലെ മുഖപ്രതി ആശുപത്രിയിൽ മരിച്ചു. ശനിയാഴ്ച നടന്ന വെടിവെപ്പിൽ ആറ് പേർ കൊല്ലപ്പെടുകയും 15 പേർക്ക് പരിക്കേൽക്കുകയും ചെയ്തിരുന്നു. പ്രതിയുടെ മരണത്തോടെ ഇയാൾക്കെതിരായ വിചാരണ നടക്കില്ലെങ്കിലും ആക്രമണത്തിന്റെ കാരണവും മറ്റാർക്കെങ്കിലും പങ്കുണ്ടോയെന്നും കണ്ടെത്താനുള്ള അന്വേഷണം തുടരുമെന്ന് അധികൃതർ അറിയിച്ചു. സംഭവത്തിൽ ഭീകരവാദ ബന്ധമുണ്ടോയെന്നും പരിശോധിക്കുന്നുണ്ട്.
നഗരത്തിലെ പ്രധാന മാർക്കറ്റ് സ്ക്വയറിലാണ് ശനിയാഴ്ച വെടിവെപ്പുണ്ടായത്. പോലീസുമായുണ്ടായ ഏറ്റുമുട്ടലിൽ പരിക്കേറ്റ 24കാരനായ പ്രതി തിങ്കളാഴ്ചയാണ് മരിച്ചത്. വെടിവെപ്പിൽ പരിക്കേറ്റ രണ്ട് പോലീസ് ഉദ്യോഗസ്ഥർ ഉൾപ്പെടെയുള്ളവർ ചികിത്സയിലാണ്.
ALSO READ: China Building Fire ചൈനയിൽ ബഹുനില കെട്ടിടത്തിൽ വൻ തീപിടുത്തം: 14 മരണം, നിരവധി പേർക്ക് പരിക്ക്
ആക്രമണത്തിന് പിന്നിലെ ലക്ഷ്യം കണ്ടെത്തുന്നതിനൊപ്പം പ്രതിക്ക് മറ്റാരുടെയെങ്കിലും സഹായം ലഭിച്ചിരുന്നോയെന്നും പോലീസ് അന്വേഷിക്കുന്നുണ്ട്. പ്രതിയുടെ ഇലക്ട്രോണിക് ഉപകരണങ്ങളും ആയുധങ്ങളുടെ ഉറവിടവും പരിശോധിച്ചുവരികയാണ്.
ഇതിനിടെ, പ്രതിയുടെ പിതാവ് (53), മാതാവ് (52), സഹോദരി (21) എന്നിവരെയും വീട്ടിൽ മരിച്ച നിലയിൽ കണ്ടെത്തിയിരുന്നു. ഇവരുടെ മരണത്തിന് പിന്നിലും പ്രതിക്ക് പങ്കുണ്ടോയെന്ന് പോലീസ് അന്വേഷിക്കുന്നുണ്ട്.
ആക്രമണത്തിൽ കൊല്ലപ്പെട്ടവരിൽ 32കാരനായ ബ്രിട്ടീഷ് പൗരൻ ക്രിസ്റ്റോഫ് യാൻ ക്ലെകാർ, 51കാരിയായ ഓസ്ട്രിയൻ വനിത, 69കാരിയായ പോളിഷ് വനിത എന്നിവരും ഉൾപ്പെടുന്നു. പരിക്കേറ്റവരിൽ ബ്രിട്ടൻ, ഓസ്ട്രിയ, പോർച്ചുഗൽ, ജർമനി, റഷ്യ എന്നീ രാജ്യങ്ങളിൽ നിന്നുള്ളവരുമുണ്ട്.
പ്രതിക്ക് തീവ്ര വലതുപക്ഷ ആശയങ്ങളോട് താൽപര്യമുണ്ടായിരുന്നതായി ആഭ്യന്തര മന്ത്രി മാർസിൻ കിർവിൻസ്കി പറഞ്ഞു. പ്രതിക്കും പിതാവിനും തോക്ക് കൈവശം വയ്ക്കാനുള്ള ലൈസൻസ് ഉണ്ടായിരുന്നുവെന്ന് അധികൃതർ അറിയിച്ചു. ഇയാൾ പോളിഷ് സൈന്യത്തിൽ സേവനമനുഷ്ഠിച്ചിട്ടില്ലെന്നും വ്യക്തമാക്കി.
സംഭവത്തെ തുടർന്ന് പോളണ്ടിൽ രണ്ട് ദിവസത്തെ ഔദ്യോഗിക ദുഃഖാചരണം പ്രഖ്യാപിച്ചിരുന്നു. രാജ്യത്തെ ഔദ്യോഗിക കെട്ടിടങ്ങളിൽ ദേശീയ പതാക പകുതി താഴ്ത്തിക്കെട്ടി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
