നഗരഭരണത്തിൽ മാറ്റത്തിനൊരുങ്ങി നീയാഗ്ര-ഓൺ-ദി-ലേക്ക്; വികസന വാഗ്ദാനങ്ങളുമായി പുതിയ മേയർ

നയാഗ്ര: നയാഗ്ര-ഓൺ-ദി-ലേക്ക് ടൗൺഹാളിന്റെ പ്രവർത്തനങ്ങളിൽ സുതാര്യത ഉറപ്പാക്കുമെന്നും പ്രദേശത്തെ വെള്ളപ്പൊക്ക ഭീഷണിക്ക് പരിഹാരം കാണുമെന്നും നിയുക്ത ലോർഡ് മേയർ വോൺ ഗെറ്റ്‌ലർ. നവംബർ 24-ന് നടക്കുന്ന ഔദ്യോഗിക സത്യപ്രതിജ്ഞയ്ക്ക് മുന്നോടിയായി, നഗരസഭയിലെ കൗൺസിലർമാരുമായി നടത്തിയ പ്രാഥമിക കൂടിക്കാഴ്ചയിലാണ് ഭരണപരമായ തന്റെ കാഴ്ചപ്പാടുകൾ ഗെറ്റ്‌ലർ വ്യക്തമാക്കിയത്. ജനങ്ങളുമായി തുറന്ന ആശയവിനിമയം നടത്തുന്നതിനൊപ്പം അടിസ്ഥാന സൗകര്യ വികസനത്തിന് മുൻഗണന നൽകുന്ന രീതിയിലാകും പുതിയ ഭരണസമിതിയുടെ പ്രവർത്തനം.

കൗൺസിൽ യോഗങ്ങളിൽ വോട്ടെടുപ്പ് വിവരങ്ങൾ കൃത്യമായി രേഖപ്പെടുത്താൻ ഡിജിറ്റൽ സംവിധാനം വീണ്ടും നടപ്പിലാക്കുമെന്നും, ഈ വിവരങ്ങൾ പൊതുജനങ്ങൾക്ക് മുന്നിൽ ലഭ്യമാക്കുമെന്നും മേയർ വ്യക്തമാക്കി. ഭരണപരമായ കാര്യക്ഷമത വർദ്ധിപ്പിക്കുന്നതിന് കൗൺസിലർമാരും ജീവനക്കാരും യോഗ സമയങ്ങളിൽ മൊബൈൽ ഫോണുകളും സ്മാർട്ട് വാച്ചുകളും ഉപയോഗിക്കുന്നത് ഒഴിവാക്കണം. വിവരങ്ങൾ അറിയാൻ ജനങ്ങളും മാധ്യമങ്ങളും വിവരാവകാശ നിയമത്തെ മാത്രം ആശ്രയിക്കുന്ന രീതി അവസാനിപ്പിക്കുമെന്നും, ഫോൺ വിളികൾക്ക് 24 മണിക്കൂറിനുള്ളിൽ മറുപടി നൽകുന്നതടക്കമുള്ള സംവിധാനങ്ങൾ ഏർപ്പെടുത്തുമെന്നും അദ്ദേഹം അറിയിച്ചു.

നഗരത്തിലെ വെള്ളപ്പൊക്ക പ്രശ്നങ്ങൾ പരിഹരിക്കാനും അടിസ്ഥാന സൗകര്യങ്ങൾ ശക്തിപ്പെടുത്താനുമാണ് ഭരണസമിതി പ്രധാന പരിഗണന നൽകുന്നത്. നിലവിലെ അടിസ്ഥാന സൗകര്യങ്ങൾക്ക് താങ്ങാൻ കഴിയുമോ എന്ന് കൃത്യമായി പഠിച്ച ശേഷം മാത്രമേ പുതിയ വികസന പദ്ധതികൾക്ക് അനുമതി നൽകൂ. സെന്റ് ഡേവിഡ്‌സിലെ ഗ്രൈൻഡർ പമ്പുകൾ അടക്കമുള്ള സംവിധാനങ്ങളുടെ ശേഷി പരിശോധിക്കേണ്ടതുണ്ടെന്നും, അത്യാവശ്യമെങ്കിൽ നഗരത്തിലെ പുതിയ നിർമ്മാണ പ്രവർത്തനങ്ങൾക്ക് താൽക്കാലികമായി നിയന്ത്രണം ഏർപ്പെടുത്തുമെന്നും ഗെറ്റ്‌ലർ കൂട്ടിച്ചേർത്തു.

Also Read : എക്സ്പ്രസ് എൻട്രിയിൽ നിർണ്ണായക മാറ്റം: LMIA ഒഴിവാക്കി; പകരം പുതിയ സംവിധാനം

തിരഞ്ഞെടുപ്പ് വിജയത്തിന് ശേഷം പ്രതിപക്ഷ സ്ഥാനാർത്ഥിയായിരുന്ന എർവിൻ വീൻസും മുൻ ലോർഡ് മേയർ ഗാരി സലേപയും തന്നെ വിളിച്ച് പിന്തുണ അറിയിച്ചതായി ഗെറ്റ്‌ലർ വ്യക്തമാക്കി. തിരഞ്ഞെടുപ്പിൽ മറ്റ് സ്ഥാനാർത്ഥികളെ പിന്തുണച്ചവർക്കും തന്നിൽ തുല്യ അവകാശമുണ്ടെന്നും, ആരോടും വിദ്വേഷമില്ലാതെ എല്ലാവരുടെയും ആവശ്യങ്ങൾ പരിഗണിച്ച് നഗരത്തിന്റെ സർവ്വതോമുഖമായ വികസനത്തിനായി ഒത്തൊരുമിച്ച് പ്രവർത്തിക്കുമെന്നും അദ്ദേഹം കൂട്ടിച്ചേർത്തു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z