നയാഗ്ര: ക്വീൻ എലിസബത്ത് വേ (QEW) ഹൈവേയിൽ വാഹനാപകടം. സംഭവത്തിൽ ട്രക്ക് ഡ്രൈവർ മരിച്ചു. തോറോൾഡ് സ്റ്റോൺ, മൗണ്ടൻ റോഡുകൾക്കിടയിൽ ബുധനാഴ്ച ഉച്ചയ്ക്ക് 2:45-ഓടെയാണ് മൂന്ന് വാഹനങ്ങൾ തമ്മിൽ കൂട്ടിയിടിച്ചത്. അപകടത്തിൽ പരിക്കേറ്റ മറ്റൊരു ഡ്രൈവറെ എയർ ആംബുലൻസിൽ ആശുപത്രിയിലേക്ക് മാറ്റി. നിയന്ത്രണം വിട്ട ട്രെയ്‌ലർ ട്രക്ക് ഹൈവേയിലെ വലിയ ദിശാബോർഡിൽ ഇടിച്ചുകയറി റോഡിന് കുറുകെ കിടന്നതാണ് ഗതാഗതം പൂർണ്ണമായി തടസ്സപ്പെടാൻ കാരണം.
അപകട വിവരമറിഞ്ഞ് ഒന്റാറിയോ പ്രൊവിൻഷ്യൽ പോലീസ് സ്ഥലത്തെത്തി രക്ഷാപ്രവർത്തനങ്ങൾക്ക് നേതൃത്വം നൽകി. അപകട അന്വേഷണവും റോഡിന്റെ അറ്റകുറ്റപ്പണികളും പൂർത്തിയാക്കേണ്ടതിനാൽ ഹൈവേയിലെ ഗതാഗത നിരോധനം മണിക്കൂറുകളോളം തുടരുമെന്ന് പോലീസ് അറിയിച്ചു. തകർന്ന ഗാർഡ് റെയിലുകളും ദിശാബോർഡുകളും മാറ്റിയ ശേഷമേ റോഡ് തുറക്കൂ.
Also Read: തണ്ടർ ബേ ഇമിഗ്രേഷൻ ക്വാട്ട വെട്ടിച്ചുരുക്കി
അപകടത്തിന് തൊട്ടുമുമ്പ് ഇതുവഴി ഒരു വാഹനം അപകടകരമായി ഓടിച്ചുപോയതായി പോലീസിന് പരാതി ലഭിച്ചിട്ടുണ്ട്. ഈ വാഹനമാണോ അപകടമുണ്ടാക്കിയതെന്ന് അന്വേഷിക്കുകയാണ്. സംഭവ സമയം ഇതുവഴി പോയവരുടെ പക്കൽ ഡാഷ് ക്യാം ദൃശ്യങ്ങളോ മറ്റ് വിവരങ്ങളോ ഉണ്ടെങ്കിൽ ഉടൻ പോലീസിനെ അറിയിക്കണമെന്ന് സർജന്റ് കെറി ഷ്മിറ്റ് വ്യക്തമാക്കി. അപകടത്തിന്റെ കൃത്യമായ കാരണം കണ്ടെത്താൻ പോലീസ് അന്വേഷണം തുടരുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
