അങ്കാറ: അമേരിക്കയുമായുള്ള വ്യാപാര തർക്കം രൂക്ഷമായതോടെ, പുതിയ പങ്കാളികളെ തേടി കാനഡ. ഇതിന്റെ ഭാഗമായി കനേഡിയൻ പ്രധാനമന്ത്രി മാർക്ക് കാർണിയും തുർക്കി പ്രസിഡന്റ് റെസെപ് തയ്യിപ് എർദോഗനും വ്യാഴാഴ്ച അങ്കാറയിൽ വെച്ച് കൂടിക്കാഴ്ച നടത്തുകയും ഇരുരാജ്യങ്ങളും തമ്മിൽ പുതിയ തന്ത്രപ്രധാന പങ്കാളിത്തം പ്രഖ്യാപിക്കുകയും ചെയ്തു. വ്യാപാരം, പ്രതിരോധം, ഊർജ്ജം, സാംസ്കാരിക സഹകരണം എന്നീ നാല് മേഖലകളെ അടിസ്ഥാനമാക്കിയുള്ള മൂന്ന് വർഷത്തെ കർമ്മപദ്ധതിക്കാണ് ഇരുവരും തുടക്കമിട്ടത്.
അമേരിക്കൻ പ്രസിഡന്റ് ഡൊണാൾഡ് ട്രംപ് കനേഡിയൻ ഉൽപ്പന്നങ്ങൾക്ക് അധിക നികുതി ചുമത്തിയതും കാനഡയുടെ പരമാധികാരത്തെ ചോദ്യം ചെയ്തതുമാണ് പുതിയ വഴികൾ തേടാൻ കാനഡയെ പ്രേരിപ്പിച്ചത്. യു.എസിനെ മാത്രം അമിതമായി ആശ്രയിക്കുന്നത് കുറയ്ക്കുകയാണ് ഈ സന്ദർശനത്തിലൂടെ കാനഡ ലക്ഷ്യമിടുന്നത്. ഒരു കനേഡിയൻ പ്രധാനമന്ത്രി ആദ്യമായാണ് ഔദ്യോഗിക ആവശ്യങ്ങൾക്കായി തുർക്കി സന്ദർശിക്കുന്നത്.
നിലവിൽ 300 കോടി ഡോളറിലുള്ള ഉഭയകക്ഷി വ്യാപാരം ഉടൻ തന്നെ 500 കോടി ഡോളറായും പിന്നീട് 1,000 കോടി ഡോളറായും ഉയർത്താൻ ഇരുരാജ്യങ്ങളും തീരുമാനിച്ചു. ഇതിനായി ഈ വർഷം അവസാനത്തോടെ സ്വതന്ത്ര വ്യാപാര കരാറിനായുള്ള ചർച്ചകൾ ആരംഭിക്കും. ഇതിന്റെ ആദ്യഘട്ട യോഗം അടുത്ത മാസം അങ്കാറയിൽ നടക്കും.
ഇരുരാജ്യങ്ങളും തമ്മിൽ വർഷങ്ങളായി നിലനിന്നിരുന്ന അകൽച്ച അവസാനിച്ചതായും പുതിയൊരു സഹകരണ യുഗത്തിന് തുടക്കമായതായും എർദോഗൻ പറഞ്ഞു. പരസ്പര വിശ്വാസമുള്ള പങ്കാളികളിലൂടെ സാമ്പത്തിക ഭദ്രത ഉറപ്പാക്കുകയാണ് കാനഡയുടെ ലക്ഷ്യമെന്ന് കാർണിയും വ്യക്തമാക്കി. വ്യാപാര പ്രമുഖരുമായി സംസാരിക്കാനായി കാർണി ഇസ്താംബൂളിലേക്ക് തിരിക്കും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
