ഓട്ടവ: തൊഴില്ലായ്മ നിരക്ക് വർദ്ധിച്ചതിനെത്തുടർന്ന് കാനഡയിലെ 30 പ്രധാന നഗരങ്ങളിൽ കുറഞ്ഞ വേതനമുള്ള LMIA അപേക്ഷകളുടെ പ്രൊസസിംഗ് നിർത്തിവച്ചു. പ്രവിശ്യയിലെ ശരാശരി വേതനത്തേക്കാൾ കുറഞ്ഞ വേതനവും, തൊഴിൽ സ്ഥിതി ചെയ്യുന്ന നഗരത്തിൽ 6 ശതമാനമോ അതിൽ കൂടുതലോ തൊഴില്ലായ്മ നിരക്കുമുള്ള അപേക്ഷകളാണ് ഈ Refusal-to-Process നിബന്ധന പ്രകാരം തടയുന്നത്. എംപ്ലോയ്മെന്റ് ആൻഡ് സോഷ്യൽ ഡെവലപ്മെന്റ് കാനഡ (ESDC) വ്യക്തമാക്കിയ ഈ പുതിയ നിർദ്ദേശങ്ങൾ 2026 ഒക്ടോബർ 9 മുതൽ 2027 ജനുവരി 7 വരെയുള്ള അപേക്ഷകൾക്കാണ് ബാധകമാകുന്നത്. തൊഴില്ലായ്മ നിരക്ക് വർദ്ധിച്ചതിനെ തുടർന്ന് രാജ്യത്തെ 41 പ്രധാന സെൻസസ് മെട്രോപൊളിറ്റൻ ഏരിയകളിൽ (CMA) 30 ഇടങ്ങളിലും ഇനി കുറഞ്ഞ വേതന LMIA അപേക്ഷകൾ പ്രൊസസ് ചെയ്യില്ല.
കാനഡയിൽ നിലവിലുള്ള Refusal-to-Process നിബന്ധനയനുസരിച്ച് ഒരു തസ്തികയ്ക്ക് ഓഫർ ചെയ്യുന്ന വേതനം പ്രവിശ്യയിലെ മീഡിയൻ hourly വേതന പരിധിയേക്കാൾ കുറവായിരിക്കുകയും, തൊഴിൽ സ്ഥലം ഒരു CMA പരിധിയിൽ വരികയും, അവിടെയുള്ള തൊഴില്ലായ്മ നിരക്ക് 6 ശതമാനമോ അതിൽ കൂടുതലോ ആയിരിക്കുകയും ചെയ്താൽ ആ അപേക്ഷകൾ പ്രൊസസ് ചെയ്യപ്പെടില്ല. എന്നാൽ CMA പരിധിക്ക് പുറത്തുള്ള സ്ഥലങ്ങൾക്കും ഹൈ-വേജ് സ്ട്രീമിലുള്ള ജോലികൾക്കും ഈ വിലക്ക് ബാധകമല്ല.
ഈ സാമ്പത്തിക പാദത്തിൽ പുതിയതായി ആറ് നഗരങ്ങൾക്കൂടി തൊഴില്ലായ്മ നിരക്ക് 6 ശതമാന കടമ്പ കടന്നതോടെ വിലക്ക് പട്ടികയിൽ ഉൾപ്പെട്ടിട്ടുണ്ട്. ഹാലിഫാക്സ് (6.1%), ഫ്രെഡറിക്ടൺ (6.2%), കിംഗ്സ്റ്റൺ (6.3%), സെന്റ് കാതറിൻസ് – നയാഗ്ര (6.5%), റിജീന (6.7%), ലെത്ബ്രിഡ്ജ് (6.0%) എന്നിവയാണ് ആ പുതിയ പ്രദേശങ്ങൾ. അതേസമയം ബ്രിട്ടീഷ് കൊളംബിയയിലെ കാംലൂപ്സ് (3.6%), ചില്ലിവാക്ക് (5.6%) എന്നീ നഗരങ്ങളിൽ തൊഴില്ലായ്മ നിരക്ക് വൻതോതിൽ കുറഞ്ഞതിനാൽ അവിടെ കുറഞ്ഞ വേതന LMIA അപേക്ഷകൾ സ്വീകരിക്കുന്നത് പുനരാരംഭിച്ചിട്ടുണ്ട്. ഇതിനകം വിലക്കുള്ള വലിയ നഗരങ്ങളായ ഒഷാവ (9.8%), ലണ്ടൻ (9.1%), കെലോണ (8.6%), ഒട്ടാവ-ഗാറ്റിനോ (7.9%), എഡ്മണ്ടൻ (7.6%), ടൊറന്റോ (7.5%), മോൺട്രിയൽ (7.2%), കാൽഗറി (6.4%) എന്നിവിടങ്ങളിൽ നിരക്കുകൾ മുൻ പാദത്തേക്കാൾ ഉയരുകയോ ഉയർന്ന നിലയിൽ തുടരുകയോ ചെയ്യുകയാണ്.
Also Read: ഹീറ്റിംഗ് ചെലവുകൾ ഇനി കുറയും: 10 ലക്ഷം വീടുകളിൽ 2 ബില്യൺ ഡോളറിന്റെ നിക്ഷേപവുമായി ഫെഡറൽ സർക്കാർ
തൊഴില്ലായ്മ നിരക്ക് ഉയർന്ന പ്രദേശങ്ങളിലാണെങ്കിലും കാർഷിക മേഖല, കൺസ്ട്രക്ഷൻ (NAICS 23), ഭക്ഷ്യ സംസ്കരണം (NAICS 311), ഹോസ്പിറ്റലുകൾ (NAICS 622), നഴ്സിംഗ്-റെസിഡൻഷ്യൽ കെയർ (NAICS 623), വീട്ടുജോലികളിലുള്ള കെയർഗിവർമാർ, പെർമനന്റ് റെസിഡൻസി പ്രൊസസിംഗിന് മാത്രമുള്ള LMIAകൾ, 120 ദിവസത്തിൽ കുറവുള്ള ഹ്രസ്വകാല താൽക്കാലിക ജോലികൾ എന്നിവയ്ക്ക് ഈ നിരോധനത്തിൽ നിന്നും ഇളവുണ്ട്.നിലവിൽ കാനഡയിൽ സാധുതയുള്ള വർക്ക് പെർമിറ്റിൽ ജോലി ചെയ്യുന്ന വിദേശ തൊഴിലാളികളെ ഈ മാറ്റങ്ങൾ ബാധിക്കില്ല. എന്നാൽ പുതിയ വർക്ക് പെർമിറ്റ് അപേക്ഷിക്കുന്നവർക്കും നിലവിലെ പെർമിറ്റുകൾ പുതുക്കാൻ പുതിയ LMIA ആവശ്യമായി വരുന്നവർക്കും ഈ പുതിയ നിയന്ത്രണങ്ങൾ ബാധകമായിരിക്കും. സ്റ്റാറ്റിസ്റ്റിക്സ് കാനഡയുടെ അടുത്ത ഔദ്യോഗിക കണക്കുകൾ അടിസ്ഥാനമാക്കി 2027 ജനുവരി 7-നായിരിക്കും ഇതിന്റെ അടുത്ത റിവിഷൻ പുറത്തിറങ്ങുക.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
