ഷെർബ്രൂക്ക്: രാജ്യത്തെ പത്ത് ലക്ഷം വീടുകളിൽ ഊർജ്ജ ചെലവും മലിനീകരണവും കുറയ്ക്കുന്നതിനായി 2 ബില്യൺ ഡോളറിന്റെ നിക്ഷേപം പ്രഖ്യാപിച്ച് പ്രധാനമന്ത്രി മാർക്ക് കാർണി. ക്യുബെക്കിലെ ഷെർബ്രൂക്കിൽ നടന്ന ചടങ്ങിൽ ഒക്ടോബർ 8-നാണ് കാനഡ സർക്കാരിന്റെ പുതിയ വൈദ്യുതി നയത്തിന്റെ ഭാഗമായുള്ള ഈ പദ്ധതി പ്രഖ്യാപിച്ചത്. സാധാരണക്കാരായ ജനങ്ങൾക്ക് തണുപ്പുകാലത്തെ ഹീറ്റിംഗ് ചെലവുകൾ കുറയ്ക്കാനും വരും വർഷങ്ങളിൽ അന്തരീക്ഷ മലിനീകരണം വൻതോതിൽ നിയന്ത്രിക്കാനും ലക്ഷ്യമിട്ടാണ് ഫെഡറൽ സർക്കാർ ഈ നടപടി സ്വീകരിച്ചിരിക്കുന്നത്.
പുതിയ പദ്ധതിയുടെ ഭാഗമായി 8.2 ലക്ഷം കുടുംബങ്ങൾക്ക് കുറഞ്ഞ വൈദ്യുതിയിൽ പ്രവർത്തിക്കുന്ന ഇലക്ട്രിക് ഹീറ്റ് പമ്പുകൾ വാങ്ങാൻ സാമ്പത്തിക സഹായം സർക്കാർ നൽകും. ഇതിനായി ‘നാഷണൽ ഹീറ്റ് പമ്പ് റിബേറ്റ്’ എന്ന പേരിൽ പുതിയ പദ്ധതി ആരംഭിച്ചിട്ടുണ്ട്. സാധാരണ വരുമാനക്കാരായ കുടുംബങ്ങൾക്ക് ഹീറ്റ് പമ്പ് വാങ്ങാൻ 10,000 ഡോളർ വരെയും, അർഹരായ മറ്റു കുടുംബങ്ങൾക്ക് 2,000 ഡോളർ വരെയും സാമ്പത്തിക സഹായമായി ലഭിക്കും.
വീടുകളിലെ ഹീറ്റിംഗ് സിസ്റ്റങ്ങൾ പെട്ടെന്ന് കേടായാൽ ആളുകൾക്ക് ബുദ്ധിമുട്ടുണ്ടാകാതിരിക്കാൻ, 24 മണിക്കൂറിനുള്ളിൽ തന്നെ അപേക്ഷകൾ അംഗീകരിച്ചു നൽകുന്ന രീതിയിലാണ് ഈ പദ്ധതി തയാറാക്കിയിരിക്കുന്നത്. പഴയ ഓയിൽ, കറന്റ് ഫർണസുകളെ അപേക്ഷിച്ച് കൂടുതൽ സുരക്ഷിതവും പരിസ്ഥിതിക്ക് ദോഷം ചെയ്യാത്തതുമാണ് ഇത്തരം ഹീറ്റ് പമ്പുകൾ. ഇവ ഉപയോഗിക്കാൻ തുടങ്ങുന്നതോടെ ഒരു കുടുംബത്തിന് വർഷത്തിൽ ശരാശരി 1,400 ഡോളറോളം കറന്റ് ബില്ലിൽ ലാഭിക്കാൻ കഴിയും.
സ്വകാര്യ വീടുകൾക്ക് പുറമെ അടുത്ത എട്ട് വർഷത്തിനുള്ളിൽ 2,80,000 അപ്പാർട്ട്മെന്റ് യൂണിറ്റുകൾ പുതുക്കിപ്പണിയാനും പദ്ധതി ലക്ഷ്യമിടുന്നുണ്ട്. ഇതിനായി കാനഡ മോർട്ട്ഗേജ് ആൻഡ് ഹൗസിംഗ് കോർപ്പറേഷനും (CMHC) കാനഡ ഇൻഫ്രാസ്ട്രക്ചർ ബാങ്കും (CIB) സഹകരിച്ച് കെട്ടിട ഉടമകൾക്ക് താങ്ങാനാവുന്ന നിരക്കിൽ വായ്പകളും സാങ്കേതിക സഹായങ്ങളും ലഭ്യമാക്കും.
പത്ത് ലക്ഷം വീടുകളിൽ ഈ മാറ്റങ്ങൾ വരുത്തുന്നതിലൂടെ അന്തരീക്ഷത്തിലേക്ക് കലരുന്ന പുകയുടെയും കാർബണിന്റെയും അളവിൽ വലിയ കുറവുണ്ടാകും. ഇത് ഏകദേശം 85 ലക്ഷം കാറുകൾ ഒരു വർഷത്തേക്ക് റോഡിൽ നിന്ന് മാറ്റുമ്പോൾ ഉണ്ടാകുന്നത്ര വലിയ നേട്ടമാണ് പരിസ്ഥിതിക്ക് നൽകുന്നത്.
Also Read: വൈറ്റ് ഹൗസിലെ മാധ്യമ നിരോധനം: കേസ് തീർപ്പാകും വരെ വിലക്ക് തടയണമെന്ന് വാർത്താ ഏജൻസികൾ കോടതിയിൽ
2050 ആകുമ്പോഴേക്കും രാജ്യത്തെ കറന്റ് ഉത്പാദനം ഇരട്ടിയാക്കാനും പരിസ്ഥിതിക്ക് ദോഷമില്ലാത്ത ഊർജ്ജം ഉറപ്പാക്കാനുമായി 2026 മേയിലാണ് കാനഡ സർക്കാർ ‘പവറിംഗ് കാനഡ സ്ട്രോങ്’ എന്ന പദ്ധതിക്ക് തുടക്കമിട്ടത്. വീടുകളിലും ഫാക്ടറികളിലും കറന്റിന്റെ ഉപയോഗം കൂട്ടുന്നതിലൂടെ മലിനീകരണം വൻതോതിൽ കുറയ്ക്കാനും രാജ്യത്തിന്റെ സാമ്പത്തികരംഗം കൂടുതൽ ശക്തമാക്കാനും സാധിക്കുമെന്ന് പ്രധാനമന്ത്രി പറഞ്ഞു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
