ഓട്ടവ: നോർവീജിയൻ കടലിൽ കനേഡിയൻ നാവികസേനാ യുദ്ധക്കപ്പലിൽ സൈനിക വിമാനം അടിയന്തരമായി ഇറക്കുന്നതിനിടെ അപകടം. റോയൽ കനേഡിയൻ എയർഫോഴ്സിന്റെ (RCAF) CH-148 സൈക്ലോൺ ഹെലികോപ്റ്ററാണ് അപകടത്തിൽപ്പെട്ടത്. ഒക്ടോബർ 6-ന് ‘എച്ച്.എം.സി.എസ് വില്ലെ ഡി ക്യുബെക്’ (HMCS Ville de Québec) എന്ന ഫ്രിഗേറ്റിൽ ലാൻഡ് ചെയ്യുന്നതിനിടെയാണ് സംഭവം. എന്നാൽ ഹെലികോപ്റ്ററിലുണ്ടായിരുന്ന നാല് ജീവനക്കാരും പരിക്കുകളൊന്നുമില്ലാതെ അത്ഭുതകരമായി രക്ഷപ്പെട്ടു.
നാഷണൽ ഡിഫൻസ് ഡിപ്പാർട്ട്‌മെന്റ് പുറത്തുവിട്ട ഫ്ലൈറ്റ് സേഫ്റ്റി റിപ്പോർട്ടിലാണ് ഈ വിവരങ്ങൾ വ്യക്തമാക്കുന്നത്. ലാൻഡിംഗിനിടെ ഹെലികോപ്റ്ററിന്റെ പ്രധാന രണ്ട് റോട്ടർ ബ്ലേഡുകകൾ അതിന്റെ താഴ്ഭാഗത്ത് ഇടിക്കുകയും, ടെയിൽ റോട്ടർ ഡ്രൈവ് ഷാഫ്റ്റ് അടക്കമുള്ള പ്രധാന ഭാഗങ്ങൾ തകരുകയുമായിരുന്നു. അപകടം നടന്നയുടൻ നാല് ക്രൂ അംഗങ്ങളും ഹെലികോപ്റ്ററിന്റെ എഞ്ചിൻ അടിയന്തരമായി ഓഫാക്കി പുറത്തേക്ക് കടന്നതിനാൽ വലിയൊരു ദുരന്തം ഒഴിവായി.
കിഴക്കൻ യൂറോപ്പിൽ റഷ്യൻ അധിനിവേശം ചെറുക്കുന്നതിനുള്ള നാറ്റോയുടെ (NATO) ‘ഓപ്പറേഷൻ റീഅഷ്വറൻസിന്റെ’ ഭാഗമായി ജൂലൈ മാസം മുതൽ കടലിൽ സേവനം അനുഷ്ഠിച്ചു വരികയായിരുന്നു HMCS വില്ലെ ഡി ക്യുബെക്. സാങ്കേതിക തകരാറുകളൊന്നും ഇതുവരെ കണ്ടെത്തിയിട്ടില്ലെങ്കിലും വിശദമായ അന്വേഷണം നടന്നുവരികയാണെന്ന് അധികൃതർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
