വിന്നിപെഗ്: പ്രവിശ്യയിലെ അത്യാഹിത വിഭാഗങ്ങളിലെ പ്രതിസന്ധി പരിഹരിക്കുന്നതിനായി മാനിറ്റോബ സർവകലാശാലയിലെ എമർജൻസി മെഡിസിൻ റെസിഡൻസി സീറ്റുകളുടെ എണ്ണം വർദ്ധിപ്പിച്ചു. നിലവിലുണ്ടായിരുന്ന 11 സീറ്റുകളിൽ നിന്ന് 17 ആയാണ് പ്രവിശ്യാ ഭരണകൂടം ഉയർന്ന തലത്തിലുള്ള പരിശീലന അവസരങ്ങൾ വിപുലീകരിച്ചത്. ജൂലൈ 1 മുതൽ പ്രാബല്യത്തിൽ വന്ന ഉത്തരവിലൂടെ എമർജൻസി മെഡിസിൻ റെസിഡൻസി പ്രോഗ്രാമിൽ ഏഴ് സീറ്റുകളും, ഫാമിലി മെഡിസിൻ എൻഹാൻസ്ഡ് സ്കിൽസ് വിഭാഗത്തിൽ എട്ട് സീറ്റുകളും ഉറപ്പാക്കി. കൂടാതെ ബ്രാൻഡൻ കേന്ദ്രത്തിൽ രണ്ട് സീറ്റുകൾ തുടരുകയും ചെയ്യും.
പ്രവിശ്യയിൽ തന്നെ ഡോക്ടർമാർക്ക് മികച്ച പരിശീലനം നൽകി അവരെ ഇവിടെത്തന്നെ നിലനിർത്തുകയാണ് ഈ തീരുമാനത്തിലൂടെ സർക്കാർ ലക്ഷ്യമിടുന്നത്. യോഗ്യത നേടിയ എല്ലാ സ്ഥാനങ്ങളിലേക്കും ആദ്യ ഘട്ടത്തിൽ തന്നെ പ്രവേശനം പൂർത്തിയായി പരിശീലനം ആരംഭിച്ചതായി അധികൃതർ വ്യക്തമാക്കി. ഇവിടെത്തന്നെ പരിശീലനം നേടുന്നതിലൂടെ പ്രാദേശിക ചികിത്സാരംഗത്തെ ആവശ്യങ്ങൾ തിരിച്ചറിയാനും വിദഗ്ധ സേവനം പ്രവിശ്യയിൽ തന്നെ ലഭ്യമാക്കാനും സാധിക്കുമെന്ന് മാനിറ്റോബ ആരോഗ്യ മന്ത്രി ഉസോമ അസഗ്വാര വാർത്താ സമ്മേളനത്തിൽ വ്യക്തമാക്കി.
Also Read: സൂപ്പർകാറുകളും പ്രൈവറ്റ് ജെറ്റുകളും കാണാം; നയാഗ്രയിൽ ‘ദി എക്സോട്ടിക്സ് ഫെസ്റ്റിവൽ’ വരുന്നു
പുതിയ തസ്തികകൾ യാഥാർത്ഥ്യമായതോടെ അത്യാഹിത വിഭാഗങ്ങളിൽ അനുഭവപ്പെട്ടിരുന്ന ജീവനക്കാരുടെ കുറവിന് പരിഹാരമാകുമെന്ന് ഷെയേർഡ് ഹെൽത്ത് ഇടക്കാല പ്രസിഡന്റും സിഇഒയുമായ ഡോ. ക്രിസ് ക്രിസ്റ്റോഡൗലോ അറിയിച്ചു. രോഗികൾക്ക് സമയബന്ധിതമായ പരിശോധനയും രോഗനിർണ്ണയവും കൃത്യമായ ചികിത്സയും ഉറപ്പാക്കാൻ ഇത് സഹായിക്കും. അടിയന്തര പരിചരണം ആവശ്യമുള്ള ജനങ്ങൾക്ക് കൂടുതൽ മെച്ചപ്പെട്ടതും വേഗതയേറിയതുമായ ചികിത്സ ലഭിക്കാൻ ഈ നീക്കം വഴിയൊരുക്കുമെന്നും അദ്ദേഹം കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
