നയാഗ്ര: സെപ്റ്റംബർ 18, 19 തീയതികളിൽ നടക്കുന്ന ‘നയാഗ്ര 5000’ (Niagara 5000) പരിപാടിക്കായി നൂറുകണക്കിന് അപൂർവ സൂപ്പർകാറുകളും വിന്റേജ് വാഹനങ്ങളും നിയാഗ്ര ഫാൾസിലെത്തുന്നു. കാണികൾക്ക് പുതിയൊരു അനുഭവമൊരുക്കുന്ന ഈ വാരാന്ത്യ പരിപാടിയിൽ സൂപ്പർകാർ പരേഡ്, ക്രൂയിസ്, രുചിമേളകൾ, ഫാഷൻ ഷോകൾ, വിവിധ വിനോദ പരിപാടികൾ എന്നിവ ഉൾപ്പെടുത്തിയിട്ടുണ്ട്. പ്രമുഖ ഓട്ടോമൊബൈൽ കൂട്ടായ്മയായ @officialniagara5000 ആണ് പരിപാടിയുടെ പ്രധാന സംഘാടകർ.
പൊതുജനങ്ങൾക്ക് പൂർണ്ണമായും സൗജന്യമായി സന്ദർശിക്കാവുന്ന ‘ദി എക്സോട്ടിക്സ് ഫെസ്റ്റിവൽ’ (The Exotics Festival) ആണ് ഈ പരിപാടിയുടെ പ്രധാന ആകർഷണം. വൻകിട ആഡംബര കാറുകൾക്ക് പുറമെ പത്തിലധികം സ്വകാര്യ ജെറ്റ് വിമാനങ്ങളും ഇവിടെ പൊതുജനങ്ങൾക്കായി പ്രദർശിപ്പിക്കും. സാധാരണക്കാർക്കും കുടുംബങ്ങൾക്കും ഒരുപോലെ ആസ്വദിക്കാൻ സാധിക്കുന്ന രീതിയിലാണ് പ്രദർശന വേദി ക്രമീകരിച്ചിരിക്കുന്നത്.
Also Read: ഫോൺ കോളുകളിൽ കരുതൽ വേണം: വ്യാജ പോലീസ് നമ്പറുകൾ ഉപയോഗിച്ച് സമ്മർസൈഡിൽ വൻ തട്ടിപ്പ്
മെക് മാസ്റ്റർ ചിൽഡ്രൻസ് ഹോസ്പിറ്റലിന്റെ (McMaster Children’s Hospital) പ്രവർത്തനങ്ങൾക്കായുള്ള ധനശേഖരണവും ഈ പരിപാടിയുടെ ഭാഗമായി നടക്കും. പങ്കെടുക്കുന്ന ഡ്രൈവർമാരിൽ നിന്ന് ഈടാക്കുന്ന 300 ഡോളർ രജിസ്ട്രേഷൻ ഫീസിന്റെ പകുതി തുക ‘MacKids’ വഴി ചാരിറ്റി പ്രവർത്തനങ്ങൾക്ക് നൽകും. പൊതുജനങ്ങൾക്കുള്ള പ്രദർശനം തികച്ചും സൗജന്യമാണ്. എന്നാൽ മറ്റ് പ്രത്യേക പരിപാടികളിൽ പങ്കെടുക്കാൻ ഒരാൾക്ക് ഒരു ദിവസത്തേക്ക് നികുതി കൂടാതെ 300 ഡോളറിന്റെ പാസ്സ് ആവശ്യമാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
