ഓട്ടവ: കാനഡയിൽ നിലവിൽ ജോലി ചെയ്യുന്ന താൽക്കാലിക വിദേശ തൊഴിലാളികൾക്ക് ആറു മാസം വരെ സ്റ്റഡി പെർമിറ്റ് ഇല്ലാതെ പഠിക്കാൻ അനുമതി നൽകി ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) ഉത്തരവിറക്കി. രാജ്യത്തെ സാമ്പത്തിക വളർച്ച ശക്തിപ്പെടുത്തുന്നതിനും പ്രധാന മേഖലകളിലെ തൊഴിൽ ക്ഷാമം പരിഹരിക്കുന്നതിനുമായാണ് ഫെഡറൽ സർക്കാർ ഈ പുതിയ താൽക്കാലിക നടപടിക്ക് തുടക്കം കുറിച്ചത്. ആറ് മാസം വരെ ദൈർഘ്യമുള്ള കോഴ്സുകൾക്കും തൊഴിൽ പരിശീലനങ്ങൾക്കും പുതിയ നിർദ്ദേശം വഴി വേഗത്തിൽ പ്രവേശനം നേടാൻ സാധിക്കും.
തൊഴിലാളികൾക്കും വിവിധ മേഖലകൾക്കും നേട്ടം
പുതിയ ഇളവിലൂടെ ട്രേഡ്സ് തൊഴിലാളികൾ, നഴ്സുമാർ, ലബോറട്ടറി ടെക്നീഷ്യൻമാർ എന്നിവർക്ക് വലിയ പ്രയോജനം ലഭിക്കും. ഇവർക്ക് ജോലിയിൽ തുടരുന്നതോടൊപ്പം തന്നെ കാനഡയിലെ തൊഴിൽ വിപണിക്ക് ആവശ്യമായ അധിക കഴിവുകൾ വികസിപ്പിക്കാനും സാധിക്കും. കുറഞ്ഞ സമയത്തേക്കുള്ള ലൈസൻസിങ്, സ്കിൽ ട്രെയിനിങ് എന്നിവയ്ക്കായി മുൻപുണ്ടായിരുന്ന സങ്കീർണ്ണമായ ഭരണപരമായ നടപടികൾ ഇതോടെ ഇല്ലാതായിട്ടുണ്ട്. പൊതുസേവനങ്ങൾ, ഭവനനിർമാണം, വിവിധ വികസന പദ്ധതികൾ എന്നിവ കൂടുതൽ കാര്യക്ഷമമായി പൂർത്തിയാക്കാൻ ഇത് സഹായിക്കുമെന്നാണ് വിലയിരുത്തൽ.
Also Read : കാനഡയിലേക്ക് പോകാൻ പ്ലാനുണ്ടോ? വിസ പ്രോസസ്സിംഗിൽ വലിയ മാറ്റങ്ങൾ, പുതിയ സമയപരിധി ഇങ്ങനെ
നിയമം 2027 ഡിസംബർ വരെ പ്രാബല്യത്തിൽ
ഈ ഇളവ് 2027 ഡിസംബർ 31 വരെ നിലവിലുണ്ടാകുമെന്ന് അധികൃതർ അറിയിച്ചു. എന്നാൽ, ഫുൾ-ടൈം പഠനത്തിന് മുൻപത്തെപ്പോലെ സ്റ്റഡി പെർമിറ്റ് നിർബന്ധമാണ്. പുതിയ ആളുകൾക്ക് രാജ്യത്തേക്ക് വരാനുള്ള കുടിയേറ്റ മാർഗ്ഗമല്ല ഇതെന്നും, നിലവിൽ അവിടെയുള്ളവരുടെ സേവനം മെച്ചപ്പെടുത്താനാണ് ഇതെന്നും സർക്കാർ വ്യക്തമാക്കി. 2027-ഓടെ രാജ്യത്തെ താൽക്കാലിക ജനസംഖ്യ ആകെ ജനസംഖ്യയുടെ 5 ശതമാനത്തിൽ താഴെയായി കുറയ്ക്കാനുള്ള കാനഡയുടെ നയത്തിൽ മാറ്റമില്ലെന്നും അധികൃതർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
