വാഷിങ്ടൺ : വ്യാപാര സ്ഥാപനങ്ങളെ ലക്ഷ്യമിട്ട് പുതിയ ആർട്ടിഫിഷ്യൽ ഇന്റലിജൻസ് മോഡലായ ‘ജി.പി.ടി-6 ആസ്ട്ര’ (GPT-6 Astra) ഓപ്പൺഎഐ പുറത്തിറക്കി. ടാക്സ് ഫയലിംഗ്, ഗെയിം വികസനം, നിയമപരമായ മെമ്മോ തയ്യാറാക്കൽ തുടങ്ങിയ സങ്കീർണ്ണമായ ജോലികൾ വേഗത്തിൽ ചെയ്തുതീർക്കാൻ പുതിയ മോഡലിന് സാധിക്കുമെന്നാണ് കമ്പനി അവകാശപ്പെടുന്നത്. കഴിഞ്ഞ ജൂലൈയിൽ പുറത്തിറങ്ങിയ ജി.പി.ടി 5.6 സോളിന്റെ പിൻഗാമിയായാണ് ആസ്ട്രയുടെ വരവ്. ബിസിനസ്സ് ഉപഭോക്താക്കളെ ലക്ഷ്യമിട്ട് ആന്റ്രോപിക് അടക്കമുള്ള എതിരാളികളോട് മത്സരിക്കുന്നതിന്റെ ഭാഗമായാണ് പുതിയ അവതരണം.
എങ്കിലും, ആർട്ടിഫിഷ്യൽ ഇന്റലിജൻസ് ഏജന്റുകളുടെ സുരക്ഷയെ ചൊല്ലിയുള്ള ആശങ്കകൾ ശക്തമാകുന്നതിനിടയിലാണ് ഓപ്പൺഎഐയുടെ ഈ പുതിയ നീക്കം. മനുഷ്യരുടെ നിരീക്ഷണങ്ങളിൽ നിന്നും പരിശോധനകളിൽ നിന്നും രക്ഷപ്പെടാൻ പുതിയ മോഡൽ പലപ്പോഴും ശ്രമിക്കുന്നുണ്ടെന്ന് കമ്പനി വ്യക്തമാക്കുന്നു. സുരക്ഷിതമായ ഒരു പരിശോധനയ്ക്കിടെ ഓപ്പൺഎഐയുടെ ഏജന്റുകൾ സിസ്റ്റത്തിന്റെ നിയന്ത്രണം വിട്ട് പുറത്തുചാടുകയും, തെളിവുകൾ നശിപ്പിക്കാൻ ശ്രമിച്ചുകൊണ്ട് ‘ഹഗ്ഗിംഗ് ഫേസ്’ (Hugging Face) പ്ലാറ്റ്ഫോം ഹാക്ക് ചെയ്യുകയും ചെയ്തത് വലിയ ആശങ്കകൾക്ക് ഇടയാക്കിയിരുന്നു.
മനുഷ്യന്റെ ഇടപെടലുകൾ ഇല്ലാതെ സ്വയം പ്രവർത്തിക്കാൻ കഴിവുള്ള ‘ഏജന്റിക് എഐ’ (Agentic AI) സാങ്കേതികവിദ്യയാണ് നിലവിൽ നിക്ഷേപകരെ ആകർഷിക്കുന്നത്. എന്നാൽ ഇത്തരം സംവിധാനങ്ങൾ കൂടുതൽ കരുത്താർജ്ജിക്കുമ്പോൾ അവയുടെ പ്രവർത്തനം പൂർണ്ണമായി മനസ്സിലാക്കുക ബുദ്ധിമുട്ടാണെന്ന് ഓപ്പൺഎഐ ചീഫ് സയന്റിസ്റ്റ് യാക്കൂബ് പചോക്കി വ്യക്തമാക്കി. മോഡലുകൾ കൂടുതൽ മിടുക്കരാകുമ്പോൾ അവയെ നിയന്ത്രിക്കുന്നതിനുള്ള നമ്മുടെ രീതികൾ പര്യാപ്തമാകണമെന്നില്ലെന്നും അദ്ദേഹം കൂട്ടിച്ചേർത്തു.
സ്വയം പ്രവർത്തിക്കുന്ന ഇത്തരം സംവിധാനങ്ങൾ കമ്പനികളുടെ സിസ്റ്റത്തിലെ തകരാറുകൾ വേഗത്തിൽ കണ്ടെത്താൻ സഹായിക്കുമെങ്കിലും, ആ ബലഹീനതകൾ ദുരുപയോഗം ചെയ്യപ്പെടാനും ഇത് ഇടയാക്കുമെന്ന് കമ്പനി മുന്നറിയിപ്പ് നൽകുന്നുണ്ട്. സുരക്ഷാ പ്രശ്നങ്ങൾ ഒഴിവാക്കുന്നതിന്റെ ഭാഗമായി മോഡലുകൾക്കായി ‘ഓട്ടോമാറ്റഡ് ഷട്ട്ഡൗൺ’ സംവിധാനങ്ങൾ വികസിപ്പിച്ചുകൊണ്ടിരിക്കുകയാണെന്ന് അമേരിക്കൻ പ്രതിനിധി സഭയിലെ രണ്ട് അംഗങ്ങൾക്ക് അയച്ച കത്തിൽ ഓപ്പൺഎഐ വ്യക്തമാക്കിയിട്ടുണ്ട്.
Also Read : ഒരു വർഷം ഓൺലൈൻ ചൂഷണങ്ങൾക്ക് ഇരയായത് 20 മില്യൺ കുട്ടികൾ: റിപ്പോർട്ട്
നിലവിൽ തിരഞ്ഞെടുത്ത ചില ഉപഭോക്താക്കൾക്കായി ആസ്ട്ര ലഭ്യമാക്കിയിട്ടുണ്ട്. വരുന്ന ദിവസങ്ങളിൽ ഇത് കൂടുതൽ വ്യാപകമായി പുറത്തിറക്കുമെന്നും കമ്പനി അറിയിച്ചു. നിരീക്ഷണം കർശനമാക്കുന്നതിന്റെ ഭാഗമായി കഴിഞ്ഞ മാസം ചില മോഡലുകളുടെ വികസന പ്രവർത്തനങ്ങൾ ഓപ്പൺഎഐ താൽക്കാലികമായി നിർത്തിവെച്ചിരുന്നു. എങ്കിലും നിലവിലുള്ള സുരക്ഷാ ആശങ്കകൾക്കിടയിലും കമ്പനികൾക്കിടയിൽ സ്വാധീനം ഉറപ്പിക്കാനുള്ള തീവ്രശ്രമത്തിലാണ് ഓപ്പൺഎഐ ഇപ്പോൾ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
