ടെലിഗ്രാമിന്റെ 13-ാം വാർഷികത്തോട് അനുബന്ധിച്ച് ഗ്രൂപ്പുകളിലും ചാനലുകളിലും പുതുതായി ചേരുന്നവർക്കായി പ്രേത്യക സ്വാഗത സന്ദേശങ്ങൾ (Welcome Messages) സജ്ജീകരിക്കാൻ ഇനി അഡ്മിന്മാർക്ക് സാധിക്കും. പഴയ അംഗങ്ങൾക്ക് കാണാൻ സാധിക്കാത്ത വിധത്തിൽ ഒരുക്കുന്ന ഈ സന്ദേശങ്ങളിൽ ചിത്രങ്ങളും ഒന്നിലധികം മീഡിയ ഫയലുകളും ഉൾപ്പെടുത്താം. മൂന്നാം കക്ഷി ബോട്ടുകളുടെ സഹായമില്ലാതെ തന്നെ ചാനലിന്റെയോ ഗ്രൂപ്പിന്റെയോ പ്രൊഫൈൽ സെറ്റിങ്സിൽ നിന്ന് നേരിട്ട് ഇത് ക്രമീകരിക്കാൻ കഴിയും.
സന്ദേശങ്ങൾക്കുള്ളിൽ നേരിട്ട് ഇന്ററാക്ടീവ് ബട്ടണുകൾ ഉൾപ്പെടുത്താനുള്ള സൗകര്യം ഡെവലപ്പർമാർക്കായി ടെലിഗ്രാം അവതരിപ്പിച്ചു. ഇത് വഴി ഗ്രൂപ്പുകളിലും ചാനലുകളിലും സർവേകൾ, ഗെയിമുകൾ, ക്വിസുകൾ, ഉൽപ്പന്നങ്ങൾ ഓർഡർ ചെയ്യൽ തുടങ്ങിയവ ചാറ്റിനുള്ളിൽ തന്നെ തടസ്സമില്ലാതെ നടപ്പിലാക്കാം. ഒരേ ഗ്രൂപ്പിലെ വിവിധ ഉപയോക്താക്കൾക്ക് ഒരേസമയം വ്യത്യസ്ത തരത്തിലുള്ള ഗെയിമിംഗ് അനുഭവം നൽകാനും ഇതിലൂടെ സാധിക്കുന്നു.
സന്ദേശങ്ങൾ അയയ്ക്കുന്ന രീതിയിൽ വലിയ മാറ്റങ്ങൾ വരുത്തുന്നതാണ് പുതിയ റിച്ച് ടെക്സ്റ്റ് എഡിറ്റർ അപ്ഡേറ്റ്. ടെക്സ്റ്റ് ടൈപ്പ് ചെയ്യുന്നതിനോടൊപ്പം തന്നെ അതിനുള്ളിൽ ഡോക്യുമെന്റുകൾ, ഫയലുകൾ, മ്യൂസിക് എന്നിവ ചേർക്കാൻ ഇനി സാധിക്കും. മൂന്നിൽ കൂടുതൽ വരികൾ ടൈപ്പ് ചെയ്യുമ്പോൾ ലഭിക്കുന്ന വിപുലീകരിച്ച എഡിറ്റർ സൗകര്യം ഉപയോഗിച്ച് ഫയലുകൾ പ്രത്യേകം മെസ്സേജുകളായി അയക്കുന്ന രീതി ലളിതമാക്കാൻ സാധിക്കും.
ആപ്പിന്റെ പഴയ പതിപ്പുകൾ ഉപയോഗിക്കുന്നവർക്കായി പുതിയ അപ്ഡേറ്റ് ഡൗൺലോഡ് ചെയ്യാനുള്ള പ്ലേസ്ഹോൾഡർ നിർദേശങ്ങളും ടെലിഗ്രാം നൽകുന്നുണ്ട്. ഇതിനുപുറമേ, ടെലിഗ്രാം മാർക്കറ്റ്പ്ലേസ് വഴി ടെലിഗ്രാം സ്റ്റാറുകൾ ഉപയോഗിച്ച് വാങ്ങുന്ന അപൂർവ്വമായ കളക്റ്റബിൾ ഡിജിറ്റൽ സമ്മാനങ്ങൾ ഒപ്പും കമന്റും ചേർത്ത് മറ്റ് ഉപയോക്താക്കൾക്ക് അയക്കാനുള്ള പുതിയ ഫീച്ചറും ലഭ്യമാക്കിയിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
