ഓട്ടവ: വിദേശത്ത് ജനിക്കുന്ന കുട്ടികൾക്ക് പാരമ്പര്യമായി കനേഡിയൻ പൗരത്വം നൽകുന്നതിനായി (Citizenship-by-descent) മാതാപിതാക്കൾ പൂർത്തിയാക്കേണ്ട നിബന്ധനകളിലും അപേക്ഷാ ഫോമുകളിലും കാനഡയുടെ ഇമിഗ്രേഷൻ വിഭാഗം (IRCC) നിർണായക മാറ്റങ്ങൾ വരുത്തി. കാനഡയ്ക്ക് പുറത്ത് ജനിച്ച കനേഡിയൻ പൗരന്മാരായ മാതാപിതാക്കൾക്ക് ഇനി മുതൽ തങ്ങളുടെ വിദേശത്ത് ജനിക്കുന്ന കുട്ടിക്ക് പൗരത്വത്തിന് അർഹത നേടണമെങ്കിൽ കുറഞ്ഞത് 1,095 ദിവസം (ഏകദേശം മൂന്ന് വർഷം) കാനഡയിൽ ജീവിച്ചിരുന്നു എന്ന് തെളിയിക്കേണ്ടതുണ്ട്. ഇതിനായി സിറ്റിസൺഷിപ്പ് സർട്ടിഫിക്കറ്റ് അപേക്ഷാ ഫോം (CIT 0001), ഡോക്യുമെന്റ് ചെക്ക്ലിസ്റ്റ് (CIT 0014), ഫിസിക്കൽ പ്രസൻസ് ഫോം (CIT 0555), ഇൻസ്ട്രക്ഷൻ ഗൈഡ് എന്നിവ ഉൾപ്പെടെ നാല് പ്രധാന രേഖകളാണ് ഇമിഗ്രേഷൻ വിഭാഗം ഓഗസ്റ്റ് 25-ന് പുതുക്കി പ്രസിദ്ധീകരിച്ചത്. കാനഡയിലോ ഇന്ത്യ ഉൾപ്പെടെയുള്ള മറ്റ് വിദേശ രാജ്യങ്ങളിലോ താമസിക്കുന്ന കനേഡിയൻ മലയാളികൾക്കും മറ്റ് ഇന്ത്യൻ വംശജർക്കും ഏറെ നിർണായകമാണ് ഈ പുതിയ മാർഗ്ഗനിർദ്ദേശങ്ങൾ.
2025 ഡിസംബർ 15-നോ അതിനു ശേഷമോ കാനഡയ്ക്ക് പുറത്ത് ജനിക്കുന്ന കുട്ടികൾക്കാണ് ഈ പുതിയ നിബന്ധന ബാധകമാകുന്നത്. കുട്ടിയുടെ ജനനത്തിന് മുമ്പ് തന്നെ കാനഡയ്ക്ക് പുറത്ത് ജനിച്ച കനേഡിയൻ പൗരനായ മാതാപിതാക്കൾ കാനഡയിൽ നേരിട്ട് ഉണ്ടായിരുന്ന ദിവസങ്ങൾ വ്യക്തമായ തെളിവുകളോടെ സ്ഥാപിക്കേണ്ടതുണ്ട്. അതേസമയം, 2025 ഡിസംബർ 15-ന് മുമ്പ് ജനിച്ച കുട്ടികൾക്ക് ഈ ഭൗതിക സാന്നിധ്യ പരിശോധന (Physical presence test) ബാധകമല്ല. ബിൽ C-3 (Bill C-3) പ്രാബല്യത്തിൽ വന്നതോടെ അത്തരം കുട്ടികളുടെ കാര്യത്തിൽ മുൻപുണ്ടായിരുന്ന ഫസ്റ്റ് ജനറേഷൻ പരിധി നീക്കം ചെയ്തിട്ടുണ്ട്.
കാനഡയിൽ ഉണ്ടായിരുന്നെന്ന് തെളിയിക്കുന്നതിന് ആവശ്യമായ സാക്ഷ്യപത്രങ്ങളെക്കുറിച്ച് കൂടുതൽ വ്യക്തത പുതുക്കിയ അപേക്ഷാ പാക്കേജ് നൽകുന്നുണ്ട്. T4 സ്ലിപ്പുകൾ, സ്കൂൾ അല്ലെങ്കിൽ കോളേജ് ട്രാൻസ്ക്രിപ്റ്റുകൾ, പാസ്പോർട്ടിലെ എൻട്രി/എക്സിറ്റ് അടയാളങ്ങൾ, വാടക അല്ലെങ്കിൽ ഇൻഷുറൻസ് രേഖകൾ, ഔദ്യോഗിക സർക്കാർ രേഖകൾ എന്നിവ തെളിവായി സമർപ്പിക്കാം. ഇതിനുപുറമെ അംഗീകൃത വ്യക്തികളുടെയോ സ്ഥാപനങ്ങളുടെയോ സത്യവാങ്മൂലങ്ങളും സ്വീകരിക്കും. എന്നാൽ ഈ സത്യവാങ്മൂലങ്ങൾ അംഗീകൃത ഉദ്യോഗസ്ഥന് മുന്നിൽ സമർപ്പിച്ചതും നൽകുന്ന വ്യക്തിയുടെ വിലാസവും ഫോൺ നമ്പറും അടങ്ങിയതുമായിരിക്കണം. കുടുംബാംഗങ്ങൾ നൽകുന്ന സത്യവാങ്മൂലങ്ങൾ യാതൊരു കാരണവശാലും മൂന്നാം കക്ഷി തെളിവായി സ്വീകരിക്കില്ലെന്ന് ഇമിഗ്രേഷൻ വിഭാഗം വ്യക്തമാക്കിയിട്ടുണ്ട്. സമർപ്പിക്കുന്ന വിവരങ്ങൾ IRCC നേരിട്ട് പരിശോധിച്ച് ഉറപ്പുവരുത്തുകയും ചെയ്യും.
ALSO READ: കാനഡയിലെ വിദേശ തൊഴിലാളിയാണോ? ഓഗസ്റ്റിൽ പ്രാബല്യത്തിൽ വന്ന രണ്ട് നിർണായക നിയമങ്ങൾ അറിയാം
നിലവിൽ അപേക്ഷ സമർപ്പിച്ച് പ്രൊസസിംഗിലുള്ളവർക്ക് എന്തെങ്കിലും രേഖകൾ വിട്ടുപോയിട്ടുണ്ടെങ്കിൽ IRCC-യുടെ വെബ് ഫോം (Web Form) വഴി തങ്ങളുടെ അപേക്ഷാ നമ്പറും യൂണിക് ക്ലയന്റ് ഐഡന്റിഫയർ (UCI) നമ്പറും ഉപയോഗിച്ച് അവ പുതുതായി സമർപ്പിക്കാൻ സാധിക്കും. അപൂർണ്ണമായ അപേക്ഷകൾ നേരിട്ട് നിരസിക്കുന്നതിന് പകരം തിരികെ അയക്കുകയാണ് പതിവ്. വിദേശത്തുള്ള കനേഡിയൻ പൗരത്വമുള്ള കുടുംബങ്ങൾ ഭാവിയിൽ ഉണ്ടാകുന്ന കുട്ടികളുടെ പൗരത്വം ഉറപ്പാക്കാൻ തങ്ങൾ കാനഡയിൽ കഴിഞ്ഞ കാലയളവിന്റെ കൃത്യമായ രേഖകൾ സൂക്ഷിച്ചു വെക്കേണ്ടത് അത്യാവശ്യമാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
