ഒന്റാറിയോ ലണ്ടനിൽ ഫിറ്റ്‌നസ് സെന്ററിലേക്ക് കാർ ഇടിച്ചുകയറി വൻ അപകടം; ഏഴു സ്ത്രീകൾക്ക് പരിക്ക്, രണ്ടുപേരുടെ നില ഗുരുതരം

ലണ്ടൻ (ഒന്റാറിയോ): ഒന്റാറിയോയിലുള്ള ലണ്ടൻ നഗരത്തിൽ ഫിറ്റ്‌നസ് സെന്ററിന്റെ ചുവര് തകർത്ത് കാർ ഉള്ളിലേക്ക് ഇടിച്ചുകയറി ഏഴു സ്ത്രീകൾക്ക് ഗുരുതരമായി പരിക്കേറ്റു. വെള്ളിയാഴ്ച രാവിലെ ലണ്ടനിലെ ഷെർവുഡ് ഫോറസ്റ്റ് മാളിലുള്ള ‘ഗുഡ്‌ലൈഫ് ഫിറ്റ്‌നസ്’ സെന്ററിലാണ് സംഭവം. പരിക്കേറ്റവരിൽ രണ്ടുപേരുടെ നില അതീവ ഗുരുതരമാണെന്ന് ലണ്ടൻ പോലീസ് അറിയിച്ചു.

വെള്ളിയാഴ്ച രാവിലെ 7.40 ഓടെയായിരുന്നു നാടിനെ നടുക്കിയ അപകടം. മുപ്പതോളം പേർ പങ്കെടുത്ത ഫിറ്റ്‌നസ് ക്ലാസ് ആരംഭിച്ച സമയത്താണ് മാളിന്റെ പിൻഭാഗത്തെ ചുവരിലേക്ക് കാർ അമിതവേഗതയിൽ ഇടിച്ചുകയറിയത്. കെട്ടിടത്തിന്റെ ചുവര് പൂർണ്ണമായും തകർത്ത് കാർ ഉള്ളിലേക്ക് പ്രവേശിക്കുകയായിരുന്നു. പരിക്കേറ്റവരിൽ ഒരാൾ വാഹനത്തിനടിയിൽ കുടുങ്ങിപ്പോയതായും പിന്നീട് രക്ഷാപ്രവർത്തകർ എത്തിയാണ് ഇവരെ പുറത്തെടുത്തതെന്നും പോലീസ് സ്ഥിരീകരിച്ചു. ഗുരുതരാവസ്ഥയിലുള്ള രണ്ടുപേരിൽ ഒരാൾ വാഹനമോടിച്ചിരുന്ന സ്ത്രീയാണ്.

കെട്ടിടത്തിൽ നിന്നും 50 മീറ്റർ അകലെ പാർക്ക് ചെയ്തിരുന്ന വാഹനം പെട്ടെന്ന് അമിതവേഗതയിൽ പാർക്കിംഗ് ഏരിയയിലൂടെ പാഞ്ഞുചെന്ന് ചുവരിലേക്ക് ഇടിക്കുകയായിരുന്നുവെന്ന് ദൃക്‌സാക്ഷികൾ പറഞ്ഞു. സംഭവത്തിൽ അട്ടിമറിയോ ഭീകരവാദ ബന്ധമോ ഉള്ളതായി പ്രാഥമിക അന്വേഷണത്തിൽ സൂചനയില്ലെന്ന് ലണ്ടൻ പോലീസ് ചീഫ് തായ് ട്രൂങ് മാധ്യമങ്ങളോട് വ്യക്തമാക്കി. അപകടത്തിന് കാരണക്കാരിയായ ഡ്രൈവർക്കെതിരെ ക്രിമിനൽ കുറ്റങ്ങൾ ചുമത്തുമെന്നും അന്വേഷണം പുരോഗമിക്കുകയാണെന്നും അദ്ദേഹം കൂട്ടിച്ചേർത്തു.

അപകടത്തെത്തുടർന്ന് വൻതോതിൽ പരിക്കേറ്റവർ എത്തിയതോടെ ലണ്ടൻ ഹെൽത്ത് സയൻസസ് സെന്റർ (LHSC) രാവിലെ 11 മണിയോടെ ലെവൽ 1 'കോഡ് ഓറഞ്ച്' അടിയന്തരാവസ്ഥ പ്രഖ്യാപിച്ചു. പെട്ടെന്നുണ്ടാകുന്ന ദുരന്തങ്ങളെ നേരിടാൻ ആശുപത്രി സംവിധാനങ്ങളെ സജ്ജമാക്കുന്ന രീതിയാണിത്. അടിയന്തര സാഹചര്യമില്ലാത്ത രോഗികൾ ഒപി വിഭാഗത്തിൽ കാത്തിരിക്കേണ്ടി വരുമെന്നും, പകരമായി മറ്റ് വാക്ക്-ഇൻ ക്ലിനിക്കുകളെയോ ഹെൽത്ത് ലൈനുകളെയോ ആശ്രയിക്കണമെന്നും ആശുപത്രി അധികൃതർ പൊതുജനങ്ങൾക്ക് നിർദ്ദേശം നൽകിയിട്ടുണ്ട്. സംഭവസ്ഥലത്തുണ്ടായിരുന്ന സാക്ഷികൾ ആർക്കെങ്കിലും അപകടത്തെക്കുറിച്ച് കൂടുതൽ വിവരങ്ങൾ നൽകാനുണ്ടെങ്കിൽ പോലീസുമായി ബന്ധപ്പെടണമെന്ന് അധികൃതർ അറിയിച്ചു.

Major accident after car crashes into fitness center in London, Ontario

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt