കാനഡയിലെ താൽക്കാലിക വിദേശ തൊഴിലാളി പദ്ധതി: വിദഗ്ദ്ധർ ചൂണ്ടിക്കാട്ടുന്ന പ്രശ്നങ്ങളും നിർദ്ദേശങ്ങളും ഇതാ

കാനഡയിൽ താൽക്കാലിക വിദേശ തൊഴിലാളി പദ്ധതിയെച്ചൊല്ലിയുള്ള വിവാദങ്ങൾ തുടരുന്നു. യുവാക്കൾക്കിടയിലെ തൊഴിലില്ലായ്മ വർധിച്ചതിന് കാരണം ഈ പദ്ധതിയെന്ന് ആരോപണമുയർത്തി കൺസർവേറ്റീവ് നേതാവ് പിയറി പോളിയെവ് രംഗത്തെത്തിയതോടെയാണ് വിഷയം വീണ്ടും ചർച്ചയായത്. എന്നാൽ സാമ്പത്തിക വിദഗ്ദ്ധർ ഉൾപ്പെടെയുള്ള പലരും ഈ വാദത്തെ എതിർക്കുന്നുണ്ട്. യുവാക്കൾക്ക് തൊഴിൽ കണ്ടെത്താൻ കഴിയാത്തതും താത്കാലിക വിദേശ തൊഴിലാളി പദ്ധതിയും തമ്മിൽ നേരിട്ട് ബന്ധമില്ലെന്നാണ് ഇവരുടെ അഭിപ്രായം.

തൊഴിലുടമകൾക്ക് കനേഡിയൻ പൗരന്മാരെയോ സ്ഥിര താമസക്കാരെയോ ലഭ്യമല്ലാത്ത സാഹചര്യങ്ങളിൽ വിദേശ തൊഴിലാളികളെ ജോലിക്കെടുക്കാൻ അനുമതി നൽകുന്ന ഒരു പദ്ധതിയാണിത്. കാനഡയിൽ 2024-ൽ ഏകദേശം 2,38,157 താൽക്കാലിക വിദേശ തൊഴിലാളികൾക്ക് തൊഴിൽ ചെയ്യാനുള്ള അനുമതി ലഭിച്ചു. ഇത് 2018-ലെ കണക്കായ 1,08,988-ൽ നിന്നും വലിയ വർധനവാണ് കാണിക്കുന്നത്.

പദ്ധതിയുടെ പോരായ്മകൾ

കുറഞ്ഞ വേതനവും കുറഞ്ഞ സാങ്കേതിക വിദ്യയും

വിദേശ തൊഴിലാളികൾക്ക് കനേഡിയൻ പൗരന്മാർക്ക് നൽകുന്ന അതേ വേതനം നൽകണമെന്നാണ് നിയമമെങ്കിലും, കുറഞ്ഞ വേതനം ലഭിക്കുന്ന താൽക്കാലിക വിദേശ തൊഴിലാളികളുടെ സാന്നിധ്യം രാജ്യത്തെ ശമ്പള വളർച്ചയെ തടസ്സപ്പെടുത്തുന്നുണ്ടെന്ന് സാമ്പത്തിക വിദഗ്ദ്ധർ അഭിപ്രായപ്പെടുന്നു. പുതിയ സാങ്കേതിക വിദ്യകളിൽ നിക്ഷേപം നടത്തുന്നതിൽ നിന്നും ഇത് തൊഴിലുടമകളെ പിന്നോട്ട് വലിക്കുന്നുവെന്നും അവർ പറയുന്നു. തൊഴിലാളികളെ ലഭ്യമല്ലാത്ത സാഹചര്യത്തിൽ ശമ്പളം കൂട്ടുകയോ അല്ലെങ്കിൽ സാങ്കേതിക വിദ്യ ഉപയോഗിച്ച് ആവശ്യകത കുറയ്ക്കുകയോ ചെയ്യേണ്ടി വരും. എന്നാൽ, താൽക്കാലിക വിദേശ തൊഴിലാളി പദ്ധതി നിലവിലുള്ളതിനാൽ താരതമ്യേന കുറഞ്ഞ ശമ്പളത്തിൽ ആളുകളെ ലഭിക്കുന്നു. അതിനാൽ വേതനം കൂട്ടുകയോ സാങ്കേതിക വിദ്യയിൽ നിക്ഷേപം നടത്തുകയോ ചെയ്യേണ്ട ആവശ്യം തൊഴിലുടമകൾക്കില്ല.

എന്നാൽ, ഈ പദ്ധതി അവസാനിപ്പിച്ചാൽ കാനഡയിലെ പല ബിസിനസ്സുകളും അടച്ചുപൂട്ടേണ്ടി വരുമെന്നും ഇത് തൊഴിൽ നഷ്ടത്തിനും സാധനങ്ങളുടെ വില വർധനവിനും കാരണമാകുമെന്നും ബിസിനസ്സ്, വ്യവസായ ഗ്രൂപ്പുകൾ വാദിക്കുന്നു. നോവ സ്കോഷ്യയിലെ വിക്ടോറിയ കോ-ഓപ്പറേറ്റീവ് ഫിഷറീസ് ജനറൽ മാനേജർ ഓസ്ബോൺ ബർക്ക് തൻ്റെ സ്ഥാപനത്തിന് ആവശ്യത്തിന് തൊഴിലാളികളെ കണ്ടെത്താൻ സാധിക്കുന്നില്ലെന്ന് ചൂണ്ടിക്കാട്ടുന്നു. ശമ്പളം വർദ്ധിപ്പിച്ചിട്ടും ആവശ്യത്തിന് ആളുകളെ ലഭിക്കുന്നില്ലെന്നും, ഇല്ലാത്ത ആളുകളെ എങ്ങനെ ജോലിക്കെടുക്കുമെന്നും അദ്ദേഹം ചോദിക്കുന്നു.

അധികാര ദുർവിനിയോഗം

തൊഴിലാളികളുടെ വിസ ഒരു തൊഴിലുടമയുമായി ബന്ധിപ്പിച്ചിരിക്കുന്നതിനാൽ വലിയൊരു അധികാര ദുർവിനിയോഗ സാധ്യത ഈ പദ്ധതിയിലുണ്ട്. ജോലി നഷ്ടപ്പെട്ടാൽ രാജ്യം വിടേണ്ടി വരുമെന്നതിനാൽ പലരും ചൂഷണങ്ങൾ സഹിക്കാൻ നിർബന്ധിതരാകുന്നുവെന്ന് ഹ്യൂമൻ റിസോഴ്‌സ് പ്രൊഫസർ ജേസൺ ഫോസ്റ്റർ പറയുന്നു.

അതുപോലെ, പലരും ജോലികൾക്ക് വേണ്ടി കൺസൾട്ടന്റുമാർക്ക് വലിയ തുക നൽകുന്നു. തൊഴിലുടമകൾ രേഖകളിൽ ഉയർന്ന വേതനം കാണിക്കുകയും, അതിൽ വലിയൊരു ഭാഗം തിരികെ ആവശ്യപ്പെടുകയും ചെയ്യുന്ന സംഭവങ്ങളും റിപ്പോർട്ട് ചെയ്യപ്പെടുന്നുണ്ട്. അതേസമയം, ഈ രംഗത്തെ ഭൂരിഭാഗം ബിസിനസ്സ് ഉടമകളും നിയമങ്ങൾ പാലിക്കുന്നവരാണെന്ന് റെസ്റ്റോറന്റ്സ് കാനഡയുടെ സിഇഒ കെല്ലി ഹിഗ്ഗിൻസൺ പറഞ്ഞു. മോശമായ പ്രവണതകൾ പിന്തുടരുന്നവർക്ക് തങ്ങളുടെ വ്യവസായത്തിൽ സ്ഥാനമില്ലെന്നും അവർ കൂട്ടിച്ചേർത്തു.

പദ്ധതിയിലെ മാറ്റങ്ങൾ

ഈ പദ്ധതിയിൽ നിരവധി മാറ്റങ്ങൾ ആവശ്യമാണെന്ന് വിദഗ്ദ്ധർ ചൂണ്ടിക്കാട്ടുന്നു. താൽക്കാലിക വിദേശ തൊഴിലാളി പദ്ധതി പൂർണ്ണമായി ഒഴിവാക്കണമെന്ന് ചില സാമ്പത്തിക വിദഗ്ദ്ധർ നിർദ്ദേശിക്കുന്നു. ഘട്ടം ഘട്ടമായി ഇത് അവസാനിപ്പിക്കുകയും പകരം സ്ഥിരം കുടിയേറ്റ പ്രക്രിയ വേഗത്തിലാക്കുകയും വേണമെന്ന് അവർ പറയുന്നു.

എന്നാൽ, മറ്റ് ചിലർ പദ്ധതിയിൽ സമൂലമായ പരിഷ്‌കാരങ്ങൾ വേണമെന്ന് വാദിക്കുന്നു.

സർക്കാർ കൂടുതൽ ഇടപെടുക: ഏത് ബിസിനസ്സുകൾക്ക് വിദേശ തൊഴിലാളികളെ നിയമിക്കാൻ അനുമതി നൽകണം എന്ന് തീരുമാനിക്കുന്നതിൽ സർക്കാർ കൂടുതൽ കർശനമായ നിലപാട് സ്വീകരിക്കണം.

വിദേശ തൊഴിലാളികൾക്ക് തുറന്ന വർക്ക് പെർമിറ്റ് നൽകുക: തൊഴിലുടമയുമായി ബന്ധമില്ലാത്ത തുറന്ന പെർമിറ്റുകൾ നൽകിയാൽ ചൂഷണങ്ങൾ കുറയ്ക്കാൻ സാധിക്കും. ഇത് വഴി തൊഴിലാളികൾക്ക് ഇഷ്ടമുള്ള ജോലി തിരഞ്ഞെടുക്കാൻ സാധിക്കും.

കുടിയേറ്റത്തിന് കൂടുതൽ അവസരങ്ങൾ നൽകുക: പല താൽക്കാലിക വിദേശ തൊഴിലാളികളുടെയും ലക്ഷ്യം കാനഡയിൽ സ്ഥിരതാമസമാക്കുക എന്നതാണ്. അതിനാൽ, സ്ഥിരതാമസത്തിനുള്ള കൂടുതൽ വഴികളും അതിനുള്ള മാനദണ്ഡങ്ങളും സുതാര്യമാക്കണം.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

3 problems with the temporary foreign worker program and 3 possible fixes, according to experts