പൂനെ: പൂനെയിലെ പ്രശസ്തമായ ലോഹഗഡ് കോട്ടയിൽ പ്രീ-വെഡ്ഡിംഗ് ഫോട്ടോഷൂട്ടിനിടെ യുവാവ് താഴ്ചയിലേക്ക് വീണ് മരിച്ച സംഭവം ആസൂത്രിതമായ കൊലപാതകമാണെന്ന് കണ്ടെത്തി പോലീസ്. അപകടമരണമെന്ന നിഗമനത്തിൽ നിന്ന് മാറിയ പോലീസ്, വിശദമായ അന്വേഷണത്തിലാണ് 25-കാരനായ കേതൻ വിശാൽ അഗർവാളിനെ പ്രതിശ്രുത വധുവും കാമുകനും ചേർന്ന് തള്ളിയിട്ടു കൊന്നതാണെന്ന് സ്ഥിരീകരിച്ചത്. സംഭവവുമായി ബന്ധപ്പെട്ട് പ്രതിശ്രുത വധു സിയ ഗോയൽ (20), കാമുകൻ ചേതൻ ചൗധരി (22) എന്നിവരെ പോലീസ് അറസ്റ്റ് ചെയ്തു. വീട്ടുകാർ ഉറപ്പിച്ച വിവാഹത്തിന് താല്പര്യമില്ലാതിരുന്ന സിയ, കാമുകനൊപ്പം ജീവിക്കാൻ വേണ്ടിയാണ് ഈ ക്രൂരകൃത്യം ആസൂത്രണം ചെയ്തതെന്ന് പോലീസ് വ്യക്തമാക്കി.
അടുത്ത മാസം നടക്കാനിരിക്കുന്ന വിവാഹത്തിന് മുന്നോടിയായി സിയയുടെ ജന്മദിനം ആഘോഷിക്കാനാണ് ജൂൺ 19-ന് സംഘം കോട്ടയിലെത്തിയത്. ഫോട്ടോയെടുക്കുന്നതിനിടെ കേതൻ 350 അടി താഴ്ചയിലേക്ക് കാൽവഴുതി വീണെന്നാണ് സിയ ആദ്യം പോലീസിനോട് പറഞ്ഞിരുന്നത്. എന്നാൽ, ചോദ്യം ചെയ്യലിൽ സിയ നൽകിയ മൊഴികളിലെ വൈരുദ്ധ്യവും സംശയകരമായ പെരുമാറ്റവും അന്വേഷണത്തിന്റെ ദിശ മാറ്റി. തുടർന്ന് പോലീസ് ഇവരുടെ മൊബൈൽ ഫോൺ രേഖകളും സോഷ്യൽ മീഡിയ സന്ദേശങ്ങളും ഡിജിറ്റൽ തെളിവുകളും പരിശോധിച്ചതോടെയാണ് കൊലപാതകത്തിന്റെ ചുരുളഴിഞ്ഞത്. സിയയുടെ രഹസ്യ നിർദ്ദേശപ്രകാരം കോട്ടയിലെത്തിയ ചേതൻ ചൗധരിയും സിയയും ചേർന്ന് കേതനെ താഴ്ചയിലേക്ക് തള്ളിയിടുകയായിരുന്നു.
കേതനെ കൊലപ്പെടുത്താൻ പ്രതികൾ ഇതിനു മുൻപും ശ്രമിച്ചിരുന്നതായി പോലീസ് അന്വേഷണത്തിൽ വ്യക്തമായിട്ടുണ്ട്. ജൂൺ 14-ന് ഇതേ കോട്ടയിൽ വെച്ച് പാമ്പ് വരുന്നുണ്ടെന്ന് ഭയപ്പെടുത്തി കേതനെ താഴേക്ക് തള്ളിയിടാൻ ശ്രമിച്ചെങ്കിലും അന്ന് പരാജയപ്പെടുകയായിരുന്നു. വിവാഹത്തിന് മുന്നോടിയായി ഇരുവരും നടത്താനിരുന്ന ബാലി യാത്ര മുടക്കാൻ സിയ സ്വന്തം പാസ്പോർട്ട് കീറിക്കളഞ്ഞതായും പോലീസ് കണ്ടെത്തി. കേതൻ അഗർവാളിന്റെ മരണത്തിന് പിന്നിലെ എല്ലാ ആസൂത്രണങ്ങളും പുറത്തുകൊണ്ടുവന്ന പൂനെ പോലീസ്, പ്രതികൾക്കെതിരെ കൊലക്കുറ്റം ചുമത്തി കൂടുതൽ അന്വേഷണം നടത്തിവരികയാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Young man pushed off a fort during a pre-wedding photoshoot; fiancée and boyfriend arrested
