ഉപയോക്താക്കളുടെ സ്വകാര്യത വർധിപ്പിക്കുന്നതിന്റെ ഭാഗമായി ഫോൺ നമ്പറിന് പകരം യൂസർനെയിം ഉപയോഗിക്കാനുള്ള പുതിയ ഫീച്ചർ അവതരിപ്പിച്ച് വാട്സാപ്പ്. നിലവിൽ ഇന്ത്യയിലെ തിരഞ്ഞെടുത്ത ഉപയോക്താക്കൾക്ക് പരീക്ഷണാടിസ്ഥാനത്തിൽ ഈ സേവനം ലഭ്യമാക്കി തുടങ്ങിയതായാണ് റിപ്പോർട്ടുകൾ സൂചിപ്പിക്കുന്നത്.
ആശയവിനിമയത്തിനായി ഫോൺ നമ്പർ മറ്റുള്ളവർക്ക് നൽകേണ്ടി വരുന്ന രീതിക്ക് മാറ്റം വരുത്താനാണ് മെറ്റയുടെ ഉടമസ്ഥതയിലുള്ള വാട്സാപ്പ് ലക്ഷ്യമിടുന്നത്. നിലവിൽ ഒരാളുമായി ചാറ്റ് ചെയ്യണമെങ്കിൽ മൊബൈൽ നമ്പർ കൈമാറേണ്ടതുണ്ട്. എന്നാൽ പുതിയ ഫീച്ചർ വരുന്നതോടെ ഇൻസ്റ്റാഗ്രാം, ഫേസ്ബുക്ക് എന്നിവയിലേതുപോലെ ഒരു പ്രത്യേക യൂസർനെയിം വഴി മറ്റൊരാൾക്ക് നിങ്ങളെ കണ്ടെത്താനാകും. അപരിചിതർക്ക് ഫോൺ നമ്പർ നൽകാൻ ആഗ്രഹിക്കാത്തവർക്ക് ഈ സംവിധാനം ഏറെ ഗുണകരമാകും.
നിങ്ങളുടെ അക്കൗണ്ടിൽ ഈ ഫീച്ചർ ലഭ്യമാണോ എന്നറിയാൻ വാട്സാപ്പ് സെറ്റിങ്സ് മെനു പരിശോധിക്കാവുന്നതാണ്. അവിടെ ‘Username’ എന്ന ഓപ്ഷൻ കാണുന്നുണ്ടെങ്കിൽ നിങ്ങൾക്ക് സ്വന്തമായി പേര് തിരഞ്ഞെടുക്കാം. നിലവിൽ ചുരുക്കം ചിലർക്ക് മാത്രമാണ് ഇത് ലഭിച്ചിട്ടുള്ളതെങ്കിലും ഉടൻ തന്നെ എല്ലാ ഉപയോക്താക്കളിലേക്കും ഈ സേവനം എത്തും. ചുരുങ്ങിയത് 3 അക്ഷരങ്ങളും പരമാവധി 30 അക്ഷരങ്ങളും അടങ്ങുന്നതാകണം യൂസർനെയിം. എന്നാൽ ‘www.’ എന്ന് തുടങ്ങുന്നതോ, ‘.com’, ‘.net’ എന്നിവയിൽ അവസാനിക്കുന്നതോ ആയ പേരുകൾ അനുവദിക്കില്ല.
യൂസർനെയിം ഫീച്ചർ വാർത്തകൾക്കിടെ വാട്സാപ്പിലെ സന്ദേശങ്ങളുടെ സുരക്ഷയെച്ചൊല്ലി അന്താരാഷ്ട്ര തലത്തിൽ വലിയ തർക്കങ്ങൾ ഉടലെടുത്തിട്ടുണ്ട്. വാട്സാപ്പിലെ സന്ദേശങ്ങൾ ആർക്കും വായിക്കാൻ കഴിയില്ലെന്ന (End-to-End Encryption) കമ്പനിയുടെ വാദം നുണയാണെന്ന് ടെസ്ല മേധാവി ഇലോൺ മസ്ക് ആരോപിച്ചു. ഉപയോക്താക്കളുടെ അനുമതിയില്ലാതെ സന്ദേശങ്ങൾ പരിശോധിക്കാൻ മെറ്റയ്ക്ക് സാധിക്കുമെന്ന ആരോപണവുമായി ബന്ധപ്പെട്ട് അമേരിക്കയിൽ നിയമനടപടികൾ ആരംഭിച്ചിട്ടുണ്ട്.
എന്നാൽ ഈ ആരോപണങ്ങൾ മെറ്റ പൂർണ്ണമായും തള്ളി. കഴിഞ്ഞ പത്ത് വർഷമായി അത്യാധുനികമായ ‘സിഗ്നൽ പ്രോട്ടോക്കോൾ’ ആണ് തങ്ങൾ ഉപയോഗിക്കുന്നതെന്നും സന്ദേശങ്ങൾ അയക്കുന്നവർക്കും സ്വീകരിക്കുന്നവർക്കും അല്ലാതെ മറ്റാർക്കും അത് വായിക്കാൻ കഴിയില്ലെന്നും കമ്പനി വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
WhatsApp is like Instagram; Now 'username' is enough; You can chat without giving your phone number
