കാലിഫോർണിയ: കാലിഫോർണിയയിൽ നടന്ന ആപ്പിളിന്റെ മെഗാ ലോഞ്ച് ഇവന്റിൽ കമ്പനിയുടെ ആദ്യ ഫോൾഡബിൾ ഫോണായ ‘ഐഫോൺ ഡ്യൂവോ’ ഔദ്യോഗികമായി അവതരിപ്പിച്ചു. നിലവിലുള്ള ആൻഡ്രോയിഡ് ഫോൾഡബിൾ ഫോണുകളിൽ നിന്നും തികച്ചും വ്യത്യസ്തമായ ഡിസൈനിലാണ് ഈ ഫോൺ എത്തിയിരിക്കുന്നത്. മടക്കിവെക്കുമ്പോൾ ഏകദേശം ഒരു പാസ്‌പോർട്ടിന്റെ വലിപ്പമുള്ള ഈ ഫോൺ ടെക് ലോകത്തിന്റെ വലിയ ശ്രദ്ധയാണ് നേടിയിരിക്കുന്നത്. പുതിയ സിഇഒ ജോൺ ടെർനസിന്റെ നേതൃത്വത്തിൽ നടന്ന ചടങ്ങിലാണ് ഐഫോൺ 18 പ്രോ സീരീസിന്റെ വിലയും റിലീസ് തീയതിയും കമ്പനി പ്രഖ്യാപിച്ചത്.
ആപ്പിൾ പാർക്കിൽ നടന്ന ‘സൺപ്രൈസ് ആൻഡ് ഷൈൻ’ ചടങ്ങിന്റെ ആദ്യഭാഗം സിഇഒ ടിം കുക്ക് അവതരിപ്പിച്ചപ്പോൾ, പുതിയ പ്രോ മോഡലുകൾ അവതരിപ്പിച്ചത് ജോൺ ടെർനസ് ആണ്. ഐഫോൺ 18 പ്രോ, ഐഫോൺ 18 പ്രോ മാക്സ് മോഡലുകൾക്കായുള്ള പ്രീ-ഓർഡറുകൾ സെപ്റ്റംബർ 12-ന് ആരംഭിക്കും. തുടർന്ന് ആഗോളതലത്തിലുള്ള വിൽപ്പന സെപ്റ്റംബർ 18 മുതൽ ഔദ്യോഗികമായി ആരംഭിക്കുന്നതാണ്. അമേരിക്കയിൽ 256GB വേരിയന്റിന് ഐഫോൺ 18 പ്രോയ്ക്ക് 1,199 ഡോളറും പ്രോ മാക്സിന് 1,299 ഡോളറുമാണ് പ്രാരംഭ വില. ഇന്ത്യയിൽ ഇവ യഥാക്രമം 1,64,900 രൂപയിലും 1,79,900 രൂപയിലുമാണ് ആരംഭിക്കുന്നത്.
പ്രതീക്ഷിച്ചതുപോലെ ഏറ്റവും പുതിയ A20 Pro ചിപ്പാണ് ഐഫോൺ 18 പ്രോ സീരീസിന് കരുത്തേകുന്നത്. ഇതുവരെ പുറത്തിറക്കിയതിൽവെച്ച് ഏറ്റവും ശക്തമായ സിലിക്കൺ ചിപ്പാണിതെന്നും മുൻ തലമുറകളെ അപേക്ഷിച്ച് 20 ശതമാനം വരെ വേഗതയേറിയ പ്രകടനം നൽകാൻ ഇതിന് സാധിക്കുമെന്നും ആപ്പിൾ അവകാശപ്പെടുന്നു. Burgundy, Glacier, Black, Silver എന്നീ നാല് കളർ ഓപ്ഷനുകളിൽ ഈ ഫോണുകൾ ലഭ്യമാകും. ഐഫോൺ 18 പ്രോയിൽ 6.3 ഇഞ്ച് ഡിസ്‌പ്ലേയും, പ്രോ മാക്സിൽ 6.9 ഇഞ്ച് ഡിസ്‌പ്ലേയുമാണ് നൽകിയിരിക്കുന്നത്. രണ്ട് മോഡലുകളും 120Hz പ്രോമോഷൻ റിഫ്രഷ് റേറ്റ് പിന്തുണയോടെയാണ് വരുന്നത്.
പുതിയ മോഡലുകളിൽ iOS 27 ആണ് മുൻകൂട്ടി ഇൻസ്റ്റാൾ ചെയ്തിട്ടുള്ളത്. ആപ്പിൾ ഇൻ്റലിജൻസിന്റെ പിന്തുണയോടെ പൂർണമായും പുനർരൂപകൽപ്പന ചെയ്ത ‘സിരി ഐഐ’ ഇതിന്റെ പ്രധാന ആകർഷണങ്ങളിലൊന്നാണ്. കൂടുതൽ വ്യക്തിഗതവും സ്വാഭാവികവുമായ സംഭാഷണശേഷിയുള്ള ഈ അസിസ്റ്റന്റ് ഉപയോക്താക്കളുടെ സ്വകാര്യതയ്ക്കും സുരക്ഷയ്ക്കും മുൻഗണന നൽകിയാണ് പ്രവർത്തിക്കുന്നത്. ഒപ്പം, അടുത്ത തലമുറ വാപ്പർ ചേംബർ കൂളിങ് സംവിധാനവും ഫോണിൽ ഉൾപ്പെടുത്തിയിട്ടുണ്ട്.
ക്യാമറ വിഭാഗത്തിലും വലിയ അപ്ഗ്രേഡുകളാണ് ആപ്പിൾ വരുത്തിയിട്ടുള്ളത്. വേരിയബിൾ അപ്പർച്ചറും പ്രത്യേക ലെൻസുമുള്ള 48 മെഗാപിക്സൽ ഫ്യൂഷൻ മെയിൻ സെൻസർ ഉൾപ്പെടുന്ന ട്രിപ്പിൾ റിയർ ക്യാമറയാണ് രണ്ട് പ്രോ മോഡലുകളിലുമുള്ളത്. ഇത് രാത്രികാല ഫോട്ടോഗ്രാഫിയും ആസ്ട്രോഫോട്ടോഗ്രാഫിയും കൂടുതൽ മികച്ചതാക്കുന്നു. 256GB, 512GB, 1TB, 2TB എന്നിങ്ങനെ നാല് സ്റ്റോറേജ് ഓപ്ഷനുകളിൽ ഐഫോൺ 18 പ്രോ, പ്രോ മാക്സ് മോഡലുകൾ സ്വന്തമാക്കാൻ സാധിക്കും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
