കുടക് ദുബാരെ ക്യാമ്പിൽ ആനകളുടെ ഏറ്റുമുട്ടൽ: നിയന്ത്രണം വിട്ടു മറിഞ്ഞ ആനയുടെ അടിയിൽപ്പെട്ട് യുവതിക്ക് ദാരുണാന്ത്യം

മടിക്കേരി: കർണാടകയിലെ പ്രശസ്തമായ ദുബാരെ ആന ക്യാമ്പിലുണ്ടായ ആനകളുടെ ഏറ്റുമുട്ടലിനിടെ തമിഴ്‌നാട് സ്വദേശിയായ യുവതിക്ക് ദാരുണാന്ത്യം. തമിഴ്‌നാട്ടിൽ നിന്നുള്ള വിനോദസഞ്ചാരി തുളസി (33) ആണ് മരിച്ചത്. തിങ്കളാഴ്ച ക്യാമ്പിലെ ആനകളെ കാവേരി നദിയിൽ കുളിപ്പിക്കുന്നതിനിടെ രണ്ട് ആനകൾ പെട്ടെന്ന് പരസ്പരം ആക്രമിക്കുകയായിരുന്നു. അടിപിടിക്കിടെ നിയന്ത്രണം വിട്ടു വീണ ആനയുടെ അടിയിൽ കുടുങ്ങിയാണ് യുവതി മരണപ്പെട്ടത്.

കാവേരി നദീതീരത്ത് ആനകൾ കുളിക്കുന്നത് നോക്കിനിൽക്കുകയായിരുന്നു തുളസി. ഈ സമയത്താണ് ക്യാമ്പിലെ ‘കാഞ്ചൻ’, ‘മാർത്താണ്ഡൻ’ എന്നീ ആനകൾ തമ്മിൽ പെട്ടെന്ന് ഏറ്റുമുട്ടിയത്. കാഞ്ചൻ എന്ന ആന മാർത്താണ്ഡനു നേരെ പാഞ്ഞടുക്കുകയായിരുന്നു എന്ന് വനംവകുപ്പ് അധികൃതർ വ്യക്തമാക്കി. പാപ്പാന്മാർ ആനകളെ ശാന്തരാക്കാൻ പരമാവധി ശ്രമിച്ചെങ്കിലും വിജയിച്ചില്ല. തുടർന്നുണ്ടായ ബഹളത്തിനിടയിൽ നിയന്ത്രണം നഷ്ടപ്പെട്ട മാർത്താണ്ഡൻ എന്ന ആന തറയിലേക്ക് മറിഞ്ഞു വീഴുകയായിരുന്നു. ഇതിനടുത്തായി നിന്നിരുന്ന തുളസി ആനയുടെ ശരീരത്തിനടിയിൽപ്പെടുകയായിരുന്നു. രക്ഷാപ്രവർത്തകർക്ക് ഉടൻ തന്നെ ആനയുടെ അടുത്തേക്ക് എത്താൻ സാധിക്കാത്തതിനെ തുടർന്ന് സംഭവസ്ഥലത്തു വച്ചുതന്നെ യുവതി മരണപ്പെട്ടു.

സംഭവത്തെത്തുടർന്ന് ക്യാമ്പിലുണ്ടായിരുന്ന വിനോദസഞ്ചാരികളും ജീവനക്കാരും പരിഭ്രാന്തരായി. വനംവകുപ്പ് ഉദ്യോഗസ്ഥരും തദ്ദേശ അധികാരികളും ഉടനടി സ്ഥലത്തെത്തി ആവശ്യമായ നടപടികൾ സ്വീകരിച്ചു. കാവേരി നദിയുടെ തീരത്ത് സ്ഥിതി ചെയ്യുന്ന ദുബാരെ ആന ക്യാമ്പ് വിനോദസഞ്ചാരികൾക്ക് ആനകളെ നേരിൽ കാണാനും ഭക്ഷണം നൽകാനും കുളിപ്പിക്കാനും അവസരമൊരുക്കുന്ന കർണാടകയിലെ പ്രധാന ടൂറിസ്റ്റ് കേന്ദ്രങ്ങളിലൊന്നാണ്.

ദുരന്തത്തിൽ കർണാടക വനം മന്ത്രി ഈശ്വർ ഖണ്ഡ്രെ ആഴത്തിലുള്ള ദുഃഖം രേഖപ്പെടുത്തുകയും മരിച്ച യുവതിയുടെ കുടുംബത്തെ അനുശോചനം അറിയിക്കുകയും ചെയ്തു. അപകടത്തെക്കുറിച്ച് സമഗ്രമായ അന്വേഷണം ആരംഭിച്ചതായി വനംവകുപ്പ് ഉദ്യോഗസ്ഥർ അറിയിച്ചു. ഇത്തരം വന്യജീവി കേന്ദ്രങ്ങളിലെ സുരക്ഷാ സംവിധാനങ്ങൾ കർശനമായി പുനഃപരിശോധിക്കുമെന്നും അധികൃതർ വ്യക്തമാക്കി. സന്ദർശകർക്കായി തുറന്നു കൊടുക്കുന്ന ക്യാമ്പുകളിലെ ആനകളുടെ പെരുമാറ്റവും ടൂറിസ്റ്റുകളുടെ സുരക്ഷയും സംബന്ധിച്ച് വലിയ ആശങ്ക ഉയർത്തുന്നതാണ് ഈ സംഭവം.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

Elephant clash at Dubare camp in Kodagu: Woman dies after being crushed by an elephant that lost control