ഒന്റാരിയേ; കാനഡയിലുടനീളം നിലവിൽ ഏകദേശം 1,000 കാട്ടുതീകൾ കത്തിക്കൊണ്ടിരിക്കുകയാണ്. ഇവയിൽ ഭൂരിഭാഗവും മിന്നലേറ്റ് ഉണ്ടായവയാണ്. നിരവധി തീപിടിത്തങ്ങൾ നിയന്ത്രണാതീതമായി തുടരുന്നതിനിടെ, തീ അണയ്ക്കാനും അപകടഭീഷണിയുള്ള മേഖലകളിൽ നിന്ന് ജനങ്ങളെ സുരക്ഷിതമായി മാറ്റിപ്പാർപ്പിക്കാനുമായി ഫെഡറൽ സർക്കാർ 5,000-ത്തിലധികം അഗ്നിശമനസേനാംഗങ്ങളെയും 300-ഓളം വാട്ടർ ബോംബർ വിമാനങ്ങളും മറ്റ് വ്യോമസഹായ സംവിധാനങ്ങളും വിന്യസിച്ചിട്ടുണ്ട്. എന്നാൽ നിലവിലെ സാഹചര്യത്തിൽ ഈ ശ്രമങ്ങൾ മാത്രം മതിയാകില്ലെന്നാണ് കാലാവസ്ഥാ വിദഗ്ധരുടെ മുന്നറിയിപ്പ്. തീയുടെ തീവ്രത വളരെ കൂടുതലായതിനാൽ നേരിട്ട് അണയ്ക്കുന്നതിലുപരി ആളുകളെ സുരക്ഷിത മേഖലകളിലേക്ക് മാറ്റുന്നതാണ് പലപ്പോഴും പ്രായോഗിക മാർഗമെന്നും, കാലാവസ്ഥ അനുകൂലമായാൽ മാത്രമേ തീ നിയന്ത്രണത്തിലാകൂ എന്നും അവർ വിലയിരുത്തുന്നു.
ബ്രിട്ടീഷ് കൊളംബിയയിൽ മാത്രം 115-ഓളം കാട്ടുതീകൾ ഇപ്പോഴും സജീവമാണ്. എന്നിരുന്നാലും അവയിൽ ഏകദേശം 90 ശതമാനവും അഞ്ച് ഹെക്ടറിനുള്ളിൽ നിയന്ത്രണവിധേയമാക്കാൻ അഗ്നിശമനസേനയ്ക്ക് കഴിഞ്ഞതായി പ്രവിശ്യയുടെ വനംമന്ത്രി അറിയിച്ചു. കാട്ടുതീകൾ കാനഡയിലെ വനപരിസ്ഥിതിയുടെ സ്വാഭാവിക ഭാഗമാണെങ്കിലും, കാലാവസ്ഥാ വ്യതിയാനത്തെ തുടർന്ന് വേനൽക്കാലം കൂടുതൽ ചൂടേറിയതും സസ്യജാലങ്ങൾ കൂടുതൽ വരണ്ടതുമായ സാഹചര്യമാണ് രൂപപ്പെട്ടിരിക്കുന്നതെന്ന് വിദഗ്ധർ ചൂണ്ടിക്കാട്ടുന്നു. അതിനാൽ മുൻകാലങ്ങളെ അപേക്ഷിച്ച് വലിയ തോതിലുള്ള തീപിടിത്തങ്ങൾ ഇപ്പോൾ കൂടുതൽ ആവർത്തിക്കുകയാണെന്നും അവർ പറയുന്നു.
2023-ലെ കാട്ടുതീ സീസൺ രാജ്യത്തിന്റെ ചരിത്രത്തിലെ ഏറ്റവും വിനാശകാരിയായിരുന്നെങ്കിലും, കഴിഞ്ഞ ഏതാനും ആഴ്ചകളിലെ തീപിടിത്തങ്ങളും ആയിരക്കണക്കിന് ആളുകളെ വീടുകൾ വിട്ട് ഒഴിയാൻ നിർബന്ധിതരാക്കി. കാനഡയിലെയും അമേരിക്കയിലെയും പ്രധാന നഗരങ്ങളിൽ വായു മലിനീകരണവും രൂക്ഷമായിട്ടുണ്ട്. ഒന്റാറിയോയിൽ മാത്രം 150-ലധികം കാട്ടുതീകൾ റിപ്പോർട്ട് ചെയ്തിട്ടുണ്ടെന്നും, വിദൂര വനമേഖലകളിലെ വലിയ തീപിടിത്തങ്ങൾ എല്ലാം അണയ്ക്കുക പ്രായോഗികമല്ലെന്നും വനവിദഗ്ധർ പറയുന്നു. ഇതിനിടെ അമേരിക്കയിലെ വാഷിംഗ്ടൺ, ഒറിഗൺ സംസ്ഥാനങ്ങളിലെ കാട്ടുതീയിൽ നിന്നുള്ള പുകയും ബ്രിട്ടീഷ് കൊളംബിയയിലെ വായു നിലവാരത്തെ ബാധിക്കുന്നുണ്ട്. ഭാവിയിൽ ഇത്തരം ദുരന്തങ്ങളുടെ ആഘാതം കുറയ്ക്കാൻ നഗരങ്ങളുടെ ചുറ്റും ഫയർബ്രേക്ക് മേഖലകൾ സൃഷ്ടിക്കുക, കത്തിപ്പിടിക്കാൻ സാധ്യതയുള്ള വനാവശിഷ്ടങ്ങൾ നീക്കം ചെയ്യുക, തീപ്രതിരോധ ശേഷിയുള്ള നിർമ്മാണസാമഗ്രികൾ ഉപയോഗിച്ച് വീടുകൾ നിർമിക്കുക തുടങ്ങിയ പ്രതിരോധ നടപടികൾ ശക്തിപ്പെടുത്തേണ്ടതുണ്ടെന്നും വിദഗ്ധർ നിർദേശിക്കുന്നു.
Wildfires in Canada out of control; experts say the crisis will not end without a change in weather conditions.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
