കേരളത്തിലെ പുതിയ മുഖ്യമന്ത്രിയെ നിശ്ചയിക്കുന്നതിനുള്ള എഐസിസി നിരീക്ഷകരുടെ റിപ്പോർട്ട് ഇന്ന് ഹൈക്കമാൻഡിന് സമർപ്പിക്കും. നിയുക്ത എംഎൽഎമാരുമായി നടത്തിയ വ്യക്തിഗത കൂടിക്കാഴ്ചയിലെ വിവരങ്ങൾ ഉൾപ്പെടുത്തിയ റിപ്പോർട്ട് മല്ലികാർജുൻ ഖർഗെ, രാഹുൽ ഗാന്ധി എന്നിവർക്ക് നിരീക്ഷകർ കൈമാറും. സംസ്ഥാനത്തെ രാഷ്ട്രീയ സാഹചര്യം വിശദമായി ധരിപ്പിച്ച ശേഷമാകും അന്തിമ പ്രഖ്യാപനത്തിലേക്ക് ഹൈക്കമാൻഡ് കടക്കുക. നിർണായക ചർച്ചകൾക്കായി മുതിർന്ന നേതാക്കളെ ഇന്ന് ഡൽഹിയിലേക്ക് വിളിപ്പിച്ചേക്കും.
മുഖ്യമന്ത്രി പദത്തിനായി കെ.സി. വേണുഗോപാൽ, വി.ഡി. സതീശൻ, രമേശ് ചെന്നിത്തല എന്നിവർക്കായി അണിയറയിൽ ശക്തമായ നീക്കങ്ങളാണ് നടക്കുന്നത്. ബഹുഭൂരിപക്ഷം എംഎൽഎമാരുടെയും പിന്തുണ തങ്ങൾക്കുണ്ടെന്ന് കെ.സി പക്ഷം അവകാശപ്പെടുമ്പോൾ, ജനവികാരവും ഘടകകക്ഷികളുടെ പിന്തുണയും തനിക്ക് അനുകൂലമാകുമെന്ന പ്രതീക്ഷയിലാണ് വി.ഡി. സതീശൻ. എന്നാൽ സീനിയോറിറ്റി പരിഗണിക്കപ്പെടുമെന്ന ആത്മവിശ്വാസത്തിൽ രമേശ് ചെന്നിത്തല ക്യാമ്പും ഉറച്ചുനിൽക്കുന്നു. ഭൂരിപക്ഷം ഉറപ്പിക്കാൻ മൂന്ന് പക്ഷങ്ങളും ഹൈക്കമാൻഡിൽ സമ്മർദ്ദം ചെലുത്തുന്നുണ്ട്.
കോൺഗ്രസിന്റെ ആഭ്യന്തര കാര്യങ്ങളിൽ മുസ്ലീം ലീഗ് ഇടപെടേണ്ടെന്ന മാത്യു കുഴൽനാടന്റെ പ്രസ്താവന യുഡിഎഫിൽ പുതിയ വിവാദത്തിന് തിരികൊളുത്തി. മുഖ്യമന്ത്രി ചർച്ചകളിലേക്ക് ലീഗിനെ വലിച്ചിഴച്ചതിൽ പാർട്ടി നേതൃത്വത്തിന് കടുത്ത അമർഷമുണ്ട്. മുന്നണി രാഷ്ട്രീയം എന്നത് ഒറ്റക്കക്ഷിയുടെ തീരുമാനമല്ലെന്ന് കെഎംസിസി നേതാവ് പുത്തൂർ റഹ്മാൻ പരസ്യമായി പ്രതികരിച്ചു. മധ്യപ്രദേശിലെ രാഷ്ട്രീയ സാഹചര്യം കോൺഗ്രസ് ഓർക്കണമെന്ന മുന്നറിയിപ്പും അദ്ദേഹം ഫേസ്ബുക്കിലൂടെ നൽകിയിട്ടുണ്ട്.
മുഖ്യമന്ത്രിയെ സംബന്ധിച്ച അന്തിമ തീരുമാനം ഇന്ന് വൈകുന്നേരത്തോടെ ഉണ്ടായേക്കുമെന്നാണ് സൂചന. എംഎൽഎമാരുടെ അഭിപ്രായത്തിനൊപ്പം ഘടകകക്ഷികളുടെ താൽപ്പര്യവും ഭരണവിരുദ്ധ വികാരം വരാതിരിക്കാനുള്ള മുൻകരുതലും ഹൈക്കമാൻഡ് പരിഗണിക്കും. വി.ഡി. സതീശൻ മന്ത്രിസഭയിലേക്ക് ഇല്ലെന്ന തരത്തിലുള്ള പ്രചാരണങ്ങൾ നടക്കുന്നുണ്ടെങ്കിലും സതീശൻ ക്യാമ്പ് ഇത് ഔദ്യോഗികമായി സ്ഥിരീകരിച്ചിട്ടില്ല. ഹൈക്കമാൻഡ് എടുക്കുന്ന ഏത് തീരുമാനവും അംഗീകരിക്കാൻ സംസ്ഥാന നേതൃത്വം ബാധ്യസ്ഥരാകും.
Who will be the Chief Minister? Discussions to Delhi; High Command decision today
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
