ഒട്ടാവ: സുസ്ഥിരവും കർശനമായ മാനദണ്ഡങ്ങളുള്ളതുമായിരുന്ന കാനഡയുടെ ഇമിഗ്രേഷൻ സംവിധാനം സമീപകാലത്ത് വലിയ പ്രതിസന്ധി നേരിട്ടതായി പ്രമുഖ രാഷ്ട്രീയ നിരീക്ഷകനും എഴുത്തുകാരനുമായ ടോണി കെല്ലർ. സ്ഥിരതാമസക്കാരെ ലക്ഷ്യമിട്ടുള്ള മികച്ചൊരു സിസ്റ്റത്തിൽ നിന്നും അന്താരാഷ്ട്ര വിദ്യാർത്ഥികളെയും താൽക്കാലിക വിദേശ തൊഴിലാളികളെയും (Temporary Foreign Workers) അനിയന്ത്രിതമായി രാജ്യത്തേക്ക് പ്രവേശിപ്പിക്കുന്ന രീതിയിലേക്ക് കാനഡ മാറിയതാണ് നിലവിലെ പ്രതിസന്ധികൾക്ക് കാരണമെന്ന് അദ്ദേഹം ചൂണ്ടിക്കാട്ടി. ‘ദി ഹബ്ബ് കാനഡ’ക്ക് നൽകിയ അഭിമുഖത്തിലാണ് അദ്ദേഹം ഈ നിരീക്ഷണങ്ങൾ പങ്കുവെച്ചത്.
ക്രഷിയാൻ (Chrétien), ഹാർപ്പർ (Harper) സർക്കാരുകളുടെ കാലത്ത് പ്രതിവർഷം ശരാശരി 2.5 ലക്ഷം പേർക്ക് മാത്രമാണ് കാനഡയിൽ പ്രവേശനം നൽകിയിരുന്നത്. ഇത് ഉയർന്ന നിരക്കാണെങ്കിൽ കൂടി വളരെ സുസ്ഥിരവും നിയന്ത്രണവിധേയവുമായിരുന്നു. പോയിന്റ് സിസ്റ്റം വഴിയുള്ള സാമ്പത്തിക കുടിയേറ്റത്തിനായിരുന്നു (Economic Immigration) അന്ന് മുൻഗണന. ഈ കണിശമായ തെരഞ്ഞെടുപ്പ് രീതിയും ശക്തമായ അതിർത്തി സുരക്ഷയും കാനഡയുടെ ഇമിഗ്രേഷൻ സംവിധാനത്തിന് ആഗോളതലത്തിൽ വലിയ പ്രശസ്തി നേടിക്കൊടുത്തു. അക്കാലത്ത് ഇമിഗ്രേഷൻ നയം രാഷ്ട്രീയ പാർട്ടികൾക്കിടയിലോ പൊതുജനങ്ങൾക്കിടയിലോ ഒരു തർക്കവിഷയമേ ആയിരുന്നില്ല.
ജസ്റ്റിൻ ട്രൂഡോ സർക്കാർ അധികാരത്തിൽ വന്നതിന് പിന്നാലെ ഇമിഗ്രേഷൻ നിരക്കുകൾ ഗണ്യമായി വർദ്ധിപ്പിക്കാൻ തുടങ്ങി. സ്ഥിരതാമസക്കാരെ തെരഞ്ഞെടുക്കുന്നതിൽ പുലർത്തിയിരുന്ന കർശന മാനദണ്ഡങ്ങൾ ലഘൂകരിക്കപ്പെടുകയും താൽക്കാലിക കുടിയേറ്റത്തിനുള്ള നിരവധി പുതിയ വഴികൾ തുറക്കപ്പെടുകയും ചെയ്തു. ഇതിന്റെ ഫലമായി 2022-ൽ പത്ത് ലക്ഷവും, 2023-ൽ കാനഡയുടെ ചരിത്രത്തിലെ ഏറ്റവും ഉയർന്ന നിരക്കായ 13 ലക്ഷവും (നെറ്റ് ഇമിഗ്രേഷൻ) ആളുകൾ രാജ്യത്തെത്തി.
യുഎസിലെ ബൈഡൻ ഭരണകൂടത്തിന്റെ നാല് വർഷത്തെ ആകെ കുടിയേറ്റ നിരക്കിനേക്കാൾ കൂടുതലായിരുന്നു ജനസംഖ്യാനുപാതികമായി കാനഡയിൽ ഒരു വർഷം കൊണ്ട് (2023-ൽ) എത്തിയവരുടെ എണ്ണം. കഴിഞ്ഞ മൂന്ന് വർഷത്തിനിടെ മാത്രം 31 ലക്ഷത്തിലധികം ആളുകളാണ് കാനഡയിലേക്ക് എത്തിയത്. കാനഡയിൽ പ്രവേശിക്കാനും full-time ജോലി ചെയ്യാനും പിന്നീട് സ്ഥിരതാമസത്തിന് (PR) വഴിതുറക്കാനുമുള്ള എളുപ്പവഴിയായി അന്താരാഷ്ട്ര വിദ്യാർത്ഥി വിസകൾ മാറ്റപ്പെട്ടു. ഉയർന്ന നിലവാരമുള്ള യൂണിവേഴ്സിറ്റികളേക്കാൾ, പല സാധാരണ കോളേജുകളുമാണ് ഈ സാഹചര്യം വ്യാപാരവൽക്കരിച്ചത്.
വാട്ടർലൂ പോലുള്ള മുൻനിര സർവ്വകലാശാലകളിൽ വിസ നിരക്ക് വർദ്ധിക്കാതിരുന്നപ്പോൾ, ഒന്റാറിയോയിലെ കൊനെസ്റ്റോഗ (Conestoga) പോലുള്ള കോളേജുകളിൽ ഒരു വർഷം 32,000-ത്തോളം സ്റ്റുഡന്റ് വിസകളാണ് അനുവദിക്കപ്പെട്ടത്. വിദ്യാഭ്യാസ സ്ഥാപനങ്ങൾക്ക് വിസ നൽകാനുള്ള അനുമതി പ്രവിശ്യാ സർക്കാരുകൾ വൻതോതിൽ നൽകിയപ്പോൾ ഫെഡറൽ ഭരണകൂടത്തിന് ഇതിന്മേൽ ആവശ്യമായ മേൽനോട്ടമോ കൃത്യമായ പരിശോധനയോ നടത്താൻ കഴിഞ്ഞില്ലെന്ന് കെല്ലർ വിമർശിച്ചു.
ബിസിനസ്സ് സമൂഹത്തിന്റെ സമ്മർദ്ദവും പ്രവിശ്യാ സർക്കാരുകളുടെ താല്പര്യങ്ങളുമാണ് ഈ അനിയന്ത്രിതമായ വർദ്ധനവിന് പിന്നിൽ പ്രവർത്തിച്ചത്. രാജ്യത്ത് കടുത്ത തൊഴിൽ ക്ഷാമമുണ്ടെന്ന ബിസിനസ്സ് ലോബികളുടെ വാദങ്ങളെത്തുടർന്ന്, പ്രത്യേകിച്ച് ഫാസ്റ്റ് ഫുഡ് മേഖലകളിലടക്കം കുറഞ്ഞ വേതനമുള്ള താൽക്കാലിക ജീവനക്കാരെ എത്തിക്കാൻ വിസ നയങ്ങളിൽ ഇളവ് വരുത്തുകയായിരുന്നു. എന്നാൽ, ഇത്തരമൊരു വൻതോതിലുള്ള കുടിയേറ്റം വേണമെന്ന് കാനഡയിലെ വോട്ടർമാർ ഒരിക്കലും ആവശ്യപ്പെട്ടിരുന്നില്ലെന്ന് പോളിംഗ് വിവരങ്ങൾ വ്യക്തമാക്കുന്നു.
നിലവിൽ സർക്കാർ ചില തിരുത്തൽ നടപടികൾ ആരംഭിച്ചിട്ടുണ്ട്. സ്റ്റുഡന്റ് വിസകളുടെ എണ്ണത്തിൽ വലിയ നിയന്ത്രണം ഏർപ്പെടുത്തിയത് ആശ്വാസകരമാണ്. എങ്കിലും കുറഞ്ഞ വേതനമുള്ള താൽക്കാലിക വിദേശ തൊഴിലാളികളുടെ കാര്യത്തിലും അഭയാർത്ഥി അപേക്ഷകളുടെ (Refugee Claims) ബാക്ക്ലോഗ് കുറയ്ക്കുന്നതിലും ഇനിയും ഏറെ മുന്നോട്ട് പോകേണ്ടതുണ്ട്. 2013-ൽ അയ്യായിരത്തോളം മാത്രമായിരുന്ന അഭയാർത്ഥി അപേക്ഷകൾ 2024-ൽ 1.9 ലക്ഷമായി ഉയർന്നത് സിസ്റ്റത്തിന്മേലുള്ള ഭാരം വർദ്ധിപ്പിച്ചു.
ഈ അനിയന്ത്രിതമായ മാറ്റങ്ങൾ കാനഡക്കാരുടെ പരമ്പരാഗതമായ ഇമിഗ്രേഷൻ അനുകൂല മനോഭാവത്തെ സ്വാധീനിച്ചിട്ടുണ്ട്. മുൻകാലങ്ങളിൽ ഇമിഗ്രേഷനെ പോസിറ്റീവായി കണ്ടിരുന്ന ജനങ്ങളിൽ, 48 ശതമാനത്തോളം പേരും ഇപ്പോൾ ഇത് രാജ്യത്തെ ദോഷകരമായി ബാധിക്കുന്നു എന്ന അഭിപ്രായക്കാരാണ്. കാനഡയുടെ ഇമിഗ്രേഷൻ സംവിധാനം രാജ്യത്തിന്റെ പുരോഗതിക്ക് ഉതകുന്ന രീതിയിൽ, കണിശമായ മാനദണ്ഡങ്ങളോടെയും നിയന്ത്രണങ്ങളോടെയും പുനഃക്രമീകരിച്ചാൽ മാത്രമേ നഷ്ടപ്പെട്ട ജനവിശ്വാസം തിരിച്ചുപിടിക്കാൻ സാധിക്കുകയുള്ളൂ എന്ന് വ്യക്തമാക്കിക്കൊണ്ടാണ് ടോണി കെല്ലർ അഭിമുഖം അവസാനിപ്പിക്കുന്നത്.
What happened to Canada's visa policies? Tony Keller explains how the world-class immigration system has collapsed
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
