വിന്നിപെഗ്: കനത്ത മഴയെത്തുടർന്ന് പടിഞ്ഞാറൻ മാനിറ്റോബയിലെ വിവിധ നഗരങ്ങളിലും ഗ്രാമങ്ങളിലും വ്യാപക വെള്ളപ്പൊക്കം റിപ്പോർട്ട് ചെയ്തു. തിങ്കളാഴ്ച രാത്രിയുണ്ടായ അതിശക്തമായ മഴയിൽ സ്വാൻ റിവർ ഉൾപ്പെടെയുള്ള നദികൾ കരകവിഞ്ഞൊഴുകിയതോടെയാണ് സ്ഥിതി ഗുരുതരമായത്. വരും ദിവസങ്ങളിലും ശക്തമായ മഴയും കാറ്റും തുടരുമെന്ന കാലാവസ്ഥാ വകുപ്പിന്റെ മുന്നറിയിപ്പിനെ തുടർന്ന് അധികൃതർ പ്രദേശങ്ങളിൽ അടിയന്തരാവസ്ഥ പ്രഖ്യാപിക്കുകയും ജാഗ്രതാ നിർദേശം നൽകുകയും ചെയ്തു.
റോറിംഗ് റിവർ കരകവിഞ്ഞതോടെ സ്വാൻ റിവർ നഗരത്തിന്റെ പകുതിയിലധികം ഭാഗങ്ങളും വെള്ളത്തിനടിയിലായി. ഡസൻ കണക്കിന് വീടുകളിലും വ്യാപാര സ്ഥാപനങ്ങളിലും വെള്ളം കയറി വലിയ നാശനഷ്ടമുണ്ടായിട്ടുണ്ട്. ആൽപൈൻ മേഖലയിലെ അണക്കെട്ട് തകരാൻ സാധ്യതയുള്ളതിനാൽ സ്വാൻ വാലി വെസ്റ്റ് മുനിസിപ്പാലിറ്റിയിലും അടിയന്തരാവസ്ഥ പ്രഖ്യാപിച്ചിട്ടുണ്ട്. റോഡുകളും ചെറിയ പാലങ്ങളും തകർന്നതിനെ തുടർന്ന് ഗതാഗതം പൂർണമായി തടസ്സപ്പെട്ടു. പലയിടങ്ങളിലും വൈദ്യുതി, കുടിവെള്ളം, കമ്മ്യൂണിക്കേഷൻ സംവിധാനങ്ങൾ എന്നിവ തകരാറിലാണ്.
ദുരന്തബാധിത പ്രദേശങ്ങളിൽ പ്രവിശ്യാ സർക്കാരിന്റെ നേതൃത്വത്തിൽ അടിയന്തര രക്ഷാപ്രവർത്തനം പുരോഗമിക്കുകയാണ്. ഫയർ ഫോഴ്സും സന്നദ്ധപ്രവർത്തകരും ചേർന്ന് വീടുകൾക്ക് ചുറ്റും മണൽച്ചാക്കുകൾ നിരത്തി വെള്ളം കയറുന്നത് തടയാൻ ശ്രമിക്കുന്നുണ്ട്. കൂടുതൽ അപകട സാധ്യതയുള്ള പ്രദേശങ്ങളിൽ നിന്ന് ആളുകളെ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു വരുന്നു. തകരാറിലായ വൈദ്യുതി ബന്ധം പുനഃസ്ഥാപിക്കാൻ ജീവനക്കാരെ ഹെലികോപ്റ്റർ മാർഗമാണ് ബാധിത പ്രദേശങ്ങളിൽ എത്തിക്കുന്നത്. വെള്ളപ്പൊക്ക സാഹചര്യം നേരിടാൻ പ്രവിശ്യാ സർക്കാർ അടിയന്തര നടപടികൾ സ്വീകരിച്ചിട്ടുണ്ടെന്ന് മാനിറ്റോബ പ്രീമിയർ Wab Kinew അറിയിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Western Manitoba inundated by torrential rain; states of emergency declared in various areas
