ഒന്റാറിയോ: കാനഡയിൽ വേനൽക്കാലം സജീവമാകുന്നതിനിടെ ആശങ്കയായി വീണ്ടും വെസ്റ്റ് നൈൽ വൈറസ് സാന്നിധ്യം റിപ്പോർട്ട് ചെയ്തു. ഒന്റാറിയോയിലെ ഗ്വൽഫിൽ (Guelph) ചത്ത കാക്കയിലാണ് വൈറസ് ബാധ സ്ഥിരീകരിച്ചത്. ഇതോടെ പ്രവിശ്യയിൽ കൊതുക് വഴിയുള്ള രോഗവ്യാപന സാധ്യത കണക്കിലെടുത്ത് ആരോഗ്യവിഭാഗം നിരീക്ഷണം ശക്തമാക്കി. കാനഡയിൽ ആഭ്യന്തരമായി ഏറ്റവും കൂടുതൽ പടരുന്ന കൊതുക് ജന്യ രോഗങ്ങളിലൊന്നാണിത്.
വൈറസ് സാന്നിധ്യം കണ്ടെത്തിയെങ്കിലും പൊതുജനങ്ങൾ പരിഭ്രാന്തരാകേണ്ട സാഹചര്യമില്ലെന്ന് പകർച്ചവ്യാധി പ്രതിരോധ വിദഗ്ധർ വ്യക്തമാക്കുന്നുണ്ട്. എല്ലാ വർഷവും വേനൽക്കാലത്ത് ഈ വൈറസ് സാന്നിധ്യം പതിവാണെന്നും, കൊതുക് കടിയേൽക്കുന്ന ഭൂരിഭാഗം ആളുകളിലും രോഗലക്ഷണങ്ങൾ പ്രകടമാകാറില്ലെന്നുമാണ് ആരോഗ്യവകുപ്പിന്റെ വിലയിരുത്തൽ. രോഗബാധയേറ്റ പക്ഷികളെ കടിക്കുന്ന കൊതുകുകളിലൂടെയാണ് വെസ്റ്റ് നൈൽ വൈറസ് മനുഷ്യരിലേക്ക് എത്തുന്നത്. കാക്കകൾ, റാവനുകൾ (Ravens), ജെയ്സ് (Jays) തുടങ്ങിയ പക്ഷികളിലാണ് ഈ വൈറസ് പ്രധാനമായും കാണപ്പെടുന്നത്. കുതിരകളിലും മനുഷ്യരിലും ഇത് അവിചാരിതമായാണ് പടരുന്നത്.
കാനഡയിൽ എല്ലാ വർഷവും വെസ്റ്റ് നൈൽ കേസുകൾ റിപ്പോർട്ട് ചെയ്യാറുണ്ടെന്ന് ക്വീൻസ് യൂണിവേഴ്സിറ്റിയിലെ പകർച്ചവ്യാധി വിഭാഗം മേധാവി ഡോ. ജെറാൾഡ് ഇവാൻസ് പറഞ്ഞു. നിലവിൽ രാജ്യത്തിന്റെ വിവിധ ഭാഗങ്ങളിൽ കൊതുകുകൾ സജീവമാണെങ്കിലും, വേനൽക്കാലത്തിന്റെ മധ്യത്തിലും അവസാനത്തോടും കൂടിയായിരിക്കും മനുഷ്യരിലേക്ക് രോഗം പടരാനുള്ള സാധ്യത കൂടുതൽ. പക്ഷികൾക്കിടയിൽ വൈറസ് വ്യാപനം ശക്തമായ ശേഷമേ ഇത് കൊതുകുകൾ വഴി മനുഷ്യരിലേക്ക് എത്തുകയുള്ളൂ എന്നും അദ്ദേഹം കൂട്ടിച്ചേർത്തു. ഗ്വൽഫിൽ ചത്ത കാക്കയെ കണ്ടെത്തിയത് വൈറസ് സാന്നിധ്യം തിരിച്ചറിയാനുള്ള നിരീക്ഷണ സംവിധാനത്തിന്റെ ഭാഗമായാണ്.
വെസ്റ്റ് നൈൽ വൈറസ് ബാധയെ ഒരു ‘ഐസ്ബെർഗ്’ (Iceberg) പ്രതിഭാസമായാണ് ഡോ. ഇവാൻസ് വിശേഷിപ്പിക്കുന്നത്. അതായത് പുറമെ കാണുന്ന ലക്ഷണങ്ങൾ വളരെ കുറവാണെങ്കിലും ഭൂരിഭാഗം കേസുകളും നിശബ്ദമായിരിക്കും. രോഗബാധയേൽക്കുന്ന 70 മുതൽ 80 ശതമാനം ആളുകളിലും യാതൊരുവിധ ലക്ഷണങ്ങളും പ്രകടമാകാറില്ലെന്ന് പബ്ലിക് ഹെൽത്ത് ഏജൻസി ഓഫ് കാനഡ (PHAC) വ്യക്തമാക്കുന്നു.
രോഗബാധിതരിൽ വെറും 20 ശതമാനം പേർക്ക് മാത്രമാണ് നേരിയ പനി, തലവേദന, പേശി വേദന, കടുത്ത ക്ഷീണം തുടങ്ങിയ ലക്ഷണങ്ങൾ ഉണ്ടാകുന്നത്. കൊതുക് കടിയേറ്റ് ഏതാനും ദിവസങ്ങൾക്കകം ലക്ഷണങ്ങൾ കാണിക്കുകയും രണ്ടര ആഴ്ചയ്ക്കുള്ളിൽ ഇവർ പൂർണ്ണമായി സുഖം പ്രാപിക്കുകയും ചെയ്യും. ഇതിനായി പ്രത്യേക മരുന്നുകളോ ചികിത്സയോ ആവശ്യമില്ല.
എന്നാൽ രോഗം ബാധിക്കുന്നവരിൽ ഒരു ശതമാനത്തിൽ താഴെ ആളുകളിൽ ഇത് തലച്ചോറിനെ ബാധിക്കുന്ന എൻസെഫലൈറ്റിസ് (Encephalitis), മെനിഞ്ചൈറ്റിസ് (Meningitis) അല്ലെങ്കിൽ പക്ഷാഘാതം തുടങ്ങിയ ഗുരുതരമായ നാഡീസംബന്ധമായ പ്രശ്നങ്ങൾക്ക് കാരണമായേക്കാം. പ്രതിരോധശേഷി കുറഞ്ഞവർ, കാൻസർ ചികിത്സയിലുള്ളവർ, മറ്റ് ഗുരുതര രോഗങ്ങൾക്ക് മരുന്ന് കഴിക്കുന്നവർ എന്നിവർ കൂടുതൽ ജാഗ്രത പാലിക്കണം. കാനഡയിൽ നിലവിൽ കൊതുക് ജന്യ രോഗങ്ങളേക്കാൾ ലൈം ഡിസീസ് പോലുള്ള മറ്റ് രോഗങ്ങളാണ് കൂടുതൽ റിപ്പോർട്ട് ചെയ്യപ്പെടുന്നത്.
രോഗബാധ തടയാൻ വ്യക്തിഗതമായ മുൻകരുതലുകൾ സ്വീകരിക്കുകയാണ് ഏറ്റവും ഫലപ്രദമായ മാർഗ്ഗം. കൊതുകുകൾ കൂടുതൽ സജീവമാകുന്ന പുലർച്ചെയും സന്ധ്യാസമയങ്ങളിലും പുറത്തിറങ്ങുമ്പോൾ ശരീരം മൂടുന്ന വസ്ത്രങ്ങൾ ധരിക്കാൻ ശ്രദ്ധിക്കുക. 30 ശതമാനം ഡി.ഇ.ഇ.റ്റി (DEET) അല്ലെങ്കിൽ 20 ശതമാനം ഇക്കാരൈഡിൻ (ICARIDIN) അടങ്ങിയ കൊതുക് നിവാരണികൾ ഉപയോഗിക്കുന്നത് നല്ലതാണെന്ന് പകർച്ചവ്യാധി വിദഗ്ധനായ ഡോ. ഐസക് ബൊഗോച്ച് നിർദ്ദേശിക്കുന്നു. വീട്ടുപരിസരങ്ങളിൽ വെള്ളം കെട്ടിക്കിടന്ന് കൊതുക് വളരുന്ന സാഹചര്യം ഒഴിവാക്കണമെന്നും ആരോഗ്യ അധികൃതർ ഓർമ്മിപ്പിക്കുന്നു. വേനൽക്കാല വിനോദങ്ങൾക്കായി പുറത്തുപോകുമ്പോൾ ഭയപ്പെടേണ്ടതില്ലെന്നും എന്നാൽ കൃത്യമായ ജാഗ്രത പാലിക്കണമെന്നുമാണ് വിദഗ്ധരുടെ മുന്നറിയിപ്പ്.
West Nile virus presence again in Canada; Ontario on alert
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
