ഒട്ടാവ: കാനഡയുടെ കുടിയേറ്റ സംവിധാനത്തിൽ 2026-ൽ നിർണ്ണായകമായ മാറ്റങ്ങൾ ഉണ്ടാകുമെന്ന് റിപ്പോർട്ട്. സ്ഥിരതാമസത്തിനുള്ള പുതിയ മാർഗ്ഗങ്ങൾ തുറക്കുന്നതിനൊപ്പം വർക്ക് പെർമിറ്റ് നിബന്ധനകൾ കർശനമാക്കാനുമാണ് സർക്കാർ നീക്കം. നിലവിൽ കാനഡയിലുള്ള താൽക്കാലിക താമസക്കാർക്ക് പി.ആർ. ലഭിക്കാനുള്ള സാധ്യതകൾ ഇത്തവണ വർദ്ധിക്കുമെന്നാണ് സൂചന.
പുതിയ സാഹചര്യങ്ങൾ വിശകലനം ചെയ്ത ആർട്ടിഫിഷ്യൽ ഇന്റലിജൻസ് (AI) പ്രവചനങ്ങൾ പ്രകാരം, എക്സ്പ്രസ് എൻട്രി വഴിയുള്ള കനേഡിയൻ എക്സ്പീരിയൻസ് ക്ലാസ് (CEC) നറുക്കെടുപ്പുകളിൽ സ്കോർ (CRS) കുറയാൻ സാധ്യതയുണ്ട്. കാനഡയ്ക്ക് പുറത്തുള്ളവരേക്കാൾ, രാജ്യത്തിനുള്ളിൽ പ്രവൃത്തിപരിചയമുള്ളവർക്ക് മുൻഗണന നൽകുന്ന സർക്കാരിന്റെ പുതിയ നയമാണ് ഇതിന് കാരണം. ഡോക്ടർമാർ ഉൾപ്പെടെയുള്ള ആരോഗ്യപ്രവർത്തകർക്കായി പ്രത്യേകം വിഭാഗങ്ങൾ തുടങ്ങുമെന്നും ഇതിനായുള്ള നടപടികൾ ഫെബ്രുവരിയിലോ മാർച്ചിലോ ആരംഭിക്കുമെന്നും കരുതപ്പെടുന്നു.
വിവിധ പ്രവിശ്യകൾ നടത്തുന്ന ഇമിഗ്രേഷൻ പദ്ധതികളിൽ (PNP) തൊഴിലധിഷ്ഠിത തിരഞ്ഞെടുപ്പുകൾക്ക് പ്രാധാന്യം നൽകും. നിർമ്മാണ മേഖല (Construction), ആരോഗ്യമേഖല, കുട്ടികളുടെ സംരക്ഷണം (Early Childhood Education) എന്നീ മേഖലകളിൽ പ്രവൃത്തിപരിചയമുള്ളവർക്ക് കുടിയേറ്റം എളുപ്പമാകും. അതേസമയം, സയൻസ്, ടെക്നോളജി (STEM) തുടങ്ങിയ വിഭാഗങ്ങളിലെ പ്രത്യേക നറുക്കെടുപ്പുകൾക്ക് താൽക്കാലികമായി നിയന്ത്രണം വന്നേക്കാം.
താൽക്കാലിക വിദേശ തൊഴിലാളി പദ്ധതി (TFWP) കൂടുതൽ കർശനമാക്കാനും സർക്കാർ ആലോചിക്കുന്നുണ്ട്. കുറഞ്ഞ വേതനമുള്ള ജോലികൾക്കായി വിദേശത്തുനിന്ന് ആളുകളെ കൊണ്ടുവരുന്നതിന് നിയന്ത്രണങ്ങൾ തുടരും. എന്നാൽ കൃഷി, ഭക്ഷ്യ സംസ്കരണം, നിർമ്മാണം തുടങ്ങിയ അവശ്യ മേഖലകളെ ഇതിൽ നിന്ന് ഒഴിവാക്കിയേക്കും. വീട് നിർമ്മാണ മേഖലയിലെ തൊഴിലാളി ക്ഷാമം പരിഹരിക്കാൻ പുതിയ ‘കൺസ്ട്രക്ഷൻ’ വിഭാഗം തന്നെ എക്സ്പ്രസ് എൻട്രിയിൽ ഉൾപ്പെടുത്തിയേക്കുമെന്നും സൂചനയുണ്ട്.
സ്ഥിരതാമസത്തിനുള്ള വാർഷിക ലക്ഷ്യം 3,80,000 ആയി നിലനിർത്താനാണ് നിലവിൽ സർക്കാർ പദ്ധതിയിടുന്നത്. എന്നാൽ ഇത് സംബന്ധിച്ച അന്തിമ തീരുമാനം സാമ്പത്തിക സാഹചര്യങ്ങൾ കൂടി പരിഗണിച്ച് മാത്രമേ സർക്കാർ കൈക്കൊള്ളുകയുള്ളൂ. നിയമങ്ങളിൽ വരുന്ന മാറ്റങ്ങൾ ഔദ്യോഗികമായി സ്ഥിരീകരിക്കുന്നതിന് മുൻപ് സർക്കാർ വെബ്സൈറ്റുകൾ പരിശോധിക്കണമെന്ന് കുടിയേറ്റ വിദഗ്ധർ നിർദ്ദേശിക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
ഒരു അംഗീകൃത ഇമിഗ്രേഷൻ കൺസൽട്ടന്റിന്റെ സേവനങ്ങൾക്ക് ബന്ധപ്പെടാം: +1 (289) 690-8119 ( eHouse Immigrations Services Ltd) (https://ehouseimmigration.ca/)
we-asked-ai-to-predict-canadian-immigration-in-2026-heres-what-it-said
