മുന്നറിയിപ്പ് അവഗണിച്ചു; ലഹരിയിൽ ഡ്രൈവിങ്; ഷംഭാല ഫെസ്റ്റിവലിന് പിന്നാലെ വൻ നടപടി

ബ്രിട്ടീഷ് കൊളംബിയ; കാനഡയിലെ പ്രമുഖ ഇലക്ട്രോണിക് സംഗീത-കലാ മേളകളിലൊന്നായ ഷംഭാല മ്യൂസിക് ഫെസ്റ്റിവലിന് പിന്നാലെ ബ്രിട്ടീഷ് കൊളംബിയ ഹൈവേ പട്രോൾ നടത്തിയ വ്യാപക പരിശോധനയിൽ മയക്കുമരുന്ന് ഉപയോഗിച്ച ശേഷം വാഹനം ഓടിച്ച നിരവധി ഡ്രൈവർമാർക്കെതിരെ നടപടി സ്വീകരിച്ചു. തെക്കുകിഴക്കൻ ബ്രിട്ടീഷ് കൊളംബിയയിലെ സാൽമോയ്ക്ക് സമീപം നടന്ന നാല് ദിവസത്തെ ഫെസ്റ്റിവലിൽ ഏകദേശം 50,000 പേരാണ് പങ്കെടുത്തത്.

ജൂലൈ 27-ന് ഫെസ്റ്റിവൽ വേദി വിട്ടുപോകുന്ന വാഹനങ്ങൾ ലക്ഷ്യമാക്കി രണ്ട് ചെക്ക്പോസ്റ്റുകൾ സ്ഥാപിച്ച പൊലീസ്, മയക്കുമരുന്ന് സ്വാധീനത്തിൽ വാഹനം ഓടിച്ചതായി കണ്ടെത്തിയ 51 പേർക്കാണ് സംഭത്തിൽ ഡ്രൈവിംഗ് സസ്‌പെൻഷൻ നൽകിയത്. മയക്കുമരുന്ന് ഉപയോഗിച്ചതോ വാഹനത്തിന്റെ മെക്കാനിക്കൽ സുരക്ഷാ പ്രശ്നങ്ങളോ കണ്ടെത്തിയതിനെ തുടർന്ന് 57 വാഹനങ്ങളും പിടിച്ചെടുത്ത് ടോ ചെയ്തു.

ഫെസ്റ്റിവലിന് മുമ്പ് മയക്കുമരുന്നിന്റെ സ്വാധീനം പൂർണമായും മാറിയ ശേഷമേ വാഹനം ഓടിക്കാവൂ എന്ന് മുന്നറിയിപ്പ് നൽകിയിരുന്നെങ്കിലും പലരും അത് അവഗണിച്ചതായി ബി.സി. ഹൈവേ പട്രോളിലെ സർജന്റ് മൈക്കൽ മക്ലാഫ്ലിൻ വ്യക്തമാക്കി. റോഡ് സുരക്ഷ ഉറപ്പാക്കാൻ അടുത്ത വർഷവും കൂടുതൽ ശക്തമായ പരിശോധനയുമായി മടങ്ങിവരേണ്ടി വരുമെന്ന സൂചനയും അദ്ദേഹം നൽകി.

ഫെസ്റ്റിവൽ നടന്ന ദിവസങ്ങളിൽ 300-ലധികമാണ് അമിതവേഗതയിൽ വാഹനങ്ങൾ ഓടിച്ച കേസുകളിൽ നടപടി സ്വീകരിച്ചത്. ഇൻഷുറൻസ് ഇല്ലാതെ വാഹനം ഓടിച്ചതിന് 11 പേർക്കെതിരെ പിഴ ചുമത്തിയതോടൊപ്പം സീറ്റ് ബെൽറ്റ് ധരിക്കാതിരിക്കുക, ഡ്രൈവിങ്ങിനിടെ ശ്രദ്ധതിരിക്കുന്ന രീതിയിൽ മൊബൈൽ ഫോൺ ഉപയോഗിക്കുക തുടങ്ങിയ നിയമലംഘനങ്ങൾക്കും നിരവധി പിഴകൾ നൽകി.

ഇൻഷുറൻസ് ഇല്ലാതെ വാഹനമോടിക്കുന്നവരുടെ എണ്ണം ആശങ്കയുണ്ടാക്കുന്നതാണെന്നും, അമിതവേഗവും മറ്റ് നിയമലംഘനങ്ങളും ചേർന്നത് ഗുരുതരമായ ഉത്തരവാദിത്തക്കുറവാണ് വ്യക്തമാക്കുന്നതെന്നും മക്ലാഫ്ലിൻ പറഞ്ഞു. ഇതിനിടെ, ഈ വർഷത്തെ ഷംഭാല ഫെസ്റ്റിവലിനിടെ കാണാതായെന്ന റിപ്പോർട്ടിനെ തുടർന്ന് രാജ്യവ്യാപക ശ്രദ്ധ നേടിയ 28-കാരിയെ സുരക്ഷിതയായി കണ്ടെത്തിയതും കഴിഞ്ഞ ആഴ്ച വലിയ വാർത്തയായിരുന്നു.

ഒന്റാറിയോയിൽ നിന്ന് കുടുംബാംഗങ്ങൾ തിരച്ചിലിനായി ബ്രിട്ടീഷ് കൊളംബിയയിലെത്തിയിരുന്നു. യുവതി ഇപ്പോൾ ചികിത്സയിൽ കഴിയുകയാണെന്നും, ഈ പ്രയാസകരമായ സാഹചര്യത്തിൽ കുടുംബത്തിന്റെ സ്വകാര്യത മാനിക്കണമെന്നുമാണ് കുടുംബം പിന്നീട് പുറത്തിറക്കിയ പ്രസ്താവനയിൽ വ്യക്തമാക്കിയത്.

Warning ignored; driving under the influence; major crackdown following Shambhala Festival.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt