മോങ്ക്ടൺ : ലോർൺവില്ലിൽ ഡാറ്റാ സെന്ററിനായി വൈദ്യുതി ഉത്പാദിപ്പിക്കുന്ന പ്രകൃതിവാതക പ്ലാന്റിന്റെ നിർമ്മാണക്കമ്പനിയായ വോൾട്ടാഗ്രിഡ്, തങ്ങളുടെ വ്യാവസായിക കാർബൺ നികുതി നിരക്കിൽ വ്യക്തത തേടി പ്രവിശ്യാ സർക്കാരിനെ സമീപിച്ചു. വരുന്ന പതിനഞ്ച് വർഷത്തേക്ക് നിശ്ചിത കാർബൺ നികുതി നിരക്ക് ഉറപ്പാക്കണമെന്നാണ് ടെക്സസ് ആസ്ഥാനമായുള്ള കമ്പനി ആവശ്യപ്പെട്ടത്.
പ്രവിശ്യാ സാമ്പത്തിക വികസന ഏജൻസിയായ ഓപ്പർച്യുനിറ്റീസ് ന്യുബ്രൺസ്വിക്കിന്റെ സാമ്പത്തിക സഹായം തേടിയ വേളയിലാണ് കമ്പനി ഈ ആവശ്യം ഉന്നയിച്ചത്. ലോർൺവില്ലി സ്ഥിരതാമസക്കാരനായ ക്രിസ് വാട്സൻ വിവരാവകാശ നിയമപ്രകാരം നേടിയ രേഖകളിലാണ് ഈ വിവരങ്ങളുള്ളത്.
സ്പ്രൂസ് ലേക്ക് ഡാറ്റാ സെന്ററിനായുള്ള വാതക പ്ലാന്റ് പ്രതിവർഷം 7,50,000 ടണ്ണിലധികം ഹരിതഗൃഹ വാതകങ്ങൾ പുറത്തുവിടുമെന്ന് പരിസ്ഥിതി ആഘാത വിലയിരുത്തൽ വ്യക്തമാക്കുന്നു. പ്രവിശ്യയിലെ ഏറ്റവും വലിയ മൂന്നാമത്തെ കാർബൺ എമിട്ടറായി ഇത് മാറും. എന്നാൽ ഫെഡറൽ മാനദണ്ഡങ്ങൾ മാറാൻ സാധ്യതയുള്ളതിനാൽ അടുത്ത 15 വർഷത്തേക്ക് കാർബൺ നികുതി നിരക്ക് ഉറപ്പുനൽകാൻ സർക്കാരിനായില്ല. പ്ലാന്റ് യാഥാർത്ഥ്യമായാൽ 2030-ഓടെയുള്ള ഹരിതഗൃഹ വാതക പുറന്തള്ളൽ ലക്ഷ്യം കൈവരിക്കാൻ പ്രവിശ്യയ്ക്ക് കഴിഞ്ഞേക്കില്ലെന്നും പരിസ്ഥിതി വകുപ്പ് മുന്നറിയിപ്പ് നൽകിയിരുന്നു.
തുടർന്ന് ഫെഡറൽ സർക്കാർ കാർബൺ വിലനിർണ്ണയ മാനദണ്ഡങ്ങൾ കൂടുതൽ ലളിതമാക്കാൻ തീരുമാനിച്ചതോടെയാണ് കാര്യങ്ങൾ മാറിമറിഞ്ഞത്. പുതിയ ഇളവുകൾ പ്രകാരം പ്രവിശ്യ പുതിയ മാനദണ്ഡങ്ങൾ അംഗീകരിക്കാൻ തയ്യാറാവുകയായിരുന്നു. വ്യവസായ രംഗത്തെ മത്സരശേഷി നിലനിർത്താൻ ഇത് സഹായിക്കുമെന്നായിരുന്നു പ്രീമിയർ സൂസൻ ഹോൾട്ടിന്റെ നിലപാട്. ഈ പുതിയ സാഹചര്യത്തെ തുടർന്ന് ജൂൺ 15-ഓടെ പുതിയ ലളിതമാക്കിയ കാർബൺ വിലനിർണ്ണയ മാനദണ്ഡങ്ങൾ പാലിക്കാമെന്ന് വോൾട്ടാഗ്രിഡ് കമ്പനി പ്രവിശ്യാ സർക്കാരിന് ഉറപ്പുനൽകുകയും ചെയ്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
