വാങ്കൂവർ: കെട്ടിടത്തിന്റെ സുരക്ഷാ മാനദണ്ഡങ്ങൾ ലംഘിക്കുകയും അടിയന്തര അറ്റകുറ്റപ്പണികൾ നടത്തുന്നതിൽ വീഴ്ച വരുത്തുകയും ചെയ്ത വീട്ടുടമസ്ഥർക്ക് വാങ്കൂവറിൽ 90,000 ഡോളർ (ഏകദേശം 55 ലക്ഷത്തിലധികം രൂപ) പിഴ ചുമത്തി. ബി.സി. റസിഡൻഷ്യൽ ടെനൻസി ബ്രാഞ്ചാണ് (RTB) നാല് വ്യക്തികൾക്കും ഒരു കമ്പനിക്കുമെതിരെ ഈ നടപടിയെടുത്തത്.
ഒറ്റക്കുടുംബത്തിന് താമസിക്കാൻ അനുമതിയുള്ള വാങ്കൂവറിലെ പഴയ കെട്ടിടത്തിൽ നിയമവിരുദ്ധമായാണ് ഉടമകൾ വാടകക്കാരെ താമസിപ്പിച്ചത്. 2025 ജൂലൈയിൽ നഗരസഭാ ഉദ്യോഗസ്ഥർ നടത്തിയ പരിശോധനയിലാണ് പ്രധാന നിലയിലും അട്ടിക്കിലും ബേസ്‌മെന്റിലുമായി 21 മുറികൾ തിരിച്ച് 17 പേരെ താമസിപ്പിച്ചതായി കണ്ടെത്തിയത്. അനധികൃത നിർമ്മാണം, കേടായ ഇലക്ട്രിക്കൽ-പ്ലംബിംഗ് സംവിധാനങ്ങൾ, തീപിടുത്ത സുരക്ഷാ ഉപകരണങ്ങളുടെ കുറവ്, അടിയന്തര സാഹചര്യങ്ങളിൽ പുറത്തുകടക്കാനുള്ള വഴികളുടെ അഭാവം എന്നിവയും പരിശോധനയിൽ വ്യക്തമായി. എലികളുടെ ശല്യം, പൂപ്പൽ, വെള്ളച്ചോർച്ച എന്നിവയെക്കുറിച്ച് വാടകക്കാരും പരാതിപ്പെട്ടിരുന്നു.
തുടർന്ന് 2025 ഓഗസ്റ്റിൽ കെട്ടിടം ഒഴിയാൻ അധികൃതർ ഉത്തരവിടുകയും അന്വേഷണം ആരംഭിക്കുകയും ചെയ്തു. സാമി ചുയിൻ ഹ്സിയു ലാ, ലിസ പുയി-യി ലാ എന്നിവരുടെ ഉടമസ്ഥതയിലുള്ളതാണ് ഈ കെട്ടിടം. ലൈവ്‌വെൽ ഹോംസ്റ്റേ എന്ന കമ്പനിയും ഇതിന്റെ ഡയറക്ടർമാരായ ജിമി ഹോൺ ചുങ് ലാ, മാത്യു തോസപോൺ ലോ എന്നിവരുമാണ് വാടകക്കരാറുകളിൽ ഉണ്ടായിരുന്നത്.
ALSO READ: കാനഡയിൽ എക്സ്പ്രസ് എൻട്രി മാറുമ്പോൾ എന്തൊക്കെ ശ്രദ്ധിക്കണം; മുന്നറിയിപ്പുമായി ഇമിഗ്രേഷൻ വിദഗ്ധർ
ചോദ്യം ചെയ്യലിന് ഹാജരാകാൻ അവസരം നൽകിയിട്ടും ഉടമകൾ സഹകരിച്ചില്ല. ഇതോടെയാണ് RTB ഡയറക്ടർ സ്കോട്ട് മഗ്രെഗർ പിഴ ചുമത്തി ഉത്തരവിട്ടത്. 17 വാടകക്കാരുടെ സുരക്ഷ ഉറപ്പാക്കാത്തതിന് 85,000 ഡോളറും അറ്റകുറ്റപ്പണികൾ നടത്താത്തതിന് 5,000 ഡോളറുമാണ് സംയുക്തമായി പിഴയൊടുക്കേണ്ടത്. കൂടാതെ മുൻ ഹിയറിംഗുകളിൽ തെറ്റായ വിവരങ്ങൾ നൽകിയതിന് ജിമി ഹോൺ ചുങ് ലായ്ക്ക് വ്യക്തിഗതമായി 3,800 ഡോളർ വേറെയും പിഴ ചുമത്തിയിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
