ഒട്ടാവ : കാനഡയും മെക്സിക്കോയുമായുള്ള വടക്കേ അമേരിക്കൻ സ്വതന്ത്ര വ്യാപാര കരാറായ CUSMA -( Canada-U.S.-Mexico Agreement )നിലവിലെ രൂപത്തിൽ നീട്ടാൻ തങ്ങൾ താല്പര്യപ്പെടുന്നില്ലെന്ന് യുഎസ് പ്രസിഡന്റ് ഡൊണാൾഡ് ട്രംപിന്റെ ഭരണകൂടം അറിയിച്ചു. കാനഡ-യുഎസ് ട്രേഡ് മിനിസ്റ്റർ ഡൊമിനിക് ലെബ്ലാങ്ക്, മെക്സിക്കോയുടെ ഇക്കണോമിക് സെക്രട്ടറി മാർസെലോ എബ്രാഡ് എന്നിവരുമായി യുഎസ് ട്രേഡ് പ്രതിനിധി ജാമിസൺ ഗ്രീർ ബുധനാഴ്ച നടത്തിയ വെർച്വൽ കൂടിക്കാഴ്ചയ്ക്ക് ശേഷമാണ് ഈ ഔദ്യോഗിക പ്രഖ്യാപനം ഉണ്ടായത്. അമേരിക്കയുടെ ഈ തീരുമാനം 2036 വരെ കാലാവധിയുള്ള കരാറിനെ ഉടനടി ബാധിക്കില്ലെങ്കിലും, വ്യവസ്ഥകളിൽ ഭേദഗതി വരുത്തുന്നതിനായുള്ള കടുത്ത ചർച്ചകൾക്ക് ഇത് വഴിവെക്കുമെന്നാണ് വിലയിരുത്തൽ.
കരാറിന്റെ നിബന്ധനകൾ അനുസരിച്ച് അത് 2042 വരെ നീട്ടണോ അതോ വ്യവസ്ഥകൾ പുനഃപരിശോധിക്കണോ എന്ന് മൂന്ന് രാജ്യങ്ങളും വ്യക്തമാക്കി അറിയിക്കേണ്ട അവസാന തീയതി ബുധനാഴ്ചയായിരുന്നു. കാനഡയും മെക്സിക്കോയും കരാർ നീട്ടാൻ താല്പര്യം പ്രകടിപ്പിച്ചിരുന്നെങ്കിലും യുഎസ് അതിന് തയ്യാറായില്ല. നിലവിലെ രൂപത്തിൽ കരാർ പുതുക്കാൻ അമേരിക്കയ്ക്ക് കഴിയില്ലെന്നും, കരാറിലെ പോരായ്മകളും ഇരുരാജ്യങ്ങളുമായുള്ള വ്യാപാര കമ്മി പരിഹരിക്കുന്നതിനും ചർച്ചകൾ തുടരുമെന്നും ജാമിസൺ ഗ്രീർ പ്രസ്താവനയിലൂടെ വ്യക്തമാക്കി. കരാറിൽ നിന്ന് പിന്മാറാൻ ട്രംപിന് അവകാശമുണ്ടെന്ന് വ്യക്തമാക്കിയ മുതിർന്ന യുഎസ് ഉദ്യോഗസ്ഥൻ, വ്യാപാര കമ്മി നിയന്ത്രിക്കാൻ കുസ്മയ്ക്ക് സാധിച്ചിട്ടില്ലെന്നതാണ് തീരുമാനത്തിന് പിന്നിലെ പ്രധാന കാരണമെന്നും മാധ്യമപ്രവർത്തകരെ അറിയിച്ചു.
യുഎസിന്റെ നടപടിയെത്തുടർന്ന് ചർച്ചകൾ തുടരുന്നതിന്റെ പ്രാധാന്യത്തെക്കുറിച്ച് മൂന്ന് രാജ്യങ്ങളും ധാരണയിലെത്തിയതായി കാനഡ-യുഎസ് ട്രേഡ് മിനിസ്റ്റർ ഡൊമിനിക് ലെബ്ലാങ്ക് അറിയിച്ചു. കാനഡയിൽ നിന്നുള്ള സ്റ്റീൽ, അലുമിനിയം, ഓട്ടോമൊബൈൽ, തടി (Softwood lumber) എന്നിവയ്ക്ക് യുഎസ് ചുമത്തിയ സെക്ടറൽ താരിഫുകൾ ഒഴിവാക്കുന്നതിനെക്കുറിച്ചുള്ള ചർച്ചകൾ തങ്ങൾക്ക് പ്രധാനമാണെന്ന് അദ്ദേഹം കൂട്ടിച്ചേർത്തു. അതേസമയം, കരാർ നീട്ടുന്ന കാര്യത്തിൽ ഈ രാജ്യങ്ങൾക്ക് വരും വർഷങ്ങളിൽ എപ്പോൾ വേണമെങ്കിലും തീരുമാനമെടുക്കാമെന്നും സംയുക്ത പ്രവർത്തനങ്ങൾ അവസാനിക്കുന്നില്ലെന്നും മെക്സിക്കൻ പ്രസിഡന്റ് ക്ലോഡിയ ഷെയ്ൻബാം വാർത്താസമ്മേളനത്തിൽ വ്യക്തമാക്കി. മെക്സിക്കോയും യുഎസും തമ്മിലുള്ള അടുത്ത ഘട്ട ചർച്ചകൾ ജൂലൈ 20-ന് നടക്കും.
വടക്കേ അമേരിക്കൻ സ്വതന്ത്ര വ്യാപാര കരാറിന് (NAFTA) പകരമായി രൂപീകരിച്ച കുസ്മ നിലവിൽ വന്നിട്ട് ആറ് വർഷം പിന്നിടുമ്പോൾ, മൂന്ന് രാജ്യങ്ങളും തമ്മിലുള്ള വാർഷിക വ്യാപാര മൂല്യം 37 ശതമാനം വർധിച്ച് 1.9 ട്രില്യൺ യുഎസ് ഡോളറിലധികമായി ഉയർന്നിട്ടുണ്ട്. ഡൊണാൾഡ് ട്രംപ് വീണ്ടും വൈറ്റ് ഹൗസിലെത്തിയ ശേഷം ഏർപ്പെടുത്തിയ ഇറക്കുമതി നികുതികളിൽ നിന്ന് കാനഡയുടെ 90 ശതമാനം കയറ്റുമതിക്കും കുസ്മ കരാർ വഴി ഇളവ് ലഭിക്കുന്നുണ്ട്. കാനഡയുമായി താരതമ്യം ചെയ്യുമ്പോൾ മെക്സിക്കോയുടെ സമീപനം തങ്ങളുടെ താരിഫ് നയങ്ങളോട് കൂടുതൽ പൊരുത്തപ്പെടുന്നതാണെന്നും, കാനഡ പല വ്യാപാര തടസ്സങ്ങളും പരിഹരിക്കാൻ തയ്യാറായിട്ടില്ലെന്നും പേര് വെളിപ്പെടുത്താത്ത മുതിർന്ന യുഎസ് ഉദ്യോഗസ്ഥൻ ആരോപിച്ചു. യുഎസ് ദേശീയ സുരക്ഷ മുൻനിർത്തി സ്റ്റീൽ, അലുമിനിയം, ഓട്ടോമൊബൈൽ മേഖലകളിൽ ഇറക്കുമതി നിയന്ത്രണങ്ങൾ തുടരുമെന്നും അദ്ദേഹം വ്യക്തമാക്കി.
US will not renew CUSMA agreement; America puts Canada and Mexico in a thorny position
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
