ടൊറന്റോ: കനേഡിയൻ ഉൽപ്പന്നങ്ങൾക്ക് മേൽ അമേരിക്ക പുതിയ താരിഫുകൾ ചുമത്താൻ ഒരുങ്ങുന്ന പശ്ചാത്തലത്തിൽ പ്രാദേശിക ബിസിനസുകളെ സംരക്ഷിക്കുന്നതിനായി കർശന നടപടികൾ സ്വീകരിക്കുമെന്ന് ഗ്രേറ്റർ ടൊറന്റോ ഏരിയയിലെ മേയർമാർ അറിയിച്ചു. ടൊറന്റോ മേയർ ഒലീവിയ ചൗ, മിസിസാഗ മേയർ കരോലിൻ പാരിഷ്, ബ്രാംപ്ടൺ മേയർ പാട്രിക് ബ്രൗൺ എന്നിവരാണ് ഇത് സംബന്ധിച്ച വിവരങ്ങൾ വ്യക്തമാക്കിയത്.
മുൻ വർഷം യുഎസ് പ്രസിഡന്റ് ഡൊണാൾഡ് ട്രംപ് കനേഡിയൻ ഉൽപ്പന്നങ്ങൾക്ക് താരിഫ് ഏർപ്പെടുത്തിയപ്പോൾ രൂപീകരിച്ച വിദഗ്ധ സമിതികളെ വീണ്ടും വിളിച്ചുചേർക്കുമെന്നും ബിസിനസ്സ് ഉടമകളെ പുതിയ വിപണികൾ കണ്ടെത്താൻ സഹായിക്കുമെന്നും മേയർമാർ വ്യക്തമാക്കി. ഓഗസ്റ്റ് പകുതിയോടെ പ്രാബല്യത്തിൽ വരുന്ന രീതിയിൽ വൈൻ, ഹോക്കി സ്റ്റിക്കുകൾ, സിമന്റ് ഉൾപ്പെടെയുള്ള വിവിധ കനേഡിയൻ ഉൽപ്പന്നങ്ങൾക്ക് 50 ശതമാനം പുതിയ താരിഫ് ചുമത്തുമെന്ന് തിങ്കളാഴ്ച അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചിരുന്നു.
ഇതിനെ പ്രതിരോധിക്കാൻ ടൊറന്റോയിലെ തൊഴിലാളികളെയും ബിസിനസുകളെയും സംരക്ഷിക്കുന്നതിനായി 10 പോയിന്റ് കർമ്മപദ്ധതി തയ്യാറാക്കിയ ‘മേയേഴ്സ് ഇക്കണോമിക് ആക്ഷൻ ടീം’ വീണ്ടും ചേർന്ന് തുടർനടപടികൾ വിലയിരുത്തുമെന്ന് മേയർ ഒലീവിയ ചൗ അറിയിച്ചു. ഫെഡറൽ, പ്രൊവിൻഷ്യൽ സർക്കാരുകളുമായി സഹകരിച്ചുള്ള ‘ടീം കാനഡ’ സമീപനമാണ് സ്വീകരിക്കുന്നതെന്നും അവർ പറഞ്ഞു.
അമേരിക്കയെ മാത്രം ആശ്രയിക്കാതെ ലോകത്തിന്റെ മറ്റ് ഭാഗങ്ങളിൽ നിന്നുള്ള പുതിയ വാണിജ്യ പങ്കാളികളെ കണ്ടെത്തേണ്ടതുണ്ടെന്ന് മിസിസാഗ മേയർ കരോലിൻ പാരിഷ് ചൂണ്ടിക്കാട്ടി. കൂടാതെ അമേരിക്കൻ മദ്യത്തിന് ഒന്റാറിയോ ഏർപ്പെടുത്തിയ ബഹിഷ്കരണം തുടരണമെന്നും അവർ അഭിപ്രായപ്പെട്ടു. പുതിയ താരിഫുകൾ പ്രാദേശിക സാമ്പത്തിക രംഗത്തെ ബാധിക്കുമെന്നും അതിനാൽ യൂറോപ്യൻ യൂണിയൻ ഉൾപ്പെടെയുള്ള മറ്റ് വിപണികളിലേക്ക് വ്യാപാരം തിരിച്ചുവിട്ട് വിപണി വൈവിധ്യവൽക്കരണത്തിന് പ്രാധാന്യം നൽകുമെന്നും ബ്രാംപ്ടൺ മേയർ പാട്രിക് ബ്രൗൺ വ്യക്തമാക്കി.
US tariff threat: Greater Toronto Area mayors outline plans to protect local businesses
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
