ഒട്ടാവ: ഒന്റാറിയോയിൽ ഏകദേശം 4.5 മില്യൺ ഡോളർ (45 ലക്ഷം ഡോളർ) വിലമതിക്കുന്ന കൊക്കെയ്നും ലക്ഷക്കണക്കിന് ഡോളർ പണവും പിടിച്ചെടുത്തതായി കാനേഡിയൻ അധികൃതർ അറിയിച്ചു. ഗോൾഡൻ ഹോഴ്സ്ഷൂ” (Golden Horseshoe) എന്ന പേരിൽ നടന്ന അന്വേഷണത്തിന്റെ ഭാഗമായാണ് വൻ മയക്കുമരുന്ന് ശൃംഖല തകർത്തത്.
ജൂലൈ 8-ന് റോയൽ കനേഡിയൻ മൗണ്ടഡ് പൊലീസ് (RCMP) ഉൾപ്പെടെയുള്ള ഏജൻസികൾ ടൊറന്റോയിലെ ഒരു കോൺഡോയിൽ പരിശോധന നടത്തി. കൊക്കെയ്ൻ സംഭരിക്കാനും വിതരണത്തിനായി തയ്യാറാക്കാനും ഈ കോൺഡോ ഉപയോഗിച്ചിരുന്നുവെന്നാണ് അന്വേഷണ ഉദ്യോഗസ്ഥരുടെ ആരോപണം.
പരിശോധനയിൽ 170 കിലോഗ്രാമിലധികം കൊക്കെയ്ൻ പിടിച്ചെടുത്തതായും, സംഭവസ്ഥലത്ത് രണ്ട് പേരെ അറസ്റ്റ് ചെയ്തതിനു പിന്നാലെ സമീപ പ്രദേശത്ത് നിന്ന് മൂന്നാമത്തെ പ്രതിയെയും കസ്റ്റഡിയിലെടുത്തതായും വെള്ളിയാഴ്ച പുറത്തിറക്കിയ വാർത്താക്കുറിപ്പിൽ അറിയിച്ചു. തുടർന്ന് ഹാമിൽട്ടണിലെ വിവിധ സ്ഥലങ്ങളിൽ നടത്തിയ റെയ്ഡുകളിൽ നിന്ന് ഏകദേശം 1.65 ലക്ഷം ഡോളർ പണവും, Proceeds of Crime Act പ്രകാരം ആഭരണങ്ങളും പൊലീസ് പിടിച്ചെടുത്തു.
ഹാമിൽട്ടൺ സ്വദേശികളായ ടോണി വാൻ ലെ (39), കോൺഗ് ക്വാങ് വാൻ (38), ബ്രാന്റ്ഫോർഡിലെ ഹായ് താൻ ഹോ ട്രാൻ (41) എന്നിവർക്കെതിരെ Controlled Drugs and Substances Act പ്രകാരം മയക്കുമരുന്ന് കടത്തിനായി കൈവശം വച്ചെന്ന കുറ്റം ചുമത്തിയിട്ടുണ്ട്. കേസുകൾ ഇതുവരെ കോടതിയിൽ തെളിയിക്കപ്പെട്ടിട്ടില്ല.
ആർസിഎംപിക്കൊപ്പം ടൊറന്റോ പൊലീസ് സർവീസ്, കാനഡ ബോർഡർ സർവീസസ് ഏജൻസി (CBSA), ഒന്റാറിയോ പ്രൊവിൻഷ്യൽ പൊലീസ് (OPP), ബ്രാന്റ്ഫോർഡ്, ഹാമിൽട്ടൺ, നയാഗ്ര റീജിയണൽ പൊലീസ് എന്നിവയും അന്വേഷണത്തിൽ പങ്കെടുത്തു.
സംഘടിത കുറ്റകൃത്യങ്ങളുടെ പ്രധാന ലക്ഷ്യം സാമ്പത്തിക ലാഭമാണെങ്കിലും, അനധികൃത മയക്കുമരുന്ന് കടത്ത് രാജ്യത്തുടനീളമുള്ള സമൂഹങ്ങളിൽ ലഹരി ഉപയോഗം, അക്രമം, ചൂഷണം എന്നിവ വർധിപ്പിച്ച് പൊതുസുരക്ഷയെ ഗുരുതരമായി ബാധിക്കുന്നുവെന്ന് ആർസിഎംപി ഇൻസ്പെക്ടർ ലൂസിയോ ഡി സിമോൺ മുന്നറിയിപ്പ് നൽകി.
Massive drug bust in Toronto condo; $4.5 million worth of cocaine seized
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
