ടൊറന്റോ: ഗ്രേറ്റർ ടൊറന്റോ ഏരിയയിൽ(GTA) വീടുകളിൽ നേരിട്ട് തപാൽ എത്തിക്കുന്ന സംവിധാനം അവസാനിപ്പിക്കാനുള്ള നടപടികളുമായി കാനഡ പോസ്റ്റ്. ഇതിന്റെ ആദ്യഘട്ടം നവംബർ 16ന് എട്ടോബികോക്കിൽ ആരംഭിക്കും. തുടർന്ന് അടുത്ത അഞ്ച് വർഷത്തിനുള്ളിൽ ജി.ടി.എയിലെ മറ്റ് പ്രദേശങ്ങളിലേക്കും മാറ്റം വ്യാപിപ്പിക്കും. 2031 സെപ്റ്റംബറോടെ വീടുകളിലേക്കുള്ള നേരിട്ടുള്ള തപാൽ വിതരണം പൂർണമായി അവസാനിപ്പിക്കാനാണ് പദ്ധതി.
എട്ടോബികോക്കിലെ മാറ്റത്തോടെ ഇവിടെയുള്ള താമസക്കാർക്ക് വീടുകളിൽ നേരിട്ട് തപാൽ ലഭിക്കില്ല. പകരം നിശ്ചയിച്ചിട്ടുള്ള കമ്മ്യൂണിറ്റി മെയിൽബോക്സുകളിൽ നിന്നായിരിക്കും കത്തുകളും മറ്റ് തപാൽ ഉരുപ്പടികളും സ്വീകരിക്കേണ്ടത്. ജി.ടി.എയിലെ മറ്റ് പ്രദേശങ്ങളിലും ഇതേ രീതിയിലായിരിക്കും പുതിയ സംവിധാനം നടപ്പാക്കുക.
ALSO READ: കാനഡയിൽ RRSP പരിധി ഉയർത്തി; പുതിയ കണക്കുകൾ പുറത്തുവിട്ട് സി.ആർ.എ.
പദ്ധതി പ്രകാരം വിവിധ പ്രദേശങ്ങളിലെ വീടുകൾ ഘട്ടംഘട്ടമായി പുതിയ സംവിധാനത്തിലേക്ക് മാറും. ഓറഞ്ച്‌വിൽ, നോർത്ത് യോർക്കിന്റെ ചില ഭാഗങ്ങൾ, ഡൗൺടൗൺ ടൊറന്റോയിലെ ഭൂരിഭാഗം പ്രദേശങ്ങൾ എന്നിവിടങ്ങളിൽ മാറ്റം അവസാനഘട്ടത്തിലായിരിക്കും നടപ്പാക്കുക.
രാജ്യത്തുടനീളമുള്ള ഏകദേശം 40 ലക്ഷം വിലാസങ്ങളെ നേരിട്ടുള്ള തപാൽ വിതരണത്തിൽനിന്ന് കമ്മ്യൂണിറ്റി മെയിൽബോക്സ് സംവിധാനത്തിലേക്ക് മാറ്റാനാണ് കാനഡ പോസ്റ്റിന്റെ തീരുമാനം. നിലവിൽ രാജ്യത്തെ 80 ശതമാനത്തോളം ആളുകളും ഈ സംവിധാനത്തിലൂടെയാണ് തപാൽ സ്വീകരിക്കുന്നതെന്ന് കാനഡ പോസ്റ്റ് വക്താവ് ജെനീവിയേവ് ജോളി അറിയിച്ചു.
അതേസമയം, കമ്മ്യൂണിറ്റി മെയിൽബോക്സുകളിൽ എത്തി തപാൽ ശേഖരിക്കാൻ ബുദ്ധിമുട്ടുള്ള വയോജനങ്ങൾക്കും ഭിന്നശേഷിക്കാർക്കും പ്രത്യേക സൗകര്യം ലഭിക്കും. പേഴ്സണലൈസ്ഡ് ഡെലിവറി അക്കോമഡേഷൻ പ്രോഗ്രാം വഴി അർഹരായവർക്ക് വീട്ടിൽ തപാൽ എത്തിക്കുന്നതിന് അപേക്ഷിക്കാം. താൽക്കാലികമായോ പ്രത്യേക സീസണുകളിലോ ആഴ്ചയിലൊരിക്കലോ ഈ സേവനം ലഭ്യമാക്കും. കാനഡ പോസ്റ്റിന്റെ വെബ്സൈറ്റ് വഴിയോ കസ്റ്റമർ സർവീസ് നമ്പറിലൂടെയോ അപേക്ഷ സമർപ്പിക്കാം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
