ദോശ ഉണ്ടാക്കിയും ദീപാവലി ആഘോഷിച്ചും പ്രചാരണം: യുഎസ് തിരഞ്ഞെടുപ്പിൽ ഇന്ത്യൻ വോട്ടർമാരെ പിടിക്കാൻ സ്ഥാനാർത്ഥികൾ

വാഷിംഗ്ടൺ: വരാനിരിക്കുന്ന യുഎസ് മിഡ്‌ടേം തിരഞ്ഞെടുപ്പിൽ ഇന്ത്യൻ വോട്ടർമാരുടെ പിന്തുണ ഉറപ്പാക്കാൻ വിചിത്ര പ്രചാരണ രീതികളുമായി സ്ഥാനാർത്ഥികൾ. ഇന്ത്യൻ ഭക്ഷണശാലകളിൽ ദോശയുണ്ടാക്കിയും പ്രമുഖ ക്ഷേത്രങ്ങളിൽ ദീപാവലി ആഘോഷങ്ങളിൽ പങ്കെടുത്തും ഇന്ത്യൻ-അമേരിക്കൻ സമൂഹത്തിന്റെ മനസ്സു കീഴടക്കാനുള്ള ശ്രമങ്ങളിലാണ് അവർ. കടുത്ത മത്സരം നടക്കുന്ന സംസ്ഥാനങ്ങളിൽ ഈ ജനവിഭാഗത്തിന്റെ വോട്ടുകൾ വിജയസാധ്യതയെ നേരിട്ട് സ്വാധീനിക്കുമെന്നതാണ് ഇതിന് പ്രധാന കാരണം.

ടെക്സസിലെ ഇർവിംഗിലുള്ള ഒരു ഇന്ത്യൻ റസ്റ്റോറന്റിൽ ഡെമോക്രാറ്റിക് സ്ഥാനാർത്ഥി ജെയിംസ് തലാറിക്കോ നേരിട്ടെത്തി ദോശയുണ്ടാക്കി വാഴയിലയിൽ വിളമ്പിയത് വോട്ടർമാർക്കിടയിൽ വലിയ തരംഗമായിട്ടുണ്ട്. കൂടാതെ കണക്റ്റിക്കട്ട് ഗവർണർ നെഡ് ലാമോണ്ട് സ്റ്റേറ്റ് കാപ്പിറ്റോളിൽ സംഘടിപ്പിച്ച ദീപാവലി ആഘോഷങ്ങളിൽ പങ്കെടുത്തു. ഒഹായോ, ന്യൂജേഴ്‌സി, പെൻസിൽവാനിയ, മിഷിഗൺ എന്നിവിടങ്ങളിലെ വിവിധ ക്ഷേത്രങ്ങളും സന്ദർശിച്ച് യുഎസ് നേതാക്കൾ ഹിന്ദു-അമേരിക്കൻ സമൂഹവുമായി സൗഹൃദം പുതുക്കുകയും പാരമ്പര്യങ്ങളെക്കുറിച്ച് പഠിക്കുകയും ചെയ്തു.

അമേരിക്കയിലെ കാലിഫോർണിയ, ടെക്സസ്, ന്യൂജേഴ്‌സി, ന്യൂയോർക്ക്, വാഷിംഗ്ടൺ, ഇല്ലിനോയിസ്, പെൻസിൽവാനിയ, ജോർജിയ തുടങ്ങിയ സംസ്ഥാനങ്ങളിൽ വലിയൊരു വിഭാഗം ഇന്ത്യൻ-അമേരിക്കൻ വംശജർ താമസിക്കുന്നുണ്ട്. പ്രത്യേകിച്ചും ജോർജിയ, പെൻസിൽവാനിയ, മിഷിഗൺ തുടങ്ങിയ ‘സ്വിംഗ് സ്റ്റേറ്റുകളിൽ’ സ്ഥാനാർത്ഥികളുടെ ജയപരാജയങ്ങൾ നിർണ്ണയിക്കാൻ ഒന്നോ രണ്ടോ ശതമാനം വരുന്ന വോട്ടുകൾ പോലും വളരെ നിർണായകമാണ്. ഇത് മുൻനിർത്തിയാണ് ഇരു പാർട്ടികളുടെയും പ്രധാന നേതാക്കൾ ഇന്ത്യൻ സമൂഹത്തിലേക്ക് നേരിട്ടെത്തുന്നത്.

ഒരു വിഭാഗം എതിരാളികളിൽ നിന്ന് വംശീയവും സാംസ്കാരികവുമായ അധിക്ഷേപങ്ങൾ നേരിടേണ്ടി വരാറുള്ള ഇന്ത്യൻ സമൂഹത്തിന്, സ്ഥാനാർത്ഥികളുടെ ഇത്തരം ചേർത്തുപിടിക്കലുകൾ വലിയ പ്രതീക്ഷ നൽകുന്നുണ്ട്. ജെയിംസ് തലാറിക്കോയുടെ ദോശ ഉണ്ടാക്കുന്നതിനെയും സാംസ്കാരിക കൂട്ടായ്മയെയും ടെക്സസിലെ സാധാരണക്കാരും ബിസിനസ് സമൂഹവും ഏറെ സന്തോഷത്തോടെയാണ് സ്വീകരിച്ചത്. പ്രാദേശിക പാരമ്പര്യങ്ങളെയും സംസ്കാരത്തെയും ബഹുമാനിക്കുന്ന സ്ഥാനാർത്ഥികൾക്ക് വോട്ടർമാർക്കിടയിൽ കൂടുതൽ സ്വാധീനം ചെലുത്താൻ സാധിക്കുന്നുണ്ടെന്നാണ് സോഷ്യൽ മീഡിയയിലെ പ്രതികരണങ്ങൾ.

Also Read: ലണ്ടനിൽ പഠിക്കാൻ പോയ യുവതി പുണെയിലെ ഫ്ലാറ്റിൽ മരിച്ച നിലയിൽ

ഇന്ത്യൻ സമൂഹത്തിന്റെ സാംസ്കാരിക പ്രാധാന്യവും സാമ്പത്തിക ശക്തിയും രാഷ്ട്രീയ പാർട്ടികൾ തിരിച്ചറിയുന്നു എന്നതിന്റെ തെളിവാണ് ഈ മാറ്റങ്ങൾ. തങ്ങളുടെ പരാതികളും ആവശ്യങ്ങളും കേൾക്കാൻ തയ്യാറാകുന്ന സ്ഥാനാർത്ഥികൾക്ക് പിന്തുണ നൽകാനാണ് ഇന്ത്യൻ-അമേരിക്കൻ സംഘടനകളുടെ തീരുമാനം. അതിനാൽ തന്നെ, വരും ദിവസങ്ങളിലും കൂടുതൽ സ്ഥാനാർത്ഥികൾ ഇന്ത്യൻ കേന്ദ്രങ്ങളിലേക്ക് പ്രചാരണവുമായി എത്തുമെന്നാണ് പ്രതീക്ഷിക്കുന്നത്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z