വാഷിംഗ്‌ടൺ: യുഎസ് ഇടക്കാല തിരഞ്ഞെടുപ്പിൽ പ്രതിനിധി സഭയിലോ സെനറ്റിലോ റിപ്പബ്ലിക്കൻ പാർട്ടിക്ക് ഭൂരിപക്ഷം നഷ്ടപ്പെടുകയും ഡെമോക്രാറ്റുകൾ മുന്നേറുകയും ചെയ്താൽ താൻ ‘മിസ്റ്റർ വീറ്റോ’ ആയി മാറുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ്. പ്രതിപക്ഷ പാർട്ടിയായ ഡെമോക്രാറ്റുകൾ കോൺഗ്രസിന്റെ നിയന്ത്രണം ഏറ്റെടുത്താൽ അവർ കൊണ്ടുവരുന്ന ബില്ലുകൾ തടയാൻ പ്രസിഡന്റിന്റെ പ്രത്യേക വീറ്റോ അധികാരം പൂർണ്ണമായി ഉപയോഗിക്കുമെന്നാണ് അദ്ദേഹത്തിന്റെ നിലപാട്. ഭരണത്തിൽ സ്വന്തം നയങ്ങൾ സംരക്ഷിക്കാനും പ്രതിപക്ഷ നിയമനിർമ്മാണങ്ങളെ ചെറുക്കാനും വേണ്ടിയാണ് ഈ തന്ത്രം മുന്നോട്ടുവെക്കുന്നത്.
പ്രതിപക്ഷം പാസാക്കുന്ന ബില്ലുകൾ നിരസിക്കുന്നതിലൂടെ അവരെ വീണ്ടും ചർച്ചകളിലേക്ക് കൊണ്ടുവരാനും തനിക്കനുയോജ്യമായ കരാറുകളിൽ എത്തിക്കാനും കഴിയുമെന്നാണ് ട്രംപിന്റെ കണക്കുകൂട്ടൽ. ന്യൂയോർക്ക് പോസ്റ്റിന്റെ ‘പോഡ് ഫോഴ്‌സ് വൺ’ പോഡ്‌കാസ്റ്റിൽ നൽകിയ അഭിമുഖത്തിലാണ് അദ്ദേഹം ഈ തന്ത്രം വെളിപ്പെടുത്തിയത്.
ഡെമോക്രാറ്റുകൾ അയക്കുന്ന നിയമനിർദ്ദേശങ്ങൾ അംഗീകരിക്കില്ലെന്നും അവ വീറ്റോ ചെയ്ത് തിരിച്ചയക്കുമെന്നും ട്രംപ് വ്യക്താക്കി. ഒന്നോ രണ്ടോ മാസം വീറ്റോ അധികാരം തുടരുമ്പോൾ ഡെമോക്രാറ്റുകൾക്ക് സമയം പാഴാകുമെന്നും ഒടുവിൽ അവർ വിട്ടുവീഴ്ചകൾക്ക് തയ്യാറായി തന്നോടൊപ്പം കരാറിലെത്തുമെന്നും അദ്ദേഹം കരുതുന്നു. മുൻപും ഡെമോക്രാറ്റുകളുമായി ഇത്തരം കരാറുകളിൽ എത്തിയിട്ടുണ്ടെന്നും രാജ്യത്തെ നശിപ്പിക്കാൻ പ്രതിപക്ഷത്തെ അനുവദിക്കില്ലെന്നും ട്രംപ് കൂട്ടിച്ചേർത്തു.
റിപ്പബ്ലിക്കൻ പാർട്ടി തന്നെ കോൺഗ്രസിന്റെ നിയന്ത്രണം നിലനിർത്തുമെന്ന പ്രതീക്ഷയും ട്രംപ് പങ്കുവെച്ചു. പാർട്ടി മികച്ച പ്രകടനം കാഴ്ചവെക്കുമെന്നാണ് കരുതുന്നതെങ്കിലും തിരിച്ചടിയുണ്ടായാൽ വീറ്റോ അധികാരം നിരന്തരം ഉപയോഗിക്കാൻ മടിക്കില്ലെന്ന് അദ്ദേഹം വ്യക്തമാക്കി. പ്രസിഡന്റായി തുടരുന്ന രണ്ടാം ഘട്ടത്തിൽ ഇതുവരെ രണ്ടുതവണ മാത്രമാണ് ട്രംപ് വീറ്റോ അധികാരം പ്രയോഗിച്ചിട്ടുള്ളത്. അതേസമയം അദ്ദേഹത്തിന്റെ ആദ്യ ഭരണകാലയളവിൽ ആകെ 10 ബില്ലുകൾ വീറ്റോ ചെയ്തിരുന്നു.
അമേരിക്കൻ ഭരണഘടന അനുസരിച്ച്, കോൺഗ്രസ് പാസാക്കുന്ന ബില്ലുകൾ വേണ്ടെന്നു വെക്കാൻ പ്രസിഡന്റിന് വീറ്റോ അധികാരമുണ്ട്. എന്നാൽ ജനപ്രതിനിധി സഭയിലും സെനറ്റിലും മൂന്നിൽ രണ്ട് ഭാഗം അംഗങ്ങൾ എതിർപ്പില്ലാതെ വോട്ട് ചെയ്താൽ പ്രസിഡന്റിന്റെ ഈ തീരുമാനം പൊളിച്ച് കോൺഗ്രസിന് നിയമം പാസാക്കാം. അതുപോലെ, വീണ്ടും പ്രസിഡന്റാകാൻ താൽപ്പര്യമുണ്ടോ എന്ന് ചോദിച്ചപ്പോൾ, ഒരാൾക്ക് രണ്ടുതവണയിൽ കൂടുതൽ ആ പദവിയിൽ തുടരാൻ പറ്റില്ലെന്ന 22-ാം ഭരണഘടനാ ഭേദഗതി വളരെ കശനമായതുകൊണ്ട് അതിന് ബുദ്ധിമുട്ടാണെന്ന് ട്രംപ് പറഞ്ഞു.
Also Read: പശ്ചിമേഷ്യൻ പ്രതിസന്ധിയിൽ ഇന്ത്യയെ രക്ഷിച്ചത് ആ ഒരു തീരുമാനം: പ്രധാനമന്ത്രി മോദി വെളിപ്പെടുത്തുന്നു
അമേരിക്കൻ ജനപ്രതിനിധി സഭയിലെ 435 സീറ്റുകളിലേക്കും സെനറ്റിലെ 35 സീറ്റുകളിലേക്കുമാണ് നവംബർ 3 ചൊവ്വാഴ്ച ഇടക്കാല തിരഞ്ഞെടുപ്പ് നടക്കുന്നത്. നിലവിൽ റിപ്പബ്ലിക്കൻ പാർട്ടിക്ക് നേരിയ ഭൂരിപക്ഷമുള്ള സഭയുടെ നിയന്ത്രണം തിരിച്ചുപിടിക്കാൻ ഡെമോക്രാറ്റുകൾക്ക് മൂന്ന് സീറ്റുകൾ കൂടി അധികമായി നേടേണ്ടതുണ്ട്. ഭരണപക്ഷത്തിന്റെയും പ്രതിപക്ഷത്തിന്റെയും ഭാവി നിർണ്ണയിക്കുന്നതിൽ ഈ തിരഞ്ഞെടുപ്പ് ഫലം ഏറെ നിർണ്ണായകമാകും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
